ലോകം മുഴുവൻ ഇപ്പോൾ ലോക് ഡൗണിലാണ്. എന്നാൽ തന്നെയും ഈ കാലത്ത് നമുക്ക് മുന്നിൽ പെട്ടുപോയാൽ ദിവസവേതനക്കാരായ ജോലിക്കാരും അശരണരും പിന്നെ ഇതരസംസ്ഥാന തൊഴിലാളികളും. ഒരു നേരത്തെ ആഹാരത്തിനുപോലും വകയില്ലാതെ അലഞ്ഞുതിരിഞ്ഞു നടക്കുന്നവർ ഈ കോറോണക്കാലത്തെ നൊമ്പരമായി മാറുകയാണ്. ആയതിനാൽ തന്നെ നമ്മുടെ ആരോഗ്യപ്രവർത്തകരും സാമൂഹ്യപ്രവർത്തകരും ഇവരെ ചേർത്തണയ്ക്കുകയുമാണ്. അത്തരത്തിൽ വ്യത്യസ്തമായ രീതിയിൽ സഹായം നൽകിക്കൊണ്ട് വിത്യസ്തമാകുകയാണ് കുറെ ഏറെ ചെറുപ്പക്കാർ.

കൊച്ചി ബൈപാസിലൂടെ പോകുന്നവർക്ക് രാത്രി ആയാലും പകൽ ആയാലും പട്ടിണി കിടക്കേണ്ടി വരില്ല എന്നത് സത്യം തന്നെയാണ്. 'ഭക്ഷണം കഴിച്ചോ..?' എന്ന വാക്കുമായി പലരും വഴിയോരങ്ങളിൽ നിൽക്കുന്നത് നിങ്ങൾ കണ്ടിട്ടുണ്ടാകും. ഈ സ്നേഹാന്വേഷണവുമായി ഒരുകൂട്ടം യുവാക്കൾ പാതയോരത്ത് നിലയുറപ്പിച്ചിട്ടുണ്ട്. മലയാളം അറിയാത്ത ദീർഘദൂര വാഹനങ്ങളിലെ യാത്രികർക്കായി ഹിന്ദിയിലും ഇത്തരത്തിൽ എഴുതിയാണ് യുവാക്കൾ ശ്രദ്ധനേടുന്നത്.

അതോടപ്പം തന്നെ പനങ്ങാട് ട്രോൾ ഗ്രൂപ്പ് അംഗങ്ങൾ മാടവന ജംക്‌ഷനിലാണു നിലയുറപ്പിച്ചിട്ടുള്ളത്. ഭക്ഷണശാലകൾ തുറക്കാത്തതിനാൽ വിശന്നു പൊരിഞ്ഞെത്തുന്ന ദീർഘദൂരയാത്രികർക്ക് 200 ചോറുപൊതികളാണ് ദിവസവും ഉച്ചയ്ക്ക് ഇവർ വിതരണം ചെയ്തുവരുന്നത്. ബോർഡിൽ എഴുതി വീശിയാണ് ഡ്രൈവർമാരുടെ ശ്രദ്ധ തന്നെ ഇവർ നേടുന്നത്.

എന്നാൽ കുണ്ടന്നൂരിൽ പകൽ സമയം ആവശ്യക്കാർ കുറവായതോടെ തൃപ്പൂണിത്തുറ പാവംകുളങ്ങര ബിഎസ്ബി ക്ലബ് അംഗങ്ങൾ മരട് പൊലീസിന്റെ അനുമതിയോടെ രാത്രിയിലാക്കിയിരിക്കുകയാണ്. 300ൽപരം ചോറു പൊതികൾ ഇവർ രാത്രികാലങ്ങളിൽ നൽകുന്നു. പ്രസിഡന്റ് ശ്യാം സുരേന്ദ്രൻ, സെക്രട്ടറി രഞ്ജിത് എന്നിവരാണു ഇത്തരം പ്രവർത്തനങ്ങൾക്ക് നേതൃത്വം നൽകിവരുന്നത്. അതോടൊപ്പം തന്നെ കുമ്പളം ടോൾ പ്ലാസയിലും ഉച്ചയ്ക്കും രാത്രിയും ഭക്ഷണം നൽകുന്നുണ്ട്.