മുസ്ലിം ലീഗ് എം.എല്‍.എ കെ.എം ഷാജിയുടെ ഫേസ്ബുക്ക് പോസ്റ്റിനെ രൂക്ഷമായി വിമര്‍ശിച്ച്‌ മുഖ്യമന്ത്രി പിണറായി വിജയന്‍. വാർത്താ സമ്മേളനത്തിനിടയിലായിരുന്നു മുഖ്യമന്ത്രിയുടെ വിമർശനം.

അടിയന്തിരമായും മഹല്ലു കമ്മിറ്റികള്‍ ചേര്‍ന്ന് ഈ വര്‍ഷത്തെ സക്കാത്ത്‌ മുഖ്യമന്ത്രിയുടെ ഫണ്ടിലേക്ക്‌ നല്‍കാന്‍ നിര്‍ദ്ദേശം നല്‍കേണ്ടതാണെന്നും ഷുക്കൂര്‍ കേസില്‍ വിധി വരാന്‍ ഇടയുള്ളതിനാല്‍ വക്കീല്‍ ഫീസിന് തുക ആവശ്യമായി വരുമെന്നും കെ.എം ഷാജി ഫേസ്ബുക് പോസ്റ്റില്‍ പരാമര്‍ശിചിരുന്നു. ഇതാണ് മുഖ്യമന്ത്രിയെ ചൊടിപ്പിച്ചത്.

'എനിക്കിത് വിശ്വസിക്കാനേ കഴിയുന്നില്ല. എം.എല്‍.എ ആയിരിക്കുന്ന ഒരാളില്‍ നിന്നും ഇത്തരത്തില്‍ ഒരു വാചകം വരുമെന്ന് ആരെങ്കിലും പ്രതീക്ഷിക്കുമോ? കെ.എം ഷാജിയുടെ പാര്‍ട്ടി പൂര്‍ണമായും(ഇക്കാര്യത്തില്‍) സഹകരിച്ച്‌ നില്‍ക്കുകയാണ്. എല്ലാ തരത്തിലും സര്‍ക്കാര്‍ നടത്തുന്ന പ്രവര്‍ത്തനങ്ങളുമായി അവര്‍ പൂര്‍ണമായും സഹകരിക്കുന്നു. കെ.എം ഷാജിയുടെ പരാമര്‍ശം ശുദ്ധനുണയാണെന്നും ദുരിതാശ്വാസ നിധിയും വക്കീല്‍ ഫീസുമായും ബന്ധപ്പെട്ട സാങ്കേതിക കാര്യങ്ങള്‍ അറിയാത്ത ഒരുപാട് പാവങ്ങള്‍ ഈ നാട്ടില്‍ ഉണ്ടെന്നും അവരെ എന്താവശ്യത്തിനാണ് എം.എല്‍.എ തെറ്റിദ്ധരിപ്പിക്കുന്നതെന്നും മുഖ്യമന്ത്രി ആരാഞ്ഞു. മുഖ്യമന്ത്രിയുടെ ദുരിതാശ്വാസ നിധിയില്‍ നിന്നുമാണോ വക്കീലിന് ഫീസ് നല്‍കുന്നതെന്നും എന്തിനാണ് പാവങ്ങളെ തെറ്റിദ്ധരിപ്പിക്കുന്നതെന്നും അദ്ദേഹം ക്ഷോഭത്തോടെ ചോദിച്ചു.

'അങ്ങനെയൊരു ഘട്ടത്തില്‍ എന്തിനാണ് ഇങ്ങനെയൊരു നുണ അവതരിപ്പിക്കുന്നത്? ഇങ്ങനെയൊരു നിലപാട് എന്തുകൊണ്ട് അദ്ദേഹമെടുത്തു എന്ന കാര്യം അദ്ദേഹത്തിന്റെ പാര്‍ട്ടി തന്നെ ആലോചിക്കേണ്ടതാണ്. ചില വികൃത മനസുകള്‍ നമ്മുടെ കൂട്ടത്തില്‍ ഉണ്ടാകും.' മുഖ്യമന്ത്രി ക്ഷോഭത്തോടെ പറഞ്ഞു.

