41 പേര്‍ക്കാണ് തേനി ജില്ലയില്‍ മാത്രം കോവിഡ് സ്ഥിരീകരിച്ചിരിക്കുന്നത്. ഇവരുമായി അടുത്തിടപഴകിയ ചിലരുടെ പരിശോധനാഫലം വരാനുണ്ട്. ഇതില്‍ 29 പേരും കേരളത്തിന്റെ അതിര്‍ത്തിയായ ബോഡിമെട്ടിനോടു ചേര്‍ന്നുള്ള ബോഡിനായ്ക്കന്നൂരിലാണ് എന്നതാണ് ഇടുക്കിയിലെ ജനങ്ങളെ ആശങ്കയിലാക്കുന്നത്.
ഇത്തരത്തില്‍ തമിഴ്‌നാട്ടിലെ തേനി ജില്ലയില്‍ കോവിഡ് രോഗികളുടെ എണ്ണം വര്‍ധിച്ചതോടെ കേരളത്തിന്റെ അതിര്‍ത്തി പ്രദേശങ്ങളില്‍ പൊലീസ് നിരീക്ഷണം ശക്തമാക്കി. ഒരാഴ്ചയായി 24 മണിക്കൂറും പൊലീസ് പട്രോളിങ്ങുണ്ട്. കുമളി, കമ്പംമെട്ട്, ബോഡിമെട്ട് ചെക്‌പോസ്റ്റുകള്‍ വഴി യുള്ള പ്രവേശനം നേരത്തെ കര്‍ശനമായി നിയന്ത്രിച്ചിരുന്നു. വനത്തിലൂടെയുള്ള ഊടുവഴികളാണ് ഇപ്പോള്‍ പൊലീസിന് തലവേദന.

ഇടുക്കി ജില്ലയില്‍ കോവിഡ് റിപ്പോര്‍ട്ട് ചെയ്യപ്പെട്ടപ്പോള്‍ സുരക്ഷിതത്വം തേടിയാണ് ഹൈറേഞ്ചിലെ തോട്ടം മേഖലകളില്‍ നിന്ന് തൊഴിലാളികള്‍ കൂട്ടത്തോടെ തമിഴ്‌നാട്ടിലേക്ക് കടന്നത്. ഇടുക്കി ജില്ല പൂര്‍ണമായും രോഗമുക്തി നേടിയപ്പോള്‍ തേനി ജില്ലയില്‍ രോഗം പടര്‍ന്നേക്കും എന്ന ഭീതിയാണ് തൊഴിലാളികളെ ഇടുക്കിയിലേക്ക് മടങ്ങാന്‍ പ്രേരിപ്പിക്കുന്നത്.

ഏലം വിപണന കേന്ദ്രമാണ് ബോഡിനായ്ക്കന്നൂര്‍. ഏലം ലേലം പുനരാരംഭിക്കണം എന്ന ആവശ്യം ശക്തമാണ്. ബോഡിനായ്ക്കന്നൂരിലെ ലേലം തല്‍ക്കാലം ഉപേക്ഷിച്ച് പുറ്റടി സ്‌പൈസസ് പാര്‍ക്കില്‍ ലേലം ആരംഭിച്ചാലും തമിഴ്‌നാട്ടില്‍ നിന്നുള്ള വ്യാപാരികള്‍ എത്താന്‍ സാധ്യതയില്ല. 

തമിഴ്‌നാടുമായി അതിര്‍ത്തി പങ്കിടുന്ന ഇടുക്കി ജില്ലയിലെ 8 പഞ്ചായത്തുകളിലെ 22 വാര്‍ഡുകളില്‍ ഇടുക്കി കലക്ടര്‍ എച്ച്. ദിനേശന്‍ നിരോധനാജ്ഞ പ്രഖ്യാപിച്ചു. തമിഴ്‌നാട്ടില്‍ കോവിഡ് കേസുകള്‍ വര്‍ധിക്കുന്ന സാഹചര്യത്തിലാണു നടപടി. 21 വരെയാണ് നിരോധനാജ്ഞ.പീരുമേട്, ഉടുമ്പന്‍ചോല താലൂക്കുകളില്‍ ഉള്‍പ്പെടുന്ന ശാന്തന്‍പാറയിലെ 1, 5, 7, ഉടുമ്പന്‍ചോലയിലെ 5, 7, നെടുങ്കണ്ടത്തെ 8, 9, 11, കരുണാപുരത്തെ 4, 7, 10, 11, വണ്ടന്‍മേട്ടിലെ 7, 10, ചക്കുപള്ളത്തെ 8, 11, കുമളിയിലെ 6, 7, 8, 9, 12, ചിന്നക്കനാലിലെ 5 എന്നീ വാര്‍ഡുകളിലാണ് നിരോധനാജ്ഞ. ദേവികുളം താലൂക്കിലെ അതിര്‍ത്തി മേഖലകളില്‍ നിന്ന് കാട്ടുവഴികളിലൂടെ കടന്നു കയറുന്നവര്‍ക്കെതിരെ കര്‍ശന നടപടി എടുക്കുമെന്നു ദേവികുളം സബ് കലക്ടര്‍ അറിയിച്ചു. ഇത്തരക്കാരെ കണ്ടാല്‍ 9497203044 എന്ന നമ്പറില്‍ അറിയിക്കണം.