റബർ വില ഉയർന്നതോടെ കർഷകരുടെ പ്രതീക്ഷകളും ഉയരുകയാണ്. വർഷങ്ങളായി കാടുകയറിക്കിടന്ന തോട്ടങ്ങൾ പോലും ടാപ്പിംഗിനായി സജ്ജമാക്കുന്ന തിരക്കിലാണ് കർഷകർ.  വില സമീപകാലത്തെ ഏറ്റവും ഉയർന്ന നിരക്കിലാണ് കിലോയ്ക്ക് 285 രൂപ കടന്നു.

വിലക്കുറവും തൊഴിലാളിക്ഷാമവും മൂലം ഉപേക്ഷിച്ച തോട്ടങ്ങൾ പാട്ടത്തിനെടുക്കാൻ ആളുകളുടെ തിരക്കാണ്. അരയേക്കർ മുതലുള്ള ചെറുതോട്ടങ്ങൾ മുതൽ വൻകിട തോട്ടങ്ങൾ വരെ പാട്ടത്തിന് നൽകുന്നുണ്ട്. വിലയിലെ മുന്നേറ്റത്തിന് പിന്നാലെ പാട്ടനിരക്കും കുതിച്ചുയരുകയാണ്.മരങ്ങളുടെ എണ്ണത്തിന്റെ അടിസ്ഥാനത്തിലാണ് ഭൂരിഭാഗം തോട്ടങ്ങളും പാട്ടത്തിന് നൽകുന്നത്.

ഒന്നു മുതൽ മൂന്നു വർഷം വരെയാണ് സാധാരണ പാട്ടക്കാലാവധി. മരവും ടാപ്പിംഗ് അവകാശവും ഉൾപ്പെടെ പാട്ടത്തിന് നൽകുന്ന രീതിയും ടാപ്പിംഗിന് മാത്രം കൈമാറുന്ന രീതിയുമുണ്ട്.

അതേസമയം പാട്ടത്തിന് നൽകുന്നതിന് പുറമേ പങ്ക് ടാപ്പിംഗിനും പ്രചാരമേറുകയാണ്. ഉത്പാദനത്തിന്റെ പകുതി തോട്ടമുടമയ്ക്കും പകുതി ടാപ്പിംഗ് തൊഴിലാളിക്കും നൽകുന്നതാണ് രീതി. റബറിന് മികച്ച വില ലഭിക്കുന്നതിനാൽ തൊഴിലാളികൾക്കും ഇത് വളരെ നേട്ടമാണ്.