കൊറോണ വൈറസ് ബാധിതരുടെ എണ്ണം സംസ്ഥാനത്ത് വര്‍ദ്ധിക്കുന്നതിന്റെ പശ്ചാത്തലത്തില്‍ ജനങ്ങളില്‍ അമിതമായ ഭീതിയുണ്ടാക്കുന്ന പ്രചരണം ഒഴിവാക്കണമെന്ന് ജില്ലാ ഇന്‍ഫര്‍മേഷന്‍ ഓഫീസര്‍. ജനങ്ങള്‍ പുറത്തിറങ്ങാതെ വീട്ടിലിരിക്കണമെന്ന് കളക്ടര്‍ പറഞ്ഞതായുള്ള വാര്‍ത്ത തെറ്റിദ്ധാരണ പരത്തുന്നതാണെന്നും അദ്ദേഹം ഫേസ്ബുക്ക് പോസ്റ്റിലൂടെ പറയുന്നു. ഫലപ്രദമായ പ്രതിരോധത്തിനായി ആള്‍ക്കൂട്ടങ്ങളും യാത്രയും പരമാവധി ഒഴിവാക്കാനാണ് കളക്ടര്‍ നിര്‍ദ്ദേശിച്ചതെന്നും അദ്ദേഹം കുറിച്ചു.

ഫേസ്ബുക്ക് പോസ്റ്റിന്റെ പൂര്‍ണ്ണരൂപം

തലസ്ഥാന ജില്ലയില്‍ ജനങ്ങള്‍ പുറത്തിറങ്ങാതെ വീട്ടിലിരിക്കണമെന്ന് കളക്ടര്‍ പറഞ്ഞതായ വാര്‍ത്ത തെറ്റിദ്ധാരണ പരത്തുന്നതാണ്. ഫലപ്രദമായ പ്രതിരോധത്തിനായി ആള്‍ക്കൂട്ടങ്ങളും യാത്രയും പരമാവധി ഒഴിവാക്കാനാണ് കളക്ടര്‍ നിര്‍ദ്ദേശിച്ചത്. അമിതമായ ഭീതിയുണ്ടാക്കുന്ന പ്രചാരണം ഒഴിവാക്കണമെന്ന് അഭ്യര്‍ഥിക്കുന്നു.
- ജില്ലാ ഇന്‍ഫര്‍മേഷന്‍ ഓഫീസര്‍

രോഗികളില്‍ പലരും നിര്‍ദേശങ്ങള്‍ പാലിക്കുന്നില്ലെന്ന് കളക്ടര്‍ നേരത്തെ പറഞ്ഞിരുന്നു. ജനങ്ങള്‍ അനാവശ്യമായി പുറത്ത് പോകരുതെന്നും,​ രോഗ ലക്ഷണമുള്ളവര്‍ പൊതുഗതാഗത സംവിധാനം ഉപയോഗിക്കരുതെന്നും അദ്ദേഹം മുന്നറിയിപ്പ് നല്‍കിയിരുന്നു. കൂടാതെ ഷോപ്പിംഗ് മാളുകളും ബീച്ചും അടച്ചിടുമെന്നും കളക്ടര്‍ അറിയിച്ചിരുന്നു. മൂന്ന് പേര്‍ക്കാണ് തിരുവനന്തപുരത്ത് കൊറോണ സ്ഥിരീകരിച്ചത്. ജില്ലയില്‍ 249 പേര്‍ നിരീക്ഷണത്തിലാണ്.