വയനാട് ജില്ലാ ആശുപത്രിയുടെ അങ്കണം ഇന്നലെ സാക്ഷ്യം വഹിച്ചത് പലകാര്യങ്ങളിലും പിന്നാക്കമായ വയനാടിന് ഓര്‍മകളില്‍ സൂക്ഷിക്കാനും എന്നും അഭിമാനിക്കാനും കഴിയുന്ന നിമിഷങ്ങള്‍ക്കാണ്.

കോവിഡ് ആശുപത്രിയായി മാറ്റിയ ജില്ലാ ആശുപത്രിയില്‍ ഏറെ ദിനങ്ങള്‍ക്കു ശേഷം ഭീതിയുടെ കാര്‍മേഘങ്ങള്‍ അകന്ന് സന്തോഷ അന്തരീഷം! ജീവന്‍മരണ പോരാട്ടത്തില്‍ വയനാടിനെ നയിക്കുന്ന 3 വനിതകള്‍; കലക്ടറും ജില്ലാ പഞ്ചായത്ത് പ്രസിഡന്റും ഡിഎംഒയും വിഷുക്കൊന്നപ്പൂക്കുലകള്‍ കൈകളില്‍ കരുതി രോഗ വിമുക്തരായവരെ കാത്തുനിന്നു.

ഇന്നലെ ഉച്ചയ്ക്ക് 12.20-നാണ് കോവിഡ് പോസറ്റീവായി ചികിത്സയിലായിരുന്ന കണിയാമ്പറ്റ പഞ്ചായത്തിലെ കമ്പളക്കാട് സ്വദേശി അബ്ദുല്‍ റസാഖ്, തൊണ്ടര്‍നാട് പഞ്ചായത്തിലെ കുഞ്ഞോം സ്വദേശി ആലിക്കുട്ടി എന്നിവര്‍ ജില്ലാ ആശുപത്രിയിലെ കോവിഡ് വാര്‍ഡിന് പുറത്തെത്തിയത്. ഒ.ആര്‍. കേളു എംഎല്‍എ, ജില്ലാ പഞ്ചായത്ത് പ്രസിഡന്റ് കെ.ബി. നസീമ, കലക്ടര്‍ ഡോ. അദീല അബ്ദുല്ല, ജില്ലാ മെഡിക്കല്‍ ഓഫിസര്‍ ഡോ. ആര്‍. രേണുക, മാനന്തവാടി നഗരസഭാ അധ്യക്ഷന്‍ വി.ആര്‍. പ്രവീജ്, ജില്ലാ പഞ്ചായത്ത് സ്ഥിരം സമിതി അധ്യക്ഷ എ. ദേവകി, മാനന്തവാടി നഗരസഭാ അധ്യക്ഷന്‍ വി.ആര്‍. പ്രവീജ്, സ്ഥിരം സമിതി അധ്യക്ഷന്‍ പി.ടി. ബിജു എന്നിവരുടെ നേതൃത്വത്തിലായിരുന്നു യാത്രയയപ്പ്. മരണമുഖത്ത് നിന്ന് തിരിച്ചെത്തിയതിന്റെ സന്തോഷത്തില്‍ ഇരുവരും എല്ലാവര്‍ക്കും നന്ദി പറഞ്ഞു. ഇരുവരെയും തിരികെ വീടുകളില്‍ എത്തിക്കാനായി 2 ആംബുലന്‍സുകള്‍ നേരത്തെ ഒരുക്കി നിര്‍ത്തിയിരുന്നു.

കോവിഡ് വാര്‍ഡായി മാറ്റിയ സര്‍ജിക്കല്‍ വാര്‍ഡില്‍ നിന്ന് രോഗവിമുക്തരായവര്‍ക്ക് ഒപ്പം പുറത്തെത്തിയ ഡോക്ടര്‍മാരെയും ജീവനക്കാരെയും കൈയ്യടിച്ചാണ് ജനപ്രതിനിധികള്‍ വരവേറ്റത്.