നാടാകെ ഈ പ്രതിരോധത്തില്‍ ഒന്നിച്ച്‌ നില്‍ക്കുകയാണെന്നും ഒരു സംശയവും അക്കാര്യത്തില്‍ വേണ്ടെന്നും ചിലര്‍ ഒറ്റപ്പെട്ട രീതിയില്‍ എന്തെങ്കിലും ശബ്ദമുണ്ടാക്കിയാല്‍ അതാണ് ഏറ്റവും വലിയ ശബ്ദമെന്നു നമ്മള്‍ കാണേണ്ടതില്ലെന്നും മുഖ്യമന്ത്രി ചൂണ്ടിക്കാട്ടി. നമ്മുക്ക് രോഗത്തെ ഒന്നിച്ചുതന്നെ നേരിടാനും അതിജീവിക്കാനും കഴിയുമെന്നും മുഖ്യമന്ത്രി പിണറായി വിജയന്‍ വ്യക്തമാക്കി.

കെ.എം ഷാജിയുടെ ഫേസ്ബുക്ക് പോസ്റ്റ് ഇങ്ങനെ; -

മുഖ്യമന്ത്രിയുടെ ഇന്നലത്തെ പത്ര സമ്മേളനം എല്ലാവരും പ്രത്യേകം ശ്രദ്ധിക്കേണ്ടതാണ്. അടിയന്തിരമായും മഹല്ലു കമ്മിറ്റികൾ ചേർന്ന് ഈ വർഷത്തെ സക്കാത്ത്‌ മുഖ്യമന്ത്രിയുടെ ഫണ്ടിലേക്ക്‌ നൽകാൻ നിർദ്ദേശം നൽകേണ്ടതാണ്. പ്രത്യേകിച്ച്‌ അടുത്ത്‌ തന്നെ ഷുക്കൂർ കേസിൽ വിധി വരാൻ ഇടയുണ്ട്‌ ; CBI ക്കു കേസ്‌ വിട്ടുകൊടുക്കാതെ നമ്മുടെ ജയരാജനെയും രാജേഷിനെയും ഒക്കെ രക്ഷപെടുത്തിയെടുക്കണമെങ്കിൽ നല്ല ഫീസ്‌ കൊടുത്ത്‌ വക്കീലിനെ വെക്കാനുള്ളതാണെന്ന് എല്ലാവർക്കും അറിയാവുന്നതാണല്ലോ!! നേരത്തെ നിങ്ങൾ പ്രളയ കാലത്ത്‌ മുഖ്യമന്ത്രിക്ക്‌ കൊടുത്ത ഫണ്ടുണ്ടായത്‌ കൊണ്ട്‌ ഷുക്കൂർ , കൃപേശ്‌ , ശരത്ത്‌ ലാൽ ഷുഹൈബ്‌ കേസിൽ നമ്മുടെ സഖാക്കൾക്കു വേണ്ടി മുന്തിയ വക്കീലമ്മാരെ വല്യ ഫീസ്‌ കൊടുത്ത്‌ വെക്കാൻ നമുക്കു പറ്റി! അതുകൊണ്ട്‌ സക്കാത്ത്‌ മാത്രമല്ല വിഷു കൈനീട്ടം കൂടി കൈ നീട്ടി സർക്കാർ ഫണ്ടിലേക്ക്‌ തരണം!! മുഖ്യമന്ത്രിക്കു ഈ പൈസയൊക്കെ കൊടുക്കുമ്പോൾ "എല്ലാം നമുക്കു വേണ്ടിയാണല്ലോ ഈശ്വര" എന്ന ആശ്വാസത്തോടെ വേണം എല്ലാവരും കൊടുക്കാൻ!!