കാസര്‍കോഡ് 10 വീടുകള്‍ വീതം കേന്ദ്രീകരിച്ച് പൊലീസ് കാവല്‍ , ഏഴിടങ്ങളില്‍ ട്രിപ്പിള്‍ ലോക്ഡൗണ്‍
സമ്പര്‍ക്കത്തിലൂടെ കോവിഡ് ഏറെ വ്യാപിച്ച കാസര്‍കോടിന്റെ പ്രദേശങ്ങളില്‍ പുറത്തിറങ്ങുന്നവരെ പിടിച്ചു കെട്ടാനായി ട്രിപ്പിള്‍ ലോക്ക്ഡൗണുമായി പൊലീസ്. ആവശ്യപ്പെട്ടാല്‍ ഭക്ഷണസാധനങ്ങളും മരുന്നുകളും ഈ സ്ഥലങ്ങളിലുള്ളവര്‍ക്ക് പൊലീസ് തന്നെ വീട്ടിലെത്തിക്കും. ഇവിടെ ഇനി ആളുകള്‍ വാഹനങ്ങളില്‍ കറങ്ങി നടക്കുന്നത് കണ്ടാല്‍ പൊലീസിന്റെ മുന്നില്‍പെട്ടാല്‍ അകത്താവും.
കോവിഡ്-19 നിയന്ത്രണ മേഖലകളില്‍ ജില്ലയില്‍ പൊലീസിന്റെ ഡബിള്‍ ലോക്ഡൗണ്‍ നേരത്തേ തന്നെ ന്‌ലവിലുണ്ടായിരുന്നു. അതിനു പിന്നാലെയാണ് ട്രിപ്പിള്‍ ലോക്ഡൗണ്‍ ഏര്‍പ്പെടുത്തിയത്. പള്ളിക്കര, ഉദുമ, ചെമ്മനാട്, ചെങ്കള, മധൂര്‍, മൊഗ്രാല്‍ പുത്തൂര്‍ പഞ്ചായത്തുകളിലും കാസര്‍കോട് നഗരസഭ പ്രദേശങ്ങളിലുമാണ് ട്രിപ്പിള്‍ ലോക് ഡൗണ്‍ ഏര്‍പ്പെടുത്തിയത്. കോവിഡ് 19 നിയന്ത്രണ മേഖലകളെ കാസര്‍കോട്, വിദ്യാനഗര്‍, മേല്‍പ്പറമ്പ പൊലീസ് സ്റ്റേഷന്‍ പരിധികളിലായി 5 മേഖലകളായി തിരിച്ചാണ് ട്രിപ്പിള്‍ ലോക്ഡൗണ്‍.
കോവിഡ് 19 നിയന്ത്രണ മേഖലകളില്‍ നിരീക്ഷണത്തിലുള്ള 10 വീടുകള്‍ വീതം കേന്ദ്രീകരിച്ച് പൊലീസ് കാവല്‍ ഏര്‍പ്പെടുത്തി. ഈ പ്രദേശങ്ങളില്‍ പുറത്തിറങ്ങുന്നവരെ പിടികൂടാന്‍ ഫ്‌ലൈയിങ് സ്‌ക്വാഡും ബൈക്ക് പട്രോളിങ്ങും ഡ്രോണ്‍ നിരീക്ഷണവും പൊലീസ് ശക്തമാക്കിയിട്ടുണ്ട്. ഈ പ്രദേശങ്ങളില്‍ ആളുകള്‍ പുറത്തിറങ്ങിയാല്‍ കര്‍ശന നിയമനടപടിയെടുക്കും. നിരീക്ഷണത്തിലുള്ളവര്‍ക്ക് വീടിന്റെ പുറത്തിറങ്ങാന്‍ അനുമതിയില്ല. ഇതു ലംഘിക്കുന്നവരെ സര്‍ക്കാര്‍ നിയന്ത്രണത്തിലുള്ള കേന്ദ്രങ്ങളിലേക്ക് മാറ്റി ഇവര്‍ക്കെതിരെ ശക്തമായ നിയമനടപടിയെടുക്കുമെന്ന് പൊലീസ് അറിയിച്ചു.
https://www.facebook.com/Malayalivartha
