കേരളത്തില്‍നിന്ന് ഒഴിവുവരുന്ന മൂന്ന് രാജ്യസഭാ സീറ്റിലേക്കുള്ള തെരഞ്ഞെടുപ്പ് ഇന്നു നടക്കും. യുഡിഎഫ് സ്ഥാനാര്‍ഥികളായി വയലാര്‍ രവി (കോണ്‍ഗ്രസ്), പി.വി. അബ്ദുള്‍ വഹാബ് (മുസ്‌ലിംലീഗ്), എല്‍ഡിഎഫ് സ്ഥാനാര്‍ഥികളായി കെ.കെ. രാഗേഷ് (സിപിഐ-എം), കെ. രാജന്‍ (സിപിഐ) എന്നിവര്‍ മത്സരിക്കും. നിയമസഭാ മന്ദിരത്തിന്റെ രണ്ടാം നിലയിലെ 620-ാം നമ്പര്‍ മുറിയിലാണു തെരഞ്ഞെടുപ്പ് നടക്കുക. രാവിലെ ഒന്‍പതു മുതല്‍ വൈകുന്നേരം നാലു വരെയാണു വോട്ടെടുപ്പ്. തുടര്‍ന്ന് വൈകിട്ട് അഞ്ചോടെ ഫലം ലഭ്യമാകും.139 പേര്‍ക്കാണു തിരഞ്ഞെടുപ്പില്‍ വോട്ടവകാശം ഉള്ളത്.
ഇതില്‍ 73 പേര്‍ യുഡിഎഫുകാരും 65 പേര്‍ എല്‍ഡിഎഫുകാരുമാണ്. ഒരു മുന്നണിയിലും പെടാത്ത കെ.ബി. ഗണേഷ്‌കുമാറാണു മറ്റൊരു വോട്ടര്‍. ആദ്യ റൗണ്ടില്‍ തന്നെ ജയിക്കാന്‍ കിട്ടേണ്ടത് 35 പ്രഥമ പരിഗണനാ വോട്ടാണ്. ഇതു പ്രകാരമാണെങ്കില്‍ യുഡിഎഫിന്റെ രണ്ടു സ്ഥാനാര്‍ഥികള്‍ക്കും ആദ്യ റൗണ്ടില്‍ തന്നെ വിജയിക്കാം. വോട്ട് ഓരോ രാഷ്ട്രീയ പാര്‍ട്ടിയുടെയും അംഗീകൃത ഏജന്റിനെ കാണിച്ച ശേഷം മാത്രം പെട്ടിയില്‍ നിക്ഷേപിക്കുന്ന സമ്പ്രദായമാണു രാജ്യസഭാ തിരഞ്ഞെടുപ്പിലുള്ളത്. വോട്ട് ചെയ്ത ശേഷം ബാലറ്റ് പേപ്പര്‍ അംഗീകൃത ഏജന്റിനെ കാണിക്കണമെന്നതു നിര്‍ബന്ധമാണ്.
എന്നാല്‍ ഈ തിരഞ്ഞെടുപ്പില്‍ വിപ് ഉണ്ടാകണമെന്നില്ല. സ്വന്തം പേന കൊണ്ടല്ല, പോളിങ് ബൂത്തില്‍ നല്‍കുന്ന വയലറ്റ് നിറമുള്ള സ്‌കെച്ച് പേന കൊണ്ടുവേണം വോട്ട് രേഖപ്പെടുത്തേണ്ടത്. എന്നാലും, ഒരു സ്ഥാനാര്‍ത്ഥിക്കും വോട്ട് ചെയ്യുന്നില്ലെന്നു കാണിക്കാന്‍ ഇലക്ട്രോണിക്‌സ് വോട്ടിംഗ് മെഷീനുകളില്‍ നണ്‍ ഓഫ് ദ എബവ് അഥവാ നോട്ടാ എന്ന ഓപ്ഷന്‍ ഉള്ളത് ഇവിടേയും ലഭ്യമാണ്. പാര്‍ട്ടിയിലെ ആഭ്യന്തരപ്രശ്‌നങ്ങളെതുടര്‍ന്ന് ചീഫ് വിപ്പ്സ്ഥാനം നഷ്ടപ്പെട്ട പി.സി. ജോര്‍ജ് വോട്ടെടുപ്പില്‍ സ്വീകരിക്കുന്ന നിലപാട് ശ്രദ്ധേയമാകും. വോട്ടുകള്‍ ഏകദേശം തുല്യമായി പങ്കിടാനാണ് യു.ഡി.എഫിന്റെ ധാരണ.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha