സംസ്ഥാനത്ത് കൊവിഡ് 19 സ്ഥിരീകരിച്ച രോഗികളുടെ എണ്ണം പതിനായിരം കടന്നു. 10275 പേര്‍ക്കാണ് കേരളത്തില്‍ ഇതുവരെ രോഗം സ്ഥിരീകരിച്ചത്. സമ്ബര്‍ക്കത്തിലൂടെ രോഗം പകരുന്നവരുടെയെണ്ണം ദിനംപ്രതി കൂടി വരികയാണ്. ഇന്ന് മാത്രം 722 പേര്‍ക്കാണ് സംസ്ഥാനത്ത് രോഗം സ്ഥിരീകരിച്ചത്. ഇതില്‍ 481 പേര്‍ക്കാണ് സമ്ബര്‍ക്കത്തിലൂടെ രോഗം ബാധിച്ചിട്ടുളളത്. 187 പേര്‍ വിദേശത്ത് നിന്ന് വന്നവരും 62 പേര്‍ മറ്റു സംസ്ഥാനങ്ങളില്‍ നിന്നു വന്നവരുമാണ്. കൊവിഡ് ബാധിച്ച് രണ്ട് പേര്‍ മരണപ്പെടുകയും ചെയ്തു. ഇന്ന് മാത്രം 832 പേരെ ആശുപത്രിയില്‍ പ്രവേശിപ്പിച്ചു. ഇതില്‍ ഉറവിടം അറിയാത്ത 34 കേസുകളാണുളളത്. 12 ആരോഗ്യപ്രവര്‍ത്തകര്‍ക്കും ഇന്ന് രോഗം ബാധിച്ചിട്ടുണ്ട്. സംസ്ഥാനത്ത് 5372 പേര്‍ ഇനി ചികിത്സയിലുണ്ടെന്നും മുഖ്യമന്ത്രി പിണറായി വിജയന്‍ വ്യക്തമാക്കി.

തിരുവനന്തപുരം ജില്ലയിലാണ് ഇന്ന് ഏറ്റവും കൂടുതല്‍ കൊവിഡ് കേസുകള്‍ റിപ്പോര്‍ട്ട് ചെയ്തിട്ടുളളത്. 339 പേര്‍ക്കാണ് ഇവിടെ രോഗം സ്ഥിരീകരിച്ചത്. ഇതില്‍ 301 പേര്‍ക്ക് സമ്ബര്‍ക്കത്തിലൂടെയാണ് രോഗം ബാധിച്ചത്. തലസ്ഥാനത്ത് സമ്ബര്‍ക്ക വ്യാപനം കൂടി വരികയാണ്. രാമചന്ദ്ര ഹൈപ്പര്‍മാര്‍ക്കറ്റില്‍ കൂടുതല്‍ പേര്‍ക്ക് രോഗം സ്ഥിരീകരിച്ചതിനെ തുടര്‍ന്ന് രോഗികളെ കണ്ടെത്തി പരിശോധിക്കുക വലിയ വെല്ലുവിളിയാണെന്നും കടകളില്‍ പോയവര്‍ ആരോഗ്യവകുപ്പുമായി ഉടന്‍ ബന്ധപ്പെടണമെന്നും മുഖ്യമന്ത്രി വാര്‍ത്താ സമ്മേളനത്തില്‍ പറഞ്ഞു. തിരുവനന്തപുരത്തെ ഹൈപ്പര്‍മാര്‍ക്കറ്റില്‍ 81 പേരെ പരിശോധിച്ചതില്‍ 17 പേര്‍ക്ക് കൂടി കൊവിഡ് സ്ഥിരീകരിച്ചിട്ടുണ്ട്.
സംസ്ഥാനത്ത് ആകെ 271 ഹോട്ട്‌സ്‌പോട്ടുകളാണ് നിലവിലുളളത്. ലോക്ഡൗണ്‍ ഉള്‍പ്പെടെ നിയന്ത്രണ നടപടികളും നീരിക്ഷണവും ശക്തമാക്കിയിട്ടും കൊവിഡ് കേസുകള്‍ കൂടി വരുന്ന സ്ഥിതിയാണ് സംസ്ഥാനത്തുളളത്. സമ്ബര്‍ക്കത്തിലൂടെയുളള രോഗവ്യാപനം ആരോഗ്യ പ്രവര്‍ത്തകര്‍ക്കിടയില്‍ ഏറെ ആശങ്കയുണ്ടാക്കുന്നുണ്ട്.