ലോക്ക് ഡൗണ്‍ ആരംഭിച്ചത് മുതല്‍ അതിഥി തൊഴിലാളികള്‍ക്ക് സര്‍ക്കാര്‍ പ്രഖ്യാപിച്ച മുഴുവന്‍ ആനുകൂല്യങ്ങളും എത്തിക്കുന്നുണ്ടെന്ന് പോലീസും റവന്യൂവകുപ്പും! രാഹുല്‍ ഗാന്ധിയുടെ മണ്ഡലത്തില്‍ അതിഥി തൊഴിലാളികള്‍ പട്ടിണിയില്‍, ഭക്ഷണമെത്തിച്ചത് സേവാഭാരതിയെന്ന് രാജ്യമൊട്ടാകെ പ്രചാരണം... പിന്നിൽ സംഭവിച്ചതിനെക്കുറിച്ച് തുറന്ന് പറഞ്ഞ് തൊഴിലാളികൾ
രാഹുല്‍ ഗാന്ധിയുടെ വയനാട് മണ്ഡലത്തിന്റെ പലഭാഗങ്ങളിലും അതിഥി തൊഴിലാളികള്‍ പട്ടിണിയിലെന്ന് ദേശീയ തലത്തില്‍ വ്യാജപ്രചരണം അഴിച്ചുവിട്ട് ചിലര്‍. ജാര്‍ഖണ്ഡ്, ഛത്തീസ്ഗഢ്, ആസാം, പശ്ചിമ ബംഗാള്‍ എന്നിവിടങ്ങളില്‍ നിന്നായി 41 അതിഥിതൊഴിലാളികളാണ് മലപ്പുറം ഇരിങ്ങാട്ടേരിയിലെ ലോഡ്ജില്‍ കഴിയുന്നത്.
ഈ തൊഴിലാളികളുടെ പട്ടിണി വാര്‍ത്തയറിഞ്ഞ് മന്ത്രി സ്മൃതി ഇറാനിയുടെ ഇടപെടലിനെ തുടര്‍ന്നെന്ന പേരില്‍ സേവാഭാരതി പ്രവര്‍ത്തകര്‍15 കിലോ അരിയടങ്ങിയ കിറ്റ് ലോഡ്ജിലെത്തിക്കുകയും ചെയ്തു. ഈ കിറ്റ് വിതരണത്തിനിടെ പകര്‍ത്തിയ ദൃശ്യങ്ങള്‍ സഹിതം രാഹുല്‍ ഗാന്ധി എംപിയുടെ മണ്ഡലത്തില്‍ അതിഥി തൊഴിലാളികള്‍ ഭക്ഷണം കിട്ടാതെ ദുരിതം അനുഭവിക്കുകയാണെന്ന പേരില്‍ ഇതര സംസ്ഥാനങ്ങളില്‍ സമൂഹമാധ്യമങ്ങള്‍ വഴി വ്യാജപ്രചരണം നടത്തിയെന്നാണ് ഇപ്പോള്‍ ഉയര്‍ന്നിരിക്കുന്ന ആരോപണം.
വ്യാജ പ്രചാരണം ശ്രദ്ധയില്‍ പെട്ടതോടെ ഇതിനെതിരെ പഞ്ചായത്ത് രംഗത്തെത്തി. അതിഥി തൊഴിലാളികള്‍ക്ക് ആവശ്യമായ ഭക്ഷണസാധനങ്ങള്‍ കെട്ടിട ഉടമയും ഏജന്റും സ്ഥലത്തെ പഞ്ചായത്ത് മെമ്ബര്‍ ഉള്‍പ്പെടെയുള്ള ജനപ്രതിനിധികളും എത്തിച്ചുനല്‍കുന്നുണ്ട്.
അരി, തക്കാളി, ഉള്ളി മുതലായ എല്ലാ സാധനങ്ങളും അതിഥി തൊഴിലാളികളുടെ താമസ സ്ഥലത്ത് ഉണ്ടെന്നും കെട്ടിട ഉടമ സൗജന്യമായി താമസ സൗകര്യം ഒരുക്കുകയാണെന്നുമാണ് വിവരം. ഇവരുമായി പല തവണ ഇക്കാര്യങ്ങള്‍ ചര്‍ച്ച ചെയ്തതാണെന്നും നിലവില്‍ അതിഥി തൊഴിലാളികള്‍ക്ക് ഭക്ഷണത്തിനൊ താമസത്തിനൊ പ്രശ്‌നങ്ങളില്ലെന്നും പഞ്ചായത്ത് പ്രസിഡന്റ് പി ഷൗക്കത്തലി വ്യക്തമാക്കി.
ലോക്ക് ഡൗണ്‍ ആരംഭിച്ചത് മുതല്‍ അതിഥി തൊഴിലാളികള്‍ക്ക് സര്‍ക്കാര്‍ പ്രഖ്യാപിച്ച മുഴുവന്‍ ആനുകൂല്യങ്ങളും എത്തിക്കുന്നുണ്ടെന്ന് പോലീസും റവന്യൂവകുപ്പും അറിയിച്ചു.
വില്ലേജിന്റെ നേതൃത്വത്തില്‍ സൗജന്യ കിറ്റും വിതരണം ചെയ്തതായും ഈ കാര്യങ്ങളെല്ലാം അന്വേഷിച്ച്‌ ബോധ്യപ്പെട്ടതാണെന്നും സിഐ എ സജിത്ത് വെളിപ്പെടുത്തിയതായി സ്വകാര്യ ചാനല്‍ റിപ്പോര്‍ട്ട് ചെയ്യുന്നു. പ്രചാരണം തെറ്റാണെന്ന് അതിഥി തൊഴിലാളികളും വെളിപ്പെടുത്തി.
https://www.facebook.com/Malayalivartha
