1750 കിലോ പഴകിയ മത്സ്യം വില്‍പനയ്ക്കിടെ പിടിച്ചെടുത്തു
പത്തനംതിട്ട ജില്ലയില്‍ കൊറോണ രോഗദുരിത കാലത്ത് പഴകിയ മത്സ്യത്തിന്റെ വില്‍പന വര്‍ധിക്കുന്നെന്ന പരാതിയെ തുടര്‍ന്ന് കടമ്പനാട് പഞ്ചായത്തില്‍ നടത്തിയ പരിശോധനയില്‍ 1750 കിലോ പഴകിയ മത്സ്യം പിടിച്ചെടുത്ത് നശിപ്പിച്ചു.
മണ്ണടി താഴത്ത് ജംക്ഷനില്‍ 2 വാഹനങ്ങളില്‍ നിന്നായാണ് മത്സ്യം പിടിച്ചെടുത്തത്. ഇത് കുഴിയെടുത്ത് മൂടി.
പഞ്ചായത്ത് ആരോഗ്യ വകുപ്പ്, ഭക്ഷ്യ സുരക്ഷാ വകുപ്പ്, ജില്ലാ പൊലീസ് മേധാവിയുടെ സ്‌ക്വാഡ് എന്നിവ ചേര്‍ന്നാണ് പരിശോധന നടത്തിയത്.
ജില്ലാ മെഡിക്കല്‍ ഓഫിസറുടെ നിര്‍ദേശ പ്രകാരം കഴിഞ്ഞ ദിവസം മുതല്‍ പഞ്ചായത്ത് ആരോഗ്യ വകുപ്പിന്റെ നേതൃത്വത്തില്‍ വിവിധയിടങ്ങളില്‍ പരിശോധന തുടങ്ങിയിരുന്നു.
പഴകിയ മല്‍സ്യം വിറ്റവരില്‍ നിന്നും പഞ്ചായത്ത് പിഴ ഈടാക്കിയെന്നും ആരോഗ്യ വകുപ്പിന്റെയും ഭക്ഷ്യ സുരക്ഷാ വകുപ്പിന്റെയും നേതൃത്വത്തില്‍ മറ്റു നടപടികള്‍ സ്വീകരിക്കുമെന്നും പഞ്ചായത്ത് പ്രസിഡന്റ് എ.ആര്‍.അജീഷ് കുമാര്‍ പറഞ്ഞു.
കല്ലുകുഴി, നെല്ലിമുകള്‍, തുവയൂര്‍ എന്നിവിടങ്ങളിലും പരിശോധന നടത്തി പഴകിയ മത്സ്യം പിടിച്ചെടുത്ത് നശിപ്പിച്ചതായി ഹെല്‍ത്ത് ഇന്‍സ്‌പെക്ടര്‍ സുരേഷ് കുഴിവേലി പറഞ്ഞു.
https://www.facebook.com/Malayalivartha
