കോവിഡ് കാലത്ത് ആഘോഷങ്ങളെല്ലാം തന്നെ വെറും ചടങ്ങു മാത്രമായി ഒതുങ്ങിയിരിക്കുകയാണ്.ഈസ്റ്ററും വിഷുവും ഒക്കെ അങ്ങനെ തന്നെ.പല കുടുംബങ്ങളിലെയെയും അംഗങ്ങൾ ലോക്ക് ഡൌൺ കാരണം വീട്ടിലെത്താത്ത സാഹചര്യം വന്നതോടെ ആഘോഷങ്ങളെല്ലാം ഒതുങ്ങി. കോവിഡ് പരത്തുന്ന ഭീതിയും മുന്കരുതലുമെല്ലാം ഇത്തവണത്തെ വിഷു ആഘോഷത്തിൻെറയും മാറ്റ് കുറച്ചു .

എന്നാൽ നെല്ലിയാമ്പതി ചന്ദ്രമല എസ്റ്റേറ്റിലെ പി.എൻ.പ്രകാശിന് ഇന്നലെയായിരുന്നു ശരിക്കും വിഷു. ഇറ്റലിയിൽ നിന്നു മടങ്ങിയെത്തി, ന്യൂ‍ഡൽഹിയിൽ ക്വാറന്റീൻ കാലാവധി പൂർത്തിയാക്കിയ മകൾ ഗായത്രി പി. മേനോത്ത് ഇന്നലെ വാളയാറിൽ ബസിറങ്ങുന്ന കാഴ്ചയായിരുന്നു പൊൻകണി. ഗായത്രിയുടെ അമ്മ ജയന്തിയും ഈ കാഴ്ച കാണാനെത്തിയിരുന്നു. കോവിഡ് 19 സംഹാര രോഗം താണ്ഡവമാടിയ ഇറ്റലിയിൽ കംപ്യൂട്ടർ സയൻസിൽ എംഎസ് ചെയ്യുകയായിരുന്നു ഗായത്രി. പുറത്തുപോലും പോകാനാകാതെ മുറിയിൽ തന്നെ അവിടെ ഭീതിയോടെ ദിവസങ്ങൾ കഴിച്ചുകൂട്ടി.

കേന്ദ്രസർക്കാരിന്റെ ഇടപെടൽ മൂലം പ്രത്യേക വിമാനത്തിൽ 15 നാണ് ഇവർ ഉൾപ്പെടുന്ന 200 അംഗ സംഘം ന്യൂഡൽഹിയിലെത്തിയത്. 30 മലയാളികൾ ഈ സംഘത്തിൽ ഉണ്ടായിരുന്നു. ഇൻഡോ ടിബറ്റൻ ബോർഡർ പൊലീസിന്റെ ക്യാംപിലായിരുന്നു ഇവർ താമസിച്ചിരുന്നത്. കോവിഡ് ഇല്ലെന്നു സ്ഥിരീകരിച്ചെങ്കിലും ലോക് ഡൗൺ മൂലം കേരളത്തിലേക്കുള്ള യാത്ര മുടങ്ങി.

തുടർന്ന് കേരള ഹൗസിന്റെ സഹായത്തോടെ ഇവർ പ്രത്യേക ബസിൽ കേരളത്തിലേക്കു പുറപ്പെടുകയായിരുന്നു. ഇന്നലെ ഉച്ചയോടെ പാലക്കാട് എത്തിയ ഇവരെ ഡിഎംഒ ഡോ.കെ.പി.റീത്ത സ്വീകരിച്ചു. വൈകുന്നേരത്തോടെ ഇവർ നെല്ലായാമ്പതിയിൽ എത്തി. ഇറ്റലിയിലെ എൻജിനീയറിങ് വിദ്യാർഥി വടക്കഞ്ചേരി സ്വദേശി ഓംനാഥ് ചെന്താമരാക്ഷനും സംഘത്തിലുണ്ടായിരുന്നു.അതേസമയം കേരളവുമായി അതിർത്തി പങ്കിടുന്ന, തമിഴ്നാട്ടിലെ 4 ജില്ലകൾ റെഡ് സോൺ ആയി പ്രഖ്യാപിച്ചതോടെ കേരളത്തിലും ജാഗ്രത. കോയമ്പത്തൂർ, തിരുപ്പൂർ, തേനി, തിരുനൽവേലി ജില്ലകളാണു റെഡ് സോണിലുള്ളത്. മറ്റ് അതിർത്തി ജില്ലകളായ നീലഗിരി പത്തിൽ താഴെ രോഗികളുള്ള യെല്ലോ സോണിലും കന്യാകുമാരി ഇരുപതിൽ താഴെ രോഗികളുള്ള ഓറഞ്ച് സോണിലുമാണ്. ഇതേത്തുടർന്ന് അതിർത്തി ഗ്രാമങ്ങൾ കേരളം അടച്ചിടും. ദേശീയ പാതയിൽ പരിശോധന കർശനമാക്കിയിട്ടും ചെക്പോസ്റ്റുകളും ഊടുവഴികളും അടച്ചിട്ടിട്ടും അതിർത്തി ഗ്രാമങ്ങളിലൂടെ ഇരു സംസ്ഥാനങ്ങളിലേക്കും നാട്ടുകാർ യാത്ര ചെയ്യുന്നുവെന്നും ഇതു രോഗവ്യാപനത്തിനു വഴിയൊരുക്കുമെന്നുമുള്ള നിഗമനത്തിന്റെ അടിസ്ഥാനത്തിലാണു നടപടി.