ഭര്‍ത്താവിന് കൊറോണ സ്ഥിരീകരിച്ചതോടെ സമ്പർക്ക വിലക്ക് ഏര്‍പ്പെടുത്തിയ യുവതി ആരോഗ്യപ്രവര്‍ത്തകരുടെ കണ്ണ് വെട്ടിച്ച്‌ കടന്നു കളഞ്ഞു. മധുവിധു ആഘോഷിച്ച്‌ ഇറ്റലിയില്‍ നിന്ന് തിരിച്ചെത്തിയ ഇവര്‍ മാര്‍ച്ച്‌ 8നാണ് ബംഗളൂരുവില്‍ നിന്ന് ന്യൂഡല്‍ഹിയിലേയ്ക്കും അവിടെ നിന്ന് ആഗ്രയിലേയ്ക്ക് ട്രെയിനിലും സഞ്ചരിച്ചത്. ഫെബ്രുവരി 27നാണ് ഇവര്‍ തിരിച്ചെത്തിയത്. ബംഗളൂരുവില്‍ എത്തിയ ദമ്പതികളിൽ  നേരത്തെ തന്നെ കൊറോണ ലക്ഷണങ്ങള്‍ പ്രകടമായിരുന്നു.

തുടര്‍ന്നാണ് ഭാര്യയ്ക്ക് സമ്പർക്ക വിലക്ക് ഏർപ്പെടുത്തിയത്. ഭർത്താവിന് രോഗം സ്ഥിരീകരിച്ചതോടെ മാര്‍ച്ച്‌ 12ന് നടത്തിയ പരിശോധനയില്‍ ഭാര്യക്കും രോഗം സ്ഥിരീകരിക്കുകയും ചെയ്തു. ഒറ്റയ്ക്ക് താമസിക്കണമെന്ന ആരോഗ്യ പ്രവര്‍ത്തകരുടെ ആവശ്യവും ഇവർ നിരസിച്ചു. തുടര്‍ന്ന് കളക്ടര്‍ പ്രശ്നത്തില്‍ ഇടപെടുകയും പോലീസിനെ വിളിക്കുകയും ചെയ്തപ്പോഴാണ് ഇവര്‍ ആരോഗ്യ പ്രവര്‍ത്തകരോട് സഹകരിക്കാന്‍ ഒരുങ്ങിയത്.

ആരോഗ്യ പ്രവര്‍ത്തകര്‍ വീട്ടിലെത്തിയപ്പോള്‍ റെയില്‍വേയില്‍ എഞ്ചിനീയറായ യുവതിയുടെ അച്ഛന്‍ സഹകരിക്കാന്‍ തയ്യാറായില്ലെന്ന് മെഡിക്കല്‍ ഓഫീസര്‍ പറയുന്നു. മകള്‍ ബംഗളൂരുവിലാണെന്ന് പ്രവര്‍ത്തകരോട് കള്ളം പറയുകയും ചെയ്തു. കളക്ടര്‍ ഇടപെട്ടശേഷമാണ് വീട് പരിശോധിച്ചത്. യുവതിയെ ഇപ്പോള്‍ ഐസൊലേഷന്‍ വാര്‍ഡില്‍ പ്രവേശിപ്പിച്ചിരിക്കുകയാണ്. വീട്ടിലെ മറ്റ് അംഗങ്ങളും ആശുപത്രിയില്‍ നിരീക്ഷണത്തിലാണെന്ന് അധികൃതര്‍ വ്യക്തമാക്കി.