ഓപ്പറേഷന്‍ സാഗര്‍ റാണിയുടെ ഭാഗമായി ഭക്ഷ്യസുരക്ഷാ വകുപ്പ് ഫിഷറീസ് വകുപ്പുമായി ചേര്‍ന്ന് ജില്ലയുടെ വിവിധ ഭാഗങ്ങളില്‍ നടത്തിയ പരിശോധനയില്‍ ഇടുക്കി ജില്ലയില്‍ നിന്നും കഴിഞ്ഞ 5 ദിവസത്തിനിടെ പിടികൂടിയത് 172 കിലോ പഴകിയ മീന്‍. ഫോര്‍മലിന്‍ കലര്‍ത്തിയ 20 കിലോ മീനും പരിശോധനയില്‍ പിടികൂടി നശിപ്പിച്ചു. ആകെ 28 കടകളില്‍ പരിശോധന നടത്തി. ഇതില്‍ 8 കടകളില്‍ നിന്നു പഴകിയ മീനും ഒരു കടയില്‍ നിന്നു ഫോര്‍മലിന്‍ കലര്‍ത്തിയ മീനും പിടികൂടി.

പഴകിയതോ രാസവസ്തുക്കള്‍ കലര്‍ത്തിയതോ ആയ മീന്‍ വില്‍പന നടത്തുന്നതായി കണ്ടെത്തിയാല്‍ കട അടപ്പിക്കുന്നത് ഉള്‍പ്പെടെ ശക്തമായ നടപടി സ്വീകരിക്കാനാണു തീരുമാനം. കേര, ചൂര ഇനങ്ങളില്‍പെട്ട മീനുകളാണു കൂടുതലും മോശമായ നിലയില്‍ വില്‍പനയ്ക്ക് ഉണ്ടായിരുന്നതെന്ന് അധികൃതര്‍ പറഞ്ഞു. കടയുടമകള്‍ക്കു കര്‍ശന നിര്‍ദേശങ്ങളും മുന്നറിയിപ്പും നല്‍കി.

മീന്‍ വാങ്ങുമ്പോള്‍ രക്തവര്‍ണത്തിലുള്ള ചെകിളപ്പൂവാണെങ്കില്‍ മീന്‍ നല്ലതാണെന്ന് ഉറപ്പിക്കാം. നല്ല മീനാണെങ്കില്‍ തെളിഞ്ഞ വൃത്താകൃതിയിലുള്ള കണ്ണുകള്‍ ആയിരിക്കും. പഴകിയ മീനിന്റെ കണ്ണുകള്‍ കുഴിഞ്ഞതും നീല നിറമുള്ളതും ആയിരിക്കും. നല്ല മീനില്‍ നിന്നു കടുത്ത നിറത്തില്‍ ചോര വരും. ഇത്തരം മീനില്‍ കൈ കൊണ്ട് അമര്‍ത്തിയാല്‍ നല്ല ദൃഢത ഉണ്ടാകും. രാസവസ്തുക്കള്‍ ഉപയോഗിച്ചിട്ടുണ്ടെങ്കില്‍ മീനിന്റെ ഗന്ധത്തില്‍ വ്യത്യാസമുണ്ടാകും.

ജില്ലയിലെ മത്സ്യ വില്‍പന കേന്ദ്രങ്ങളില്‍ ലോക്ഡൗണിന്റെ പശ്ചാത്തലത്തില്‍ പരിശോധന ശക്തമാക്കിയതായി ഇടുക്കി അസി. ഫുഡ് സേഫ്റ്റി കമ്മിഷണര്‍ ബെന്നി ജോസഫ് പറഞ്ഞു. പഴകിയ മീന്‍, വില്‍പനയ്ക്ക് എത്തുന്ന സാഹചര്യത്തില്‍ ആളുകള്‍ മീന്‍ വാങ്ങുമ്പോള്‍ പ്രത്യേകം ശ്രദ്ധിക്കണം. വരും ദിവസങ്ങളിലും ജില്ലയില്‍ പരിശോധന തുടരും. പഴകിയതോ രാസവസ്തുക്കള്‍ കലര്‍ത്തിയതോ ആയ മത്സ്യം വില്‍ക്കുന്നവര്‍ക്കെതിരെ കര്‍ശന നടപടി സ്വീകരിക്കും.

പഴകിയ മീന്‍ വില്‍ക്കുന്നതായി ശ്രദ്ധയില്‍പെട്ടാല്‍ താഴെപ്പറയുന്ന ഫോണ്‍ നമ്പറുകളില്‍ അറിയിക്കാം

ഇടുക്കി അസി. ഫുഡ് സേഫ്റ്റി കമ്മിഷണര്‍- 89433 46186

തൊടുപുഴ സര്‍ക്കിള്‍ ഫുഡ് സേഫ്റ്റി ഓഫിസര്‍- 89433 46544

ദേവികുളം സര്‍ക്കിള്‍ ഫുഡ് സേഫ്റ്റി ഓഫിസര്‍- 89433 46546

പീരുമേട് സര്‍ക്കിള്‍ ഫുഡ് സേഫ്റ്റി ഓഫിസര്‍- 89433 46545

ഉടുമ്പന്‍ചോല സര്‍ക്കിള്‍ ഫുഡ് സേഫ്റ്റി ഓഫിസര്‍-75938 73304

ഇടുക്കി സര്‍ക്കിള്‍ ഫുഡ് സേഫ്റ്റി ഓഫിസര്‍- 75938 7330