കൊവിഡിനെ കുറിച്ച് ഭീതി പടർത്തുന്ന വ്യാജവാർത്തകൾ പ്രാദേശികമായി പരക്കുകയാണ്. ഇത് പ്രതിരോധ പ്രവർത്തനങ്ങളെ ബാധിക്കുന്നുവെന്നും മന്ത്രി ഇ പി ജയരാജൻ പറഞ്ഞു. വിദേശത്ത് നിന്നും നാട്ടിലെത്തിയ ആളുകളെക്കുറിച്ചായിരുന്നു വാട്സാപ്പ് ഗ്രൂപ്പുകളിൽ തെറ്റായ വാർത്തകൾ പരന്നത്. സോഷ്യൽ മീഡിയയിൽ കള്ളം പ്രചരിപ്പിക്കുന്നവർ‍‍ ജയിലിൽ പോകേണ്ടിവരുമെന്നും മന്ത്രി ഇപി ജയരാജൻ അറിയിക്കുകയുണ്ടായി. കണ്ണൂർ പെരിങ്ങോത്തെ കൊവിഡ് രോഗി ആദ്യം ചെന്നത് പയ്യന്നൂരിലെ ഡോക്ടറുടെ അടുത്തേക്കായിരുന്നു. ജനകീയ ഡോക്ടറായ ഇദ്ദേഹം ദിവസവും നൂറിലേറെ പേരെ പരിശോധിക്കുന്നയാളായിരുന്നു . ഡോക്ടർക്കും രോഗം സ്ഥിരീകരിച്ചെന്ന വ്യാജ വാർത്ത പരന്നതോടെ പയ്യന്നൂരിലെ ജനങ്ങൾ പരിഭ്രാന്തിയിലാക്കിയിരുന്നു .

കൊവിഡ് രോഗിയുടെ ബന്ധു രാമന്തളിയിൽ എത്തിയിരുന്നു എന്നായിരുന്നു വാട്സാപ്പിൽ പ്രചരിച്ച മറ്റൊരു വ്യാജ വാർത്ത. ഇതോടെ രാമന്തളിയിൽ ആളുകൾ പുറത്തിറങ്ങാൻ ഭയക്കുന്നുണ്ട്. പഴങ്ങാടി ഏഴോത്ത് ഗൾഫിൽ നിന്നെത്തിയ നിരീക്ഷണത്തിൽ കഴിയുന്ന ആൾക്ക് രോഗം സ്ഥിരീകരിച്ച് കഴിഞ്ഞു. ഇത്തരത്തിൽ തെറ്റായ വാർത്ത പ്രചരിച്ചതോടെയാണ് സമീപവാസികൾ കൂട്ടത്തോടെ ആശുപത്രിയിലേക്ക് ഓടിയത്. ഇതിനിടയിൽ തലശ്ശേരിയിൽ കൊറോണ സ്ഥിരീകരിച്ചു എന്ന് ഓഡിയോ സന്ദേശം പ്രചരിക്കുകയും ചെയ്തു. ഇതും വലിയൊരു ഭയത്തിന് വഴി മാറിയിരുന്നു. ഈ ആശങ്കകളെല്ലാം ജില്ലാതല അവലോകന യോഗത്തിൽ പഞ്ചായത്ത് പ്രതിനിധികൾ ഉന്നയിച്ചെന്നും മന്ത്രി ഇ പി ജയരാജന്‍ വ്യക്തമാക്കി. വിദേശത്ത് നിന്നും വന്നയാൾക്ക് രോഗം സ്ഥിരീകരിച്ച് കഴിഞ്ഞിരുന്നു എന്ന പ്രചാരണത്തിൽ പരിയാരത്ത് ഒരാൾക്കെതിരെ പൊലീസ് കേസെടുത്തു . എല്ലാ പൊലീസ് സ്റ്റേഷനിലും പ്രത്യേക സംഘം സോഷ്യൽ മീഡിയ നിരീക്ഷിക്കുന്നുണ്ട് എന്ന കാര്യം മറക്കരുത്.