പോക്സോ- കഞ്ചാവ് കേസുകളിലെ പ്രതി ഭാര്യാവീട്ടില് നിന്നും സ്വന്തം കുഞ്ഞിനെ തട്ടിക്കൊണ്ടു പോയി
രണ്ടു പോക്സോ കേസുകളിലും നിരവധി കഞ്ചാവ് കേസുകളിലും പ്രതിയായ യുവാവ് കഞ്ചാവിന്റെ ലഹരിയില് ഭാര്യ വീട്ടില് കയറി ഭാര്യയെയും അമ്മയെയും ആക്രമിച്ചു വീഴ്ത്തിയ ശേഷം രണ്ടു വയസുള്ള കുഞ്ഞിനെ തട്ടിക്കൊണ്ടു പോയി. കുട്ടിയുടെ പിതാവായ യുവാവാണ് വീട്ടില് കയറി ഇരുവരെയും ആക്രമിച്ച ശേഷം കുട്ടിയെ തട്ടിക്കൊണ്ടു പോയത്. കുട്ടിയെ ചോദിച്ച് വീട്ടിലെത്തിയ യുവാവ് ഇരുവരെയും ആക്രമിച്ചു വീഴ്ത്തിയ ശേഷം ബൈക്കില് കുട്ടിയുമായി കടക്കുകയായിരുന്നു. പ്രതിയെ പാലക്കാട്ടു നിന്നാണ് പിന്നീട്് പൊലീസ് പിടികൂടിയത്.
തൃപ്പൂണിത്തുറ പുത്തന്കുരിശ് ചെരുങ്ങേലില് വീട്ടില് സന്തോഷിനെ (27)യാണ് കടുത്തുരുത്തി സ്റ്റേഷന് ഹൗസ് ഓഫിസര് ഇന്സ്പെക്ടര് ബി.എസ് ബിനുവിന്റെയും എസ്.ഐ ടി.എസ് റെനീഷിന്റെയും നേതൃത്വത്തിലുള്ള സംഘം അറസ്റ്റ് ചെയ്തത്. കടുത്തുരുത്തി ഞീഴൂര് പാഴൂത്തുരുത്ത് നിലക്കുന്നേല് വീട്ടില് സന്ധ്യ(19)യുടെ പരാതിയിലാണ് പ്രതിയെ പൊലീസ് അറസ്റ്റ് ചെയ്തത്.
കഴിഞ്ഞ ദിവസം രാത്രിയിലായിരുന്നു കേസിനാസ്പദമായ സംഭവം. പ്രായപൂര്ത്തിയാകും മുന്പ് സന്തോഷ് പീഡിപ്പിച്ചതിനെ തുടര്ന്നാണ് കുട്ടിയുടെ അമ്മ ഗര്ഭിണിയായത്. ഈ കേസില് സന്തോഷിനെ പൊലീസ് അറസ്റ്റ് ചെയ്തു റിമാന്ഡ് ചെയ്തിരുന്നു. കേസില് ജാമ്യത്തിലിറങ്ങിയ സന്തോഷ് മറ്റൊരു പീഡനക്കേസിലും കുടുങ്ങിയിരുന്നു.
നേരത്തെ ഒന്നിച്ചു താമസിച്ചിരുന്ന ഇരുവരും ഒരു വര്ഷത്തോളമായി അകന്നു കഴിയുകയായിരുന്നു. ചൈല്ഡ് ലൈനിന്റെ നിര്ദേശ പ്രകാരം കുട്ടിയെ അമ്മയുടെ കൂടെ അയച്ചിരിക്കുകയായിരുന്നു. ഇതിനിടെയാണ് കഴിഞ്ഞ ദിവസം കഞ്ചാവിന്റെ ലഹരിയില് പ്രതി, ഞീഴൂരിലെ വീട്ടിലെത്തി കുട്ടിയെ തട്ടിക്കൊണ്ടു പോയത്.
കുട്ടിയെ തട്ടിക്കൊണ്ടു പോയതിനു പിന്നാലെ പ്രതിയുടെ വീട്ടിലെത്തിയ സന്ധ്യയും അമ്മയും കുട്ടിയെ തിരികെ ആവശ്യപ്പെട്ടെങ്കിലും ഇരുവരെയും അടിച്ചോടിക്കുകയായിരുന്നു. ഇവരെ മര്ദിച്ച് ഓടിച്ച ശേഷം ബൈക്കില് കുട്ടിയുമായി പ്രതി രക്ഷപെട്ടു. തുടര്ന്നു, ഇവര് കടുത്തുരുത്തി പൊലീസ് സ്റ്റേഷനില് എത്തി പരാതി നല്കി. തുടര്ന്നു പൊലീസ് നടത്തിയ അന്വേഷണത്തില് പ്രതി പാലക്കാട് ഭാഗത്തുള്ളതായി കണ്ടെത്തി. പിന്നീട്എ.എസ്.ഐ നൗഷാദ്, സിവില് പൊലീസ് ഓഫിസര്മാരായ പ്രശാന്ത് , അരുണ് എന്നിവര് ചേര്ന്നു പ്രതിയെ പിടികൂടി.
പ്രതിയ്ക്കെതിരെ ജുവനൈല് ജസ്റ്റിസ് ആക്ടും, വീടുകയറി സ്ത്രീകളെ ആക്രമിച്ചതിനുമടക്കം വകുപ്പുകള് ചുമത്തിയിട്ടുണ്ട്. പ്രതിയെ കോടതിയില് ഹാജരാക്കി റിമാന്ഡ് ചെയ്തു.
https://www.facebook.com/Malayalivartha