ജോര്‍ജിനെ പുറത്താക്കണമെന്ന് മാണി മുഖ്യമന്ത്രിയോട് ആവശ്യപ്പെട്ടു, പി സി ജോര്‍ജിനെതിരെ നടപടിക്ക് സാധ്യത, ജോര്‍ജ് ഉണ്ടെങ്കില്‍ പാര്‍ട്ടിയുടെ വിശ്വാസ്യതയും കെട്ടുറപ്പും നഷ്ടപ്പെടും
പിസി ജോര്‍ജിനെതിരെ നടപടി വേണമെന്ന് ആവശ്യപ്പെട്ട് കേരള കോണ്‍ഗ്രസ് എംഎല്‍എമാര്‍ രംഗത്ത്. ജോര്‍ജ് വിഷയം ചര്‍ച്ച ചെയ്യാന്‍ കേരള കോണ്‍ഗ്രസ്-എം എംഎല്‍എമാര്‍ തിരുവനന്തപുരത്ത് യോഗം ചേര്‍ന്നിരുന്നു. ചീഫ് വിപ്പ് സ്ഥാനത്ത് നിന്നും പി സി ജോര്‍ജിനെ മാറ്റണമെന്നും എംഎല്‍എമാര്‍ ആവശ്യപ്പെട്ടിട്ടുണ്ട്. ഇതിന് മുമ്പും ജോര്‍ജിനെ മാറ്റാന്‍ നീക്കം നടന്നിരുന്നു. കോണ്‍ഗ്രസിനെ പൂര്‍ണമായും പ്രതിസന്ധിയിലാക്കിയായിരുന്നു ജോര്‍ജ് പ്രവര്‍ത്തിച്ചിരുന്നത്. ജോര്‍ജിനെതിരെ നിരവധി പേര്‍ പ്രതിഷേധവുമായി രംഗത്തെത്തിയിരുന്നു. ചീഫ് വിപ്പ് പദവിയുടെ ഔന്നത്യം ഉള്‍ക്കൊണ്ടുവേണം പിസി ജോര്‍ജ് സംസാരിക്കാനെന്ന് അടുത്തിടെ യുഡിഎഫ് കണ്‍വീനര്‍ പി പി തങ്കച്ചന്‍ വ്യക്തമാക്കിയിരുന്നു.
സംസാരത്തില്‍ മിതത്വം പാലിക്കണമെന്ന് ജോര്‍ജിനോട് നേരെത്തെ ആവശ്യപ്പെട്ടിരുന്നു. ജോര്‍ജിനെ മാറ്റുന്നതില്‍ പല തരത്തിലുള്ള ഗൂഡാലോചനകള്‍ നടന്നിട്ടുണ്ടെന്നാണ് മറ്റൊരു ആരോപണം. അത് കൂടാതെ തന്നെ യുഡിഎഫിന് ബാധ്യതയാണ് പി സി ജോര്‍ജെന്നും കെപിസിസി നേതൃയോഗം ഇതിന് മുമ്പും വ്യക്തമാക്കിയിട്ടുണ്ട്. പി സി ജോര്‍ജിനെ ചീഫ് വിപ്പ് സ്ഥാനത്ത് നിന്നും നീക്കണമെന്നാവശ്യപ്പെട്ട് യുഡിഎഫ് കണ്‍വീനര്‍, കേരള കോണ്‍ഗ്രസ് നേതാവ് കെ. എം മാണി എന്നിവര്‍ക്ക് നേരെത്തെ കത്ത് നല്‍കിയിരുന്നു. കൂടാതെ, പാര്‍ട്ടിയെ രക്ഷിക്കാന്‍ പി സി ജോര്‍ജ് രാജിവച്ച് പുറത്ത് വരണമെന്ന് മുതിര്‍ന്ന നേതാവ് ടി എസ് ജോണിയും ഇതിന് മുമ്പ് ആവശ്യപ്പെട്ടിരുന്നു.
കോണ്‍ഗ്രസിനകത്തും പുറത്തും പി സി ജോര്‍ജ് നഷ്ടങ്ങള്‍ മാത്രമാണ് വരുത്തിയിട്ടുള്ളതെന്നാണ് കോണ്‍ഗ്രസ് എംഎല്‍എമാര്‍ ആരോപിക്കുന്നത്. അടുത്തിടെ പി സി ജോര്‍ജ് കെ ആര്‍ ഗൗരിയമ്മയ്‌ക്കെതിരെ നടത്തിയ പരാമര്‍ശങ്ങളില്‍ 25 കോടി രൂപ മാനനഷ്ടം ആവശ്യപ്പെട്ട് പിസി ജോര്‍ജിനെതിരെ ജെഎസ്എസ് കേസ് കൊടുക്കുമെന്ന് പിസിക്കെതിരെ ക്രിമിനല്‍ നിയമ നടപടികള്‍ സ്വീകരിക്കുമെന്നും ജെഎസ്എസ് വ്യക്തമാക്കിയിരുന്നു. ഒരുപക്ഷെ ഇത്തരം സംഭവങ്ങള്‍ തന്നെയാകാം പിസിയെ ചീഫ് വിപ്പ് സ്ഥാനത്ത് നിന്നും നീക്കാന്‍ കാരണവും.
അത് കൂടാതെ തന്നെ പ്രതിപക്ഷവുമായി ചീഫ് വിപ്പ് അത്തരത്തിലൊരു നല്ല ബന്ധത്തിലുമായിരുന്നില്ല. പ്രതിപക്ഷത്തെ തെണ്ടികള്‍ എന്ന് ഒരു പ്രസംഗത്തില്‍ ജോര്‍ജ് പറഞ്ഞുവെന്നും ആരോപണമുണ്ടായിരുന്നു. എന്നാല്‍, ഗ്രാമീണഭാഷ ഉപയോഗിച്ചപ്പോള്‍ വായില്‍ നിന്നും വീണു പോയതാണെന്നും നിരുപാധികം ഖേദിക്കുന്നുവെന്നും ജോര്‍ജ് പ്രതിപക്ഷത്തോട് വ്യക്തമാക്കിയിരുന്നു. പി സി ജോര്‍ജിനെ ചിഫ് വിപ്പ് സ്ഥാനത്ത് നിന്നും നീക്കണമെന്ന് ആവശ്യപ്പെട്ട് കേരള കോണ്‍ഗ്രസിലെ പി ജെ ജോസഫ് വിഭാഗവും ഇതിന് മുമ്പ് മുന്നോട്ട് വന്നിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
