കോവിഡ് പ്രതിരോധ പ്രവർത്തനങ്ങളിൽ കേരളം മുന്നേറുകയാണ്.ഈ സമയത്തു ഏറ്റവും അഭിനന്ദനവും പിന്തുണയും അർഹിക്കുന്ന ഒരു വിഭാഗമാണ് നമ്മുടെ ആരോഗ്യ പ്രവർത്തകർ.കോവിഡിനെ പിടിച്ചുകെട്ടാൻ അവർ നടത്തുന്ന ശ്രമങ്ങളും സഹിക്കുന്ന ത്യാഗങ്ങളും ചെറുതല്ല .ഇപ്പോഴിതാ കേരളത്തിൽ എവിടെ വേണമെങ്കിലും കോവിഡ് ബാധിതരെ ചികിത്സിക്കാൻ തയ്യാറാണെന്ന് പീരുമേട് സ്വദേശിനി പാപ്പാ ഹെൻ‌റി പറയുന്നു. ആരാണ് ഈ പാപ്പാ ഹെൻറി എന്നല്ലേ? . കോവിഡിനെതിരേ സന്ധിയില്ലാ പോരാട്ടം പ്രഖ്യാപിച്ച കേരളത്തിന്റെ മുൻനിര പോരാളികളിലൊരാളാണ് കോട്ടയം മെഡിക്കൽ കോളേജിലെ നഴ്സായ പാപ്പാ ഹെൻ‌റി.

ആരോഗ്യമന്ത്രിയും മുഖ്യമന്ത്രിയും അഭിനന്ദിച്ചതിനുപിന്നാലെ, സാമൂഹികമാധ്യമങ്ങളിലും താരമാണവർ ഇപ്പോൾ. ആരോഗ്യ മന്ത്രിയുമായി നടത്തിയ വീഡിയോ കൂടിക്കാഴ്ചയിലാണ് ഇവർ തന്റെ സേവനസന്നദ്ധത അറിയിച്ചത്. കോട്ടയം മെഡിക്കൽ കോളേജിൽനിന്ന് കോവിഡ് രോഗികളൊഴിഞ്ഞ സാഹചര്യത്തിൽ കാസർകോട് അടക്കം കേരളത്തിൽ എവിടെയും ജോലിചെയ്യാൻ താനും സഹപ്രവർത്തകരും സന്നദ്ധരാണെന്ന്‌ പാപ്പാ ആരോഗ്യമന്ത്രിയെ അറിയിച്ചു.

പഴയ പാമ്പനാർ സ്വദേശിനിയായ ഇവർ 2017 മുതൽ കോട്ടയം മെഡിക്കൽ കോളേജ് ആശുപത്രിയിൽ സ്റ്റാഫ് നഴ്സാണ്. മെഡിക്കൽ കോളേജിൽ ഐസൊലേഷൻ വാർഡ്‌ തുടങ്ങിയപ്പോൾ മുതൽ ഇരുപതുപേരുൾപ്പെട്ട സംഘത്തി‍ൽ പാപ്പായുമുണ്ട്. ഇരുപതുദിവസം സേവനത്തിനുശേഷം വീട്ടിൽ നിരീക്ഷണത്തിലായിരുന്നു. നിരീക്ഷണ കാലാവധി തീർന്നതോടെ വീണ്ടും ജോലിക്കെത്തി.

തൃശ്ശൂർ മെഡിക്കൽകോളേജ്, പീരുമേട് താലൂക്കാശുപത്രി, വണ്ടിപ്പെരിയാർ, കുമളി പ്രാഥമികാരോഗ്യകേന്ദ്രങ്ങൾ എന്നിവിടങ്ങളിലും സേവനമനുഷ്ഠിച്ചിട്ടുണ്ട്. ഭർത്താവ്‌ ഹെൻ‌റി പീരുമേട് പോലീസ് സ്റ്റേഷനിൽ ഡ്രൈവറാണ്. അനന്യ, അനൻ എന്നിവരാണ് മക്കൾ.

ഇത് പപ്പാ ഹെൻട്രിയെന്ന ഒരു ആരോഗ്യപ്രവർത്തകയുടെ മാത്രം കഥയല്ല. കേരളത്തിലെ ആരോഗ്യ രംഗത്ത് പ്രവർത്തിക്കുന്ന നമ്മുടെ ആരോഗ്യ പ്രവർത്തകർ എല്ലാവരും പാപ്പാ ഹെൻട്രിയുടെ അതെ മനോഭാവമുള്ളവരായതുകൊണ്ട് മാത്രമാണ് കേരളത്തിൽ കോവിഡ് -19 എന്ന മഹാമാരിയെ ഒരു പരിധിവരെ എങ്കിലും തടഞ്ഞു നിർത്താൻ നമുക്കു സാധിക്കുന്നതും. മറ്റുള്ളവര്‍ക്ക് വേണ്ടി സ്വന്തം ജീവന്‍ പണയം വെച്ച് പോരാടുകയാണ് നമ്മുടെ ആരോഗ്യ പ്രവര്‍ത്തകര്‍.കൊവിഡ് രോഗികളുടെ പരിചരണത്തിന് രാപ്പകലില്ലാതെ ജോലി ചെയ്യുന്നവർ .അതുകൊണ്ടുതന്നെയാണ് ഈ മഹാമാരിയുടെ മുന്നിൽ നമ്മൾ തോറ്റുപോകില്ലെന്ന ആത്മവിശ്വാസത്തോടെ നമുക്കുമുന്നേറാൻ സാധിക്കുന്നതും.