വീടിനകത്ത് കടക്കാന്‍ അനുവദിക്കാതെ വയോധികയായ മാതാവിനെ മകന്‍ നിലവറ മുറിയില്‍ തനിച്ചാക്കിയത് എല്ലാവരേം ഞെട്ടിച്ചിരുന്നു.കോതമംഗലം കോട്ടപ്പടിയിൽ സ്വത്തുക്കൾ കൈക്കലാക്കിയ ശേഷം മകനും മരുമകളും നിലവറയിൽ വൃദ്ധമാതാവിനെ പൂട്ടിയിട്ട നിലയിലായിരുന്നു

അടുക്കള ഉള്‍പ്പെടെ പൂട്ടി മകൻ വീട് വിട്ട് പോയി. കിടപ്പുമുറിതന്നെ അമ്മക്ക് അടുക്കളയാക്കേണ്ടി വന്നു. ശുചിമുറിയില്‍നിന്ന് വെള്ളമെടുത്താണ് ഈ അമ്മ ഇപ്പോള്‍ ഭക്ഷണം ഉണ്ടാക്കുന്നത്.

2004 മുതല്‍ സാറാ മത്തായിയും ഏകമകൻ അജുവും ഭാര്യയും രണ്ട് മക്കളും താമസിച്ചുവന്നത് കോതമംഗലത്തെ കോട്ടപ്പടിയിലെ വീട്ടിലായിരുന്നു. താഴത്തെ നിലയില്‍ നിലവറയ്ക്ക് സമാനമായ സെല്ലാറിലായിരുന്നു അമ്മയുടെ ജീവിതം. പക്ഷേ അവര്‍ക്ക് അതിലൊന്നും പരാതിയില്ലായിരുന്നു. ഫെബ്രുവരി 24 രാത്രി താഴത്തെ നിലയില്‍നിന്ന് മുകളിലേക്കുള്ള വഴി മകൻ അടച്ചു. നിസഹായതയോടെ നോക്കി നില്‍ക്കാനെ ഈ അമ്മയ്ക്ക് കഴിഞ്ഞുള്ളൂ.

മുകളിലെ നിലയില്‍ താമസിച്ചിരുന്ന മകൻ പിന്നെ അമ്മയെ തിരിഞ്ഞുനോക്കാതായി. ഏറെ താമസിയാതെ അമ്മയോട് ഒരു വാക്കുപോലും പറയാതെ മകനും കുടുംബവും വീട് വിട്ട് എറണാകുളത്തേക്ക് മാറി.ഇതോടെ സാറ താഴത്തെ നിലയിലെ മുറി താല്‍ക്കാലിക അടുക്കളയാക്കി.

ഇപ്പോഴിതാ കേരള വനിതാ കമ്മീഷൻ അധ്യക്ഷ എം സി ജോസഫൈനും കമ്മീഷൻ അംഗം അഡ്വ. ഷിജി ശിവജിയും സന്ദർശിച്ചു. വൃദ്ധമാതാവിന്റെ മൊഴി കമ്മീഷൻ രേഖപ്പെടുത്തി. കോട്ടപ്പടി സി ഐ യോട് വൃദ്ധയുടെ സംരക്ഷണവും സഞ്ചാര സ്വാതന്ത്ര്യവും ഉറപ്പ് വരുത്തണമെന്ന് കമ്മീഷൻ ആവശ്യപ്പെട്ടു. സംഭവത്തിൽ ആരോപണ വിധേയരായ മകനെയും മരുമകളെയും കമ്മീഷൻ വിളിച്ചു വരുത്തും. ആർ ഡി ഒ യോട് റിപ്പോർട്ട് തേടുമെന്നും എം. സി. ജോസഫൈൻ അറിയിച്ചു.

സംഭവവുമായി ബന്ധപ്പെട്ട് കമ്മീഷൻ നേരത്തേ സ്വമേധയാ കേസെടുത്ത് പോലീസ് റിപ്പോർട്ട് തേടിയിരുന്നു. നിലവറയിൽ ഭക്ഷണവും വെള്ളവും ഇല്ലാതെ പുറത്തിറങ്ങാൻ പോലും കഴിയാത്ത അവസ്ഥയിലായിരുന്നു വൃദ്ധ. മാധ്യമ വാർത്തകളുടെ അടിസ്ഥാനത്തിലാണ് നടപടി.