ജില്ലാ ആശുപത്രി സൂപ്രണ്ട് എ.പി. ദിനേശ് കുമാര്‍, ജില്ലാ കോവിഡ് നോഡല്‍ ഓഫിസര്‍ ഡോ. ചന്ദ്രശേഖരന്‍, ജില്ലാ ആശുപത്രി ഡപ്യൂട്ടി സൂപ്രണ്ട് ഇന്‍ ചാര്‍ജ് ഡോ. കെ. സുരേഷ്, ആര്‍എംഒ ഡോ സി. സക്കീര്‍, ജില്ലാ ആശുപത്രി കോവിഡ് നോഡല്‍ ഓഫിസര്‍ ഡോ. രത്‌നവല്ലി തുടങ്ങിയവരുടെ നേതൃത്വത്തില്‍ വിപുലമായ ഒരുക്കങ്ങളാണ് കോവിഡ് ചികിത്സക്കായി ഒരുക്കിയിരുന്നത്.

രോഗം കണ്ടെത്തിയ 3-ല്‍ 2 പേരും മടങ്ങി. അവശേഷിക്കുന്ന മൂപ്പൈനാട് സ്വദേശിക്കും ഉടന്‍ ആശുപത്രി വിടാന്‍ കഴിയുമെന്ന പ്രതീക്ഷയിലാണ് ആരോഗ്യ വകുപ്പ്. രോഗ വ്യാപനം തടയാനായതും പെട്ടെന്ന് തന്നെ രോഗബാധിതരെ സാധാരണ ജീവിതത്തിലേക്ക് മടക്കി കൊണ്ടുവരാനായതും ജില്ലാ ഭരണകൂടത്തിന്റെയും ആരോഗ്യ വകുപ്പിന്റെയും നേട്ടമായി. ഇനി നെടുങ്കരണ സ്വദേശി മാത്രമേ കോവിഡ് ബാധിച്ച് ചികിത്സയിലുള്ളൂ. ഇദ്ദേഹത്തിന്റെ ആരോഗ്യനില മെച്ചപ്പെട്ടുവരികയാണെന്ന് അധികൃതര്‍ പറഞ്ഞു. അടുത്ത ദിവസങ്ങളില്‍ ഇദ്ദേഹത്തിന് ആശുപത്രി വിടാന്‍ കഴിയുമെന്ന് ആരോഗ്യവകുപ്പ് പ്രത്യാശ പ്രകടിപ്പിച്ചു.

അതിനിടെ വയനാടിന്റെ കരുതലിലും സംരക്ഷണത്തിലും ജില്ലയിലെ കോവിഡ് കെയര്‍ സെന്ററുകളില്‍ കഴിഞ്ഞിരുന്ന മറ്റുജില്ലകളിലെ 125 പേര്‍ സ്വന്തം വീടുകളിലെത്തി. ജില്ലയിലെ കോവിഡ് കെയര്‍ സെന്ററുകളില്‍ 14 ദിവസത്തെ നീരിക്ഷണത്തിനു ശേഷമാണ് നിറഞ്ഞ മനസോടെ അവര്‍ വയനാടിനോട് യാത്ര പറഞ്ഞത്.

സ്വന്തം വാഹനമില്ലാത്ത മലപ്പുറം, കോഴിക്കോട് ജില്ലകളിലുളള 46 പേരെ രണ്ട് കെഎസ്ആര്‍ടിസി ബസുകളിലായും മറ്റുളളവരെ പ്രത്യേകം ഒരുക്കിയ ടാക്സി വാഹനങ്ങളിലുമായാണ് യാത്രയാക്കിയത്. കഴിഞ്ഞ ദിവസം 109 പേര്‍ വീടുകളിലേക്ക് മടങ്ങിയിരുന്നു. ബാക്കിയുള്ളവര്‍ ഇന്നലെയാണ് മടങ്ങിയത്.