ഗര്‍ഭഛിദ്രത്തിന് അനുമതി നല്‍കണമെന്ന് ആവശ്യപ്പെട്ട് യുവതി ഹൈക്കോടതിയില്‍, ഗര്‍ഭസ്ഥ ശിശു തന്റേതല്ലെന്ന് ഭര്‍ത്താവിന് സംശയം
ഗര്‍ഭസ്ഥ ശിശു തന്റേതല്ലെന്ന് ആരോപിച്ച് ഭര്‍ത്താവ് മാനസികമായും ശാരീരികമായും പീഡിപ്പിക്കുന്നതിനാല്‍ ഗര്‍ഭഛിദ്രത്തിന് അനുമതി തേടി യുവതി ഹൈക്കോടതിയെ സമീപിച്ചു. യുവതിയുടെ ഹര്‍ജി പരിഗണിച്ച ഹൈക്കോടതി, ഭര്‍ത്താവിന്റെ പ്രതികരണം ആരാഞ്ഞ് നോട്ടീസ് അയച്ചു. എതിര്‍ കക്ഷിക്ക് ഇമെയിലിലൂടെയും വാട്സ്ആപ്പിലൂടെയും നോട്ടീസ് അയയ്ക്കാന്‍ ജസ്റ്റിസ് അനു ശിവരാമന്റെ ബെഞ്ച് ഉത്തരവിട്ടു.
15 ആഴ്ച ഗര്‍ഭിണിയായ 20 വയസുകാരിയാണ് പരാതിക്കാരി. 1971-ലെ മെഡിക്കല്‍ ടെര്‍മിനേഷന്‍ ഓഫ് പ്രഗ്‌നന്‍സി ആക്ടിലെ സെക്ഷന്‍ 5 പ്രകാരം ഗര്‍ഭം അമ്മയുടെ മാനസികാരോഗ്യത്തെ ബാധിക്കുന്നുണ്ടെങ്കില്‍ ഗര്‍ഭഛിദ്രം അനുവദനീയമാണ്. ഇത് പ്രകാരം ഗര്‍ഭഛിദ്രം അനുവദിക്കണമെന്നാണ് ഹര്‍ജിക്കാരിയുടെ ആവശ്യം.
കൗണ്‍സിലിംഗിലൂടെ ദമ്പതികള്‍ക്കിടയിലെ പ്രശ്നം പരിഹരിക്കാന്‍ കഴിയുമോയെന്ന് കോടതി ആരാഞ്ഞിരുന്നു. എന്നാല്‍ ഭര്‍ത്താവ് സഹകരിക്കാന്‍ തയ്യാറായില്ലെന്ന് യുവതിയുടെ അഭിഭാഷകന്‍ കോടതിയെ അറിയിച്ചു. ഗര്‍ഭസ്ഥ ശിശു തന്റേതല്ലെന്ന നിലപാടില്‍ ഇയാള്‍ ഉറച്ചുനില്‍ക്കുകയാണെന്നും അഭിഭാഷകന്‍ കോടതിയെ അറിയിച്ചു.
https://www.facebook.com/Malayalivartha
