പലയിടത്തും മഞ്ഞപ്പിത്തം പടർന്നു പിടിക്കുന്നുണ്ട് ശ്രദ്ധിക്കുക . വണ്ടൂർ ടൗണിൽ മഞ്ചേരി റോഡിൽ പുതുതായി ആരംഭിച്ച ഹോട്ടലിൽനിന്നു ഭക്ഷണം കഴിച്ച നൂറോളം പേർക്ക് മഞ്ഞപ്പിത്ത ബാധ കണ്ടെത്തിയതിനെ തുടർന്ന് പ്രതിരോധ പ്രവർത്തനങ്ങൾ ഊർജിതമാക്കി ആരോഗ്യവകുപ്പ്. രോഗബാധയെ തുടർന്ന് ചികിത്സയിൽ കഴിഞ്ഞിരുന്ന കാളികാവ് സ്വദേശി അച്ചിപ്പാറ സത്താർ കഴിഞ്ഞ ദിവസം മരിച്ചിരുന്നു. നിലവിൽ 18 പേരാണ് ചികിത്സയിലുള്ളത്. ഇതിൽ കോഴിക്കോട് സ്വകാര്യ ആശുപത്രിയിൽ കഴിയുന്ന ഒരാളുടെ നില ഗുരുതരമാണ്.

ഒക്ടോബർ 3 മുതൽ 18 വരെ പുതിയ ഹോട്ടലിൽനിന്നും ഭക്ഷണം കഴിച്ചവരിലാണ് രോഗം കണ്ടെത്തിയത്. പതിനൊന്നാം തീയതി ഹോട്ടൽ ജീവനക്കാർക്കാണ് ആദ്യം രോഗം സ്ഥിരീകരിച്ചത്. വണ്ടൂർ, തിരുവാലി, കാളികാവ് പഞ്ചായത്തിലുള്ളവർക്കാണ് മഞ്ഞപ്പിത്തം സ്ഥിരീകരിച്ചിട്ടുള്ളത്. പ്രതിരോധ പ്രവർത്തനങ്ങൾക്കായി സ്ക്വാഡുകളെ ഉപയോഗിച്ച് പഞ്ചായത്തുകൾ വീടുകൾ തോറും കയറി തുടങ്ങി. തട്ടുകടകൾ ഉൾപ്പെടെയുള്ള ഭക്ഷണശാലകളിൽ ഉപയോഗിക്കുന്ന വെള്ളത്തിന്റെ ശുചിത്വം ഉറപ്പാക്കാനും നടപടി സ്വീകരിച്ചിട്ടുണ്ട്.

അതേസമയം പകർച്ചവ്യാധി പ്രതിരോധത്തിന്റെ ഭാഗമായി വണ്ടൂർ നഗരത്തിലെ റസ്റ്ററന്റുകൾ, കൂൾബാർ, കന്റീൻ എന്നിവിടങ്ങളിൽ ആരോഗ്യ വിഭാഗം കഴിഞ്ഞദിവസം പരിശോധന നടത്തി. നഗരസഭയുടെ സമീപ പ്രദേശങ്ങളിൽ മഞ്ഞപ്പിത്തം വ്യാപിക്കുന്ന സാഹചര്യത്തിലായിരുന്നു പരിശോധന.ഏതാനും സ്ഥാപനങ്ങൾക്ക് നോട്ടിസ് നൽകി. നഗരസഭ ക്ലീൻ സിറ്റി മാനേജർ, ജെ.എ.നുജൂമിന്റെ നേതൃത്വത്തിൽ 2 സ്ക്വാഡ് ആണ് പരിശോധനയ്ക്ക് നേതൃത്വം നൽകിയത്. വരും ദിവസങ്ങളിൽ പരിശോധന തുടരുമെന്ന് സെക്രട്ടറി വൈ.പി.മുഹമ്മദ് അഷ്റഫ് പറഞ്ഞു.മഞ്ഞപ്പിത്തം (Jaundice) എന്നത് സ്വയം ഒരു രോഗമല്ല,

മറിച്ച് ശരീരത്തിലെ കരളിനെയോ (Liver) രക്തത്തെയോ ബാധിക്കുന്ന ഒട്ടനവധി രോഗങ്ങളുടെ ഒരു പ്രധാന ലക്ഷണമാണ്. മലിനമായ വെള്ളത്തിലൂടെയും ഭക്ഷണത്തിലൂടെയുമാണ് (പ്രത്യേകിച്ച് ഹെപ്പറ്റൈറ്റിസ് എ, ഇ വൈറസുകൾ) ഇത് കേരളത്തിൽ സാധാരണയായി പടർന്നുപിടിക്കുന്നത്. കണ്ണിന്റെ വെള്ളഭാഗം, നഖങ്ങൾ, ചർമ്മം എന്നിവ മഞ്ഞനിറമാകുക.മൂത്രത്തിന് കടും മഞ്ഞ നിറം ഉണ്ടാകുക.കടുത്ത ക്ഷീണം, പനി, വിറയൽ.വിശപ്പില്ലായ്മ, ഛർദ്ദി അല്ലെങ്കിൽ ഓക്കാനം.വയറുവേദന (പ്രത്യേകിച്ച് വയറിന്റെ വലതുഭാഗത്ത് മുകളിലായി).മലത്തിന്റെ നിറം കളിമൺ നിറം പോലെ വിളറിപ്പോകുക.

പ്രതിരോധ മാർഗ്ഗങ്ങളും ഭക്ഷണക്രമവും. കുടിവെള്ളം കുറഞ്ഞത് 10 മിനിറ്റെങ്കിലും നന്നായി തിളപ്പിച്ച ശേഷം മാത്രം ഉപയോഗിക്കുക. പുറത്തുനിന്നുള്ള തണുത്ത പാനീയങ്ങളും ഐസും പരമാവധി ഒഴിവാക്കുക . ആഹാരം കഴിക്കുന്നതിന് മുൻപും മലമൂത്രവിസർജ്ജനത്തിന് ശേഷവും കൈകൾ സോപ്പിട്ട് നന്നായി കഴുകുക .കഞ്ഞി, പുഴുങ്ങിയ പച്ചക്കറികൾ, പഴച്ചാറുകൾ എന്നിവ കഴിക്കുക.കൊഴുപ്പും എണ്ണയും അടങ്ങിയ ഭക്ഷണങ്ങൾ, വറുത്തതും പൊരിച്ചതുമായവ പൂർണ്ണമായും ഒഴിവാക്കുക. ഇത് കരളിന്റെ അവസ്ഥ കൂടുതൽ വഷളാക്കും.