ചികിത്സക്കെത്തിയ അള്‍സര്‍ രോഗിയെ ദുരുദ്യേശത്തോടെ സ്പര്‍ശിച്ച ഡോക്ടര്‍ അറസ്റ്റില്‍
അഹമ്മദാബാദില്‍ ചികിത്സക്കെത്തിയ 25കാരിയായ യുവതിയോട് മോശമായി പെരുമാറിയ ഡോക്ടര്‍ അറസ്റ്റില്‍. അഹമ്മദാബാദിലെ മേംനഗറിലുള്ള സ്വകാര്യ ആശുപത്രിയിലെ ഡോക്ടറും അഹമ്മദാബാദിലെ താല്‍തെജ് സ്വദേശിയുമായ വിരാജ് സതീഷ്‌കുമാര്‍ പട്ടേല്‍ ആണ് അറസ്റ്റിലായത്. കോടതിയില്‍ ഹാജരാക്കിയ പ്രതിയെ സെന്‍ട്രല്‍ ജയിലില്‍ പ്രവേശിപ്പിച്ചു. സംഭവത്തില്‍ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
വസ്ത്രാപൂര്‍ സ്വദേശിയായ യുവതി ഒരു പ്രാദേശിക സ്ഥാപനത്തിലെ വിദ്യാര്‍ത്ഥിനിയാണ്. അള്‍സര്‍ ബാധിച്ച യുവതി മേംനഗറിലെ ഗ്യാസ്‌ട്രോ ആന്റ് ലിവര്‍ ഹോസ്പിറ്റലില്‍ ചികിത്സക്കെത്തിയതായിരുന്നു. ആദ്യ കൂടിക്കാഴ്ചയില്‍ ഡോക്ടര്‍ സോണോഗ്രഫി ഉള്‍പ്പെടെ ചെയ്യിക്കുകയും യുവതിക്ക് മരുന്ന് നല്‍കുകയും ചെയ്തു.
ആരോഗ്യസ്ഥിതി മോശമായതോടെ കുടുംബത്തോടൊപ്പം ഒക്‌ടോബര്‍ ഒന്നിന് യുവതി വീണ്ടും ആശുപത്രിയിലെത്തി. അന്ന് രാത്രി പരിശോധനക്കിടെ അടിവസ്ത്രമഴിച്ചുമാറ്റാന്‍ ആവശ്യപ്പെടുകയും കയ്യുറ ധരിക്കാതെ മാറിടത്തില്‍ പരിശോധിക്കുകയും ചെയ്തുവെന്ന് യുവതിയുടെ പരാതിയില്‍ പറയുന്നു. വനിതാ സ്റ്റാഫിന്റെ സാന്നിദ്ധ്യമില്ലാതെയായിരുന്നു പരിശോധന. പിറ്റേദിവസവും യുവതിയോട് ചികിത്സക്കെത്താന്‍ ആവശ്യപ്പെട്ട ഡോക്ടര്‍ യുവതിയെ ആശുപത്രിയിലെ മറ്റൊരു മുറിയില്‍ കൊണ്ടുപോവുകയും മുറി അകത്തുനിന്ന് പൂട്ടുകയും ചെയ്തു.
തുടര്‍ന്ന് വനിതാ സ്റ്റാഫിന്റെ സാന്നിദ്ധ്യമില്ലാതെ അടിവസ്ത്രമഴിച്ചുമാറ്റാന്‍ ആവശ്യപ്പെട്ട് കൈയുറ ധരിക്കാതെ സ്വകാര്യഭാഗത്തും മലദ്വാരത്തിലും വിരലുകള്‍ കടത്തിയതായും പരാതിയില്‍ പറയുന്നു. തുടര്‍ന്ന് വിവരം മാതാപിതാക്കളെ അറിയിച്ച യുവതി പൊലീസില്‍ പരാതി നല്‍കുകയായിരുന്നു.
https://www.facebook.com/Malayalivartha
