ഇന്ത്യയുമായുള്ള ബന്ധം കൂടുതല്‍ ശക്തമാക്കുമെന്ന് ശ്രീലങ്കന്‍ പ്രധാനമന്ത്രി റനില്‍ വിക്രമസിംഗെ പറഞ്ഞു. എല്ലാരീതിയിലുമുള്ള സഹകരണവുമുണ്ടാകുമെന്നും റനില്‍ പറഞ്ഞു. ഇന്ത്യയുമായുള്ള ബന്ധം മെച്ചപ്പെടുത്തുമെന്നും താന്‍ ഇന്ത്യന്‍ അനുകൂലിയോ ചൈന അനുകൂലിയോ അല്ല. ശ്രീലങ്കന്‍ താത്പര്യങ്ങള്‍ സംരക്ഷിക്കുന്ന പ്രധാനമന്ത്രിയാണ്.

ഗുരൂവായൂര്‍ സന്ദര്‍ശനത്തിനെത്തിയപ്പോഴാണ് അദ്ദേഹം മാധ്യമങ്ങളോട് സംസാരിച്ചത്.ഗുരൂവായൂര്‍ ദേവസ്വത്തിന്റെ ആനത്താവളത്തില്‍ ആനകളെ എങ്ങനെ സംരക്ഷിക്കുന്നു എന്നതിനെക്കുറിച്ച് പഠിക്കാന്‍ ശ്രീലങ്കന്‍ ആന സംരക്ഷണ കേന്ദ്രത്തില്‍ നിന്നുള്ള സംഘത്തെ അയക്കും.

കൂടിയാട്ടം, മ്യൂറല്‍ പെയിന്റിംഗ് എന്നീ ഇന്ത്യന്‍ കലകളെ പ്രോത്സാഹിപ്പിക്കുമെന്നും അദ്ദേഹം വ്യക്തമാക്കി. അതിര്‍ത്തി ലംഘിച്ചാല്‍ ഇന്ത്യന്‍ മത്സ്യത്തൊഴിലാളികളെ വെടിവയ്ക്കുമെന്ന ശ്രീലങ്കന്‍ പ്രധാനമന്ത്രിയുടെ പ്രസ്താവന നേരത്തെ വിവാദമായിരുന്നു. ഏകദിന സന്ദര്‍ശനത്തിനായി ശ്രീലങ്കന്‍ പ്രധാനമന്ത്രി റനില്‍ വിക്രമസിംഗെ ഇന്ന് രാവിലെയാണ് കൊച്ചിയിലെത്തിയത്.

രാവിലെ 8.35 ന് കൊളംബോയില്‍ നിന്നുമുള്ള പ്രത്യേക വിമാനത്തിലാണു കൊച്ചിയിലെത്തിയത്. ഗുരുവായൂര്‍ ക്ഷേത്രദര്‍ശനത്തിനായി എത്തിയ ശ്രീലങ്കന്‍ പ്രധാനമന്ത്രിയും അഞ്ചംഗ സംഘവും വൈകുന്നേരം 4.15 ന് കൊളംബോയ്ക്കു മടങ്ങും.

നെടുമ്പാശേരിയിലെ സ്വകാര്യഹോട്ടലില്‍ വിശ്രമത്തിനു ശേഷം വിക്രമസിംഗെ 9.20നു ഗുരുവായൂര്‍ക്കു യാത്ര തിരിച്ചു. അദ്ദേഹത്തോടൊപ്പം പത്‌നി പ്രഫ. മൈത്രി വിക്രമസിംഗെ, ഹിന്ദുമത കാര്യ, പുനര്‍നിര്‍മ്മാണ മന്ത്രി സി.എം. സ്വാമിനാഥന്‍, റിട്ട. ഡപ്യൂട്ടി ഇന്‍സ്‌പെക്ടര്‍ ജനറല്‍ ഡബ്ല്യു. ഡബ്ല്യു. വിക്രമസിംഗെ, പിഎസ്ഒ അശോക് അരിയവന്‍, സുരക്ഷ ഉദ്യോഗസ്ഥന്‍ ഡബ്ല്യു. ഹെര്‍ത്ത് എന്നിവരുമുണ്ടായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha