വാഹനാപകടത്തില് ഭര്ത്താവ് മരിച്ച സംഭവത്തില് ഭാര്യക്ക് നഷ്ടപരിഹാരത്തിനുള്ള അര്ഹത പുനര് വിവാഹത്തിലൂടെ നഷ്ടമാവില്ലെന്ന് ഹൈക്കോടതി
വാഹനാപകടത്തില് ഭര്ത്താവ് മരിച്ച സംഭവത്തില് ഭാര്യക്ക് നഷ്ടപരിഹാരത്തിനുള്ള അര്ഹത പുനര് വിവാഹത്തിലൂടെ നഷ്ടമാവില്ലെന്ന് ഹൈക്കോടതി. 2002-ല് മൂവാറ്റുപുഴ സ്വദേശിയായ അനില് എബ്രഹാം അപകടത്തില് മരിച്ചതിനെത്തുടര്ന്ന് മോട്ടോര് ആക്സിഡന്റ് ക്ളെയിം ട്രിബ്യൂണല് നിശ്ചയിച്ച തുക കുറഞ്ഞെന്നു ചൂണ്ടിക്കാട്ടി ഭാര്യയും രക്ഷിതാക്കളും നല്കിയ ഹര്ജിയിലാണ് ജസ്റ്റിസ് എന്. നഗരേഷ് ഇക്കാര്യം വ്യക്തമാക്കിയിരിക്കുന്നത്. എറണാകുളം-പാലാരിവട്ടം റോഡില് െവച്ച് കാറിടിച്ചാണ് ബൈക്ക് യാത്രികനായിരുന്ന അനില് കൊല്ലപ്പെട്ടത്.
വിവാഹം കഴിഞ്ഞ് മൂന്നു മാസത്തിനുള്ളിലാണ് അപകടമുണ്ടായത്. പിന്നീട് 2005-ല് യുവതി പുനര് വിവാഹം കഴിച്ചെന്നും ആ നിലയ്ക്ക് നഷ്ടപരിഹാരത്തിന് അര്ഹതയില്ലെന്നും ഇന്ഷുറന്സ് കമ്പനി വാദിച്ചു. ഇതു തള്ളിയാണ് ഹൈക്കോടതി വിധി പറഞ്ഞത്. ഭര്ത്താവ് മരിച്ചാല് ഭാര്യ ജീവിതകാലം മുഴുവന് വിവാഹം കഴിക്കാതെ കഴിയണമെന്ന് ഇന്നത്തെ സമൂഹം ചിന്തിക്കില്ല.
പുനര് വിവാഹത്തോടെ ആദ്യ ഭര്ത്താവിന്റെ കുടുംബവുമായുള്ള ബന്ധം സ്ത്രീ വിച്ഛേദിക്കുമെന്ന ചിന്ത പഴകിയതാണ്. ഇവിടെ ഹര്ജിക്കാരി വിവാഹ മോചനം നേടിയതല്ലെന്നും കോടതി ചൂണ്ടിക്കാട്ടി. ട്രിബ്യൂണല് 7,64,500 രൂപയാണ് നല്കാന് വിധിച്ചത്. എന്നാല് ഇതു കുറവാണെന്ന് വിലയിരുത്തിയ ഹൈക്കോടതി വിവിധ വസ്തുതകള് കണക്കിലെടുത്ത് 23.2 ലക്ഷം രൂപ നഷ്ടപരിഹാരമായി നല്കാനും തുക ഒരു മാസത്തിനുള്ളില് പലിശ സഹിതം നല്കാനും നിര്ദേശിച്ചു.
https://www.facebook.com/Malayalivartha