സംസ്ഥാനത്ത് ലോക്ക്ഡൗണില്‍ കണ്ണട ഷോപ്പുകള്‍ ആഴ്ചയില്‍ ഒരു ദിവസം തുറക്കാന്‍ അനുമതി
കോവിഡ് 19 പ്രതിരോധനത്തിന്റെ പശ്ചാത്തലത്തില്‍ സംസ്ഥാനത്തെ ലോക്ക് ഡൗണ്‍ നിയന്ത്രണങ്ങളില്‍ കണ്ണട ഷോപ്പുകള്‍ക്ക് ഇളവ് നല്‍കുമെന്ന് മുഖ്യമന്ത്രി പിണറായി വിജയന്. ആഴ്ചയില്‍ ഒരു ദിവസം കണ്ണട ഷോപ്പുകള്‍ തുറക്കാന്‍ അനുമതി നല്‍കുമെന്ന് മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. കണ്ണട ഉപയോഗിക്കുന്നവര്‍ക്കായി ഷോപ്പുകള്‍ തുറക്കാത്തതിനാല്‍ ബുദ്ധിമുട്ടുണ്ടെന്ന് ശ്രദ്ധയില്‍പ്പെട്ടതോടെയാണ് ഇളവ് അനുവദിച്ചത്. കേബിള്‍ ടിവി ഓപ്പറേറ്റര്‍മാര്‍ക്ക് കെ.എസ്.ഇ.ബിക്ക് നല്‍കുന്ന വാടകയില്‍ ഇളവ് അനുവദിച്ചിട്ടുണ്ട്. ഏപ്രില്‍, മെയ്, ജൂണ്‍ മാസങ്ങളിലെ വാടക പലിശ ഇല്ലാതെ ജൂണ്‍ 30 വരെ നല്‍കാം.
കംപ്യൂട്ടര്‍, സ്‌പെയര്‍പാര്‍ട്‌സ്, മൊബൈല്‍ ഷോപ്പുകള്‍, മൊബൈല്‍ റീചാര്‍ജ് സെന്ററുകള്‍ എന്നിവയ്ക്ക് ആഴ്ചയില്‍ ഒരു ദിവസം തുറന്നു പ്രവര്‍ത്തിക്കാന്‍ ഇന്നലെ അനുമതി നല്‍കിയിരുന്നു. മൊബൈല്‍ ഷോപ്പുകള്‍ക്ക് ഞായറാഴ്ചയും വര്‍ക്ക് ഷോപ്പുകള്‍ക്ക് ഞായര്‍, വ്യാഴം ദിവസങ്ങളില്‍ തുറക്കാം. ഇവയുടെ പ്രവര്‍ത്തത്തിനായി ഈ ദിവസങ്ങളില്‍ സ്‌പെയര്‍ പാര്‍ട്‌സ് കടകള്‍ക്കും തുറക്കാന്‍ അനുമതിയുണ്ട്.
ഇലക്ട്രീഷ്യന്‍മാര്‍ക്ക് റിപ്പയറിംഗിനായി വീടുകളില്‍ പോകാന്‍ അനുമതി നല്‍കിയിട്ടുണ്ട്. ഫ്‌ലാറ്റുകളിലെ കേന്ദ്രീകൃത സംവിധാനങ്ങളുടെ പ്രവര്‍ത്തനങ്ങള്‍ക്ക് പോകുന്നതിനും അനുമതിയുണ്ട്. ഫാന്‍, എയര്‍ കണ്ടീഷണര്‍ എന്നിവ വില്‍ക്കുന്ന കടകളും ബാര്‍ബര്‍ ഷോപ്പുകളും ഒരു ദിവസം തുറക്കുന്ന കാര്യവും പരിഗണിക്കുമെന്ന് മുഖ്യമന്ത്രി ഇന്നലെ പറഞ്ഞിരുന്നു.
https://www.facebook.com/Malayalivartha
