സ്വന്തം കൂട്ടുകാരികളെ കൊലപ്പെടുത്തിയ മിൽപിറ്റാസ് ഇരട്ടക്കൊലപാതക കേസിൽ നിർണായക വഴിത്തിരിവ്. പ്രതിയായ അനില ബേബിയുടെ മാനസികാരോഗ്യ നിലയെക്കുറിച്ച് പ്രതിഭാഗം അഭിഭാഷകൻ ഷോൺ ജോർജ് കോടതിയിൽ ഔദ്യോഗികമായി സംശയം പ്രകടിപ്പിച്ചിരുന്നു. തുടർന്ന് ഇന്ന് കേസിന്റെ വിചാരണ നടപടികൾ കോടതി താൽക്കാലികമായി സ്റ്റേ ചെയ്തു.ഇന്ന് രാവിലെ മെന്റൽ ഹെൽത്ത് കോടതിയായ ഡിപ്പാർട്മെന്റ് 24-ൽ ഓണറബിൾ ജഡ്ജി മീഗൻ പിയാനോയുടെ മുൻപാകെയാണ് അറ്റോർണി ഷോൺ ജോർജ് ഹാജരായത്. കലിഫോർണിയ പീനൽ കോഡ് 1368 അനുസരിച്ച്, വിചാരണ നേരിടാനുള്ള മാനസിക ശേഷി പ്രതിക്കുണ്ടോ എന്ന കാര്യത്തിൽ തനിക്ക് ഗുരുതരമായ സംശയങ്ങളുണ്ടെന്ന് അദ്ദേഹം കോടതിയിൽ ബോധിപ്പിച്ചു.

കുറ്റകൃത്യം നടക്കുമ്പോഴുള്ള മാനസികാവസ്ഥയല്ല, മറിച്ച് നിലവിൽ കോടതി നടപടികളും വിചാരണയും നേരിടാൻ പ്രതിക്ക് മാനസികമായി പ്രാപ്തിയുണ്ടോ എന്ന് പരിശോധിക്കുന്നതാണ് ഈ നിയമവകുപ്പ്.പ്രതിഭാഗത്തിന്റെ ഈ പ്രസ്താവനയെ പ്രോസിക്യൂഷനെ പ്രതിനിധീകരിക്കുന്ന ജില്ലാ അറ്റോർണി എതിർത്തില്ല. പ്രോസിക്യൂഷന്റെ ഈ നിലപാടും കേസിൽ നിർണായകമായി. ഇതേ തുടർന്ന് ജഡ്ജി മീഗൻ പിയാനോ ക്രിമിനൽ നടപടിക്രമങ്ങൾ താൽക്കാലികമായി നിർത്തിവച്ചു കൊണ്ട് ഉത്തരവിടുകയായിരുന്നു.തുടർനടപടികളുടെ ഭാഗമായി പ്രതിയുടെ മാനസിക നില സമഗ്രമായി പരിശോധിക്കാൻ കോടതി രണ്ട് ഡോക്ടർമാരെ ചുമതലപ്പെടുത്തിയിട്ടുണ്ട്.

ഈ ഡോക്ടർമാർ പ്രതിയെ പരിശോധിച്ച് അവരുടെ കണ്ടെത്തലുകളും മെഡിക്കൽ റിപ്പോർട്ടുകളും കോടതിയിൽ സമർപ്പിക്കും. ഈ റിപ്പോർട്ടുകൾ വിലയിരുത്തുന്നതിനായി കേസിന്റെ അടുത്ത വാദം കേൾക്കൽ വരുന്ന ഡിസംബർ 18, വെള്ളിയാഴ്ചയിലേക്ക് മാറ്റിയിരിക്കുകയാണ്.പ്രതിഭാഗം വക്കീലായ ഷോൺ ജോർജ്, താൻ അനിലയുമായി നേരിട്ട് സംസാരിച്ചുവെന്നും, അവരുടെ മാനസികനിലയെക്കുറിച്ച് തനിക്ക് സംശയം ഉണ്ടെന്നും കോടതിയെ അറിയിക്കുകയായിരുന്നു. ഇതെത്തുടർന്ന് അനിലയെ കോടതിയുടെ മെന്റൽ ഹെൽത്ത് കലണ്ടറിലേക്ക് മാറ്റി. കോടതി നിയമിക്കുന്ന ഡോക്ടർമാർ അനിലയുടെ മാനസികാരോഗ്യം പരിശോധിക്കും. പരിശോധന,

റിപ്പോർട്ട് സമർപ്പണം തുടങ്ങിയ നടപടിക്രമങ്ങൾ പൂർത്തിയാകാൻ കുറച്ച് മാസങ്ങളെടുത്തേടുക്കും എന്നാണ് വിവരം.ഓഗസ്റ്റ് 28-നാണ് മലയാളികളെ ഞെട്ടിച്ച രണ്ട് കൊലപാതകങ്ങളും നടന്നത്. പിടിയിലാകുമ്പോൾ അനില ചോദ്യങ്ങൾക്ക് ഉത്തരം നൽകാൻ കഴിയാത്ത അവസ്ഥയിലായിരുന്നു എന്ന് റിപ്പോർട്ടുകൾ പറഞ്ഞു. സംഭവദിവസം ഉച്ചയോടെയാണ് മിൽപിറ്റാസിലെ ഡിക്സൺ ലാൻഡിംഗ് റോഡിലുള്ള മിൽ ക്രീക്ക് അപ്പാർട്ട്മെന്റ് പാർക്കിങ് ഏരിയയിൽ വെച്ച് അഞ്ജന ഹരിയെ കൊലപ്പെടുത്തിയത്. അനില ബേബി തന്റെ ടൊയോട്ട ഹൈലാൻഡർ എസ്‌‌യുവി കാറിടിച്ച് കൊല്ലുകയായിരുന്നു.തലയ്ക്ക് ഗുരുതരമായി പരിക്കേറ്റ അഞ്ജന സംഭവസ്ഥലത്തുതന്നെ മരിച്ചു.അഞ്ജന കൊല്ലപ്പെട്ട് ഏകദേശം രണ്ട് മണിക്കൂറിന് ശേഷമാണ് സാൻ ഹൊസെയിലെ ലിൻഡ വിസ്റ്റ സ്ട്രീറ്റിലുള്ള വീട്ടിൽ ആൻ മേരി മാത്യുവിനെ ഭർത്താവ് മരിച്ച നിലയിൽ കണ്ടെത്തിയത്.