ടിപി സെന്കുമാര് ഡിജിപിയാകാതിരിക്കാന് ഐഎഎസ്-ഐപിഎസ് ലോബി, സാമുദായിക നേതാവിന്റെ എതിര്പ്പെന്ന് വ്യാജപ്രചരണം
സത്യസന്ധനായ പോലീസ് ഓഫീസറായ ജയില് ഡിജിപി ടിപി സെന്കുമാറിനെ പോലീസ് മേധാവിയാക്കാതിരിക്കാന് ഐഎഎസ് -ഐപിഎസ് ലോബി സര്ക്കാരില് സമ്മര്ദ്ദം തുടങ്ങി. ഇതിന് ചില രാഷ്ടീയ നേതാക്കളുടെ പിന്തുണകൂടിയുണ്ട്. ടി.പി. സെന്കുമാറിനെ പൊലീസ് മേധാവിയാക്കാതിരിക്കാന് ആസൂത്രിത ഗൂഢനീക