നടിയെ ആക്രമിച്ച കേസിൽ ഭാമയുടെ സാക്ഷി വിസ്താരം മാറ്റി വച്ചു. മാര്‍ച്ച് പതിമൂന്നാം തീയതിയിലേക്കാണ് മാറ്റി വച്ചിരിക്കുന്നത്. മൊഴി നൽകാനായി ഭാമ രാവിലെ കൊച്ചിയിലെ കോടതിയിലെത്തി . എന്നാൽ പ്രോസിക്യൂഷൻ അസൗകര്യം അറിയിക്കുകയും വിസ്താരം മാറ്റി വയ്ക്കുകയുമായിരുന്നു. ആക്രമിക്കപ്പെട്ട നടിയോട് എട്ടാം പ്രതിയായ ദിലീപിനുണ്ടായിരുന്ന വൈരാഗ്യത്തെക്കുറിച്ചാണ് ചലച്ചിത്ര പ്രവർത്തകരിൽ നിന്നും പ്രൊസിക്യൂഷൻ മൊഴിയെടുക്കുന്നത്. ദിലീപ് തന്‍റെ അവസരങ്ങൾ തട്ടിത്തെറിപ്പിക്കുന്നതായി ആക്രമണത്തിനിരയായ നടി നേരത്തെ മൊഴി നൽകിയിരുന്നു. ഇതിന്‍റെ അടിസ്ഥാനത്തിലാണ് ഭാമയേയും സാക്ഷിയാക്കിയത്.

കേസിലെ പ്രോസിക്യൂഷൻ സാക്ഷിയായിരുന്ന 'അമ്മ'യുടെ ജനറൽ സെക്രട്ടറി ഇടവേള ബാബു ഇന്നലെ നടന്ന വിസ്താരത്തിനിടെ കൂറുമാറ്റം നടത്തിയിരുന്നു. പൊലീസിന് നൽകിയ മൊഴിയിൽ നിന്നും ബാബു പിൻമാറുകയും ചെയ്തിരുന്നു . ദിലീപിന് അനുകൂലമായിട്ടായിരുന്നു ഇടവേള ബാബുവിന്‍റെ കൂറുമാറ്റം. സാക്ഷി കൂറുമാറിയതായി പ്രഖ്യാപിക്കണമെന്ന പോസിക്യൂഷൻ ആവശ്യം വിചാരണ കോടതി അംഗീകരിച്ചു. എന്നാൽ മറ്റുള്ളവരെയും വിസ്തരിച്ചിരുന്നു .