മരണത്തിൽ നിന്നും അവസാന നിമിഷം തിരിച്ചു വന്നിട്ടുള്ള നിരവധി വാർത്തകൾ കേട്ടിട്ടുണ്ട് . അത്തരത്തിലൊരു സംഭവമാണ് ഇപ്പോൾ ഉണ്ടായിരിക്കുന്നത് . ലക്‌നൗ സ്വകാര്യ ആശുപത്രിയിൽ മരിച്ചതായി സ്ഥിരീകരിച്ച 56കാരി അന്ത്യകർമങ്ങൾക്കിടെ ചുമച്ചു. യുപിയിലെ ഗോരഖ്പുരിലാണ് ഞെട്ടിക്കുന്ന സംഭവം നടന്നത്. ദഖിലി ഗ്രാമത്തിലെ ശിവമൂർത്ത് യാദവിന്റെ ഭാര്യയായ ലളിതാദേവിയാണ് മരണാന്തര ചടങ്ങുകൾക്കിടെ ഉണർന്നത്. ഉടൻതന്നെ ബന്ധുക്കൾ ഇവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

ഒരാഴ്ചയായി പനി ബാധിച്ച് ചികിത്സയിലായിരുന്നു ലളിതാ ദേവി. ആദ്യം പിധാനി ക്രോസിംഗിന് സമീപമുള്ള ഒരു സ്വകാര്യ ഡോക്ടറെ സമീപച്ചെങ്കിലും ആരോഗ്യനില വഷളായതോടെ ബർഹാൽഗഞ്ചിലെ ഒരു സ്വകാര്യ ആശുപത്രിയിൽ പ്രവേശിപ്പിച്ചു. തലച്ചോറിൽ രക്തസ്രാവം ഉണ്ടായേക്കാമെന്ന് സംശയിച്ച ഡോക്ടർമാർ അവരെ ഗോരഖ്പുരിയിലെ ഒരു സ്വകാര്യ ആശുപത്രിയിൽ പ്രവേശിപ്പിക്കാൻ നിർദേശിച്ചു. ഗോരഖ്പുരിയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് ലളിതാദേവി മരിച്ചതായി ഡോക്ടർമാർ അറിയിക്കുന്നത്.

ശേഷം ബന്ധുക്കൾ മൃതദേഹം ഗ്രാമത്തിലെത്തിച്ച് വീട്ടിൽ അന്ത്യകർമങ്ങൾക്കുള്ള ഒരുക്കങ്ങൾ ആരംഭിച്ചു.മുളകൊണ്ടുള്ള ശവമഞ്ചം തയ്യാറാക്കി ചടങ്ങുകൾ നടത്തുന്നതിനിടെ കുടുംബത്തിലെ സ്ത്രീകൾ ലളിതാദേവിയുടെ വായിൽ തുളസിവെള്ളം ഒഴിച്ചു.ഇതിനുപിന്നാലെ ഇവർ പെട്ടെന്ന് ചുമയ്ക്കാൻ തുടങ്ങുകയായിരുന്നു. ഇതുകണ്ട് ഞെട്ടിയ ബന്ധുക്കൾ ഉടൻ തന്നെ ലളിതാദേവിയെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

ലളിതാദേവിയുടെ ആരോഗ്യനിലയെക്കുറിച്ച് ആശുപത്രി അധികൃതർ ഔദ്യോഗിക പ്രസ്താവനയൊന്നും നൽകിയിട്ടില്ല.കഴിഞ്ഞ ആഴ്ചയും സമാനമായ മറ്റൊരു സംഭവം കൂടി റിപ്പോർട്ട് ചെയ്തിരുന്നു . മരിച്ചുവെന്ന് കരുതി സംസ്‌കാര ചടങ്ങുകള്‍ക്കായി ശവപ്പെട്ടിയില്‍ കിടത്തിയ പതിനഞ്ചുകാരി എട്ടാം മണിക്കൂറില്‍ എഴുന്നേറ്റിരുന്നു. യൂലൈഡി ഇക്‌സോടോയാക് എന്ന പെണ്‍കുട്ടിയാണ് മരണത്തെ അതിജീവിച്ച് ജീവിതത്തിലേക്ക് തിരികെ എത്തിയത്. ഗ്വാട്ടിമാലയിലെ ക്വിഷെ ഡിപ്പാര്‍ട്ട്‌മെന്റിലെ എല്‍ ജോക്കോട്ട് എന്ന സ്ഥലത്താണ് ലോകത്തെ ഞെട്ടിച്ച അത്ഭുതകരമായ സംഭവം അരങ്ങേറിയത്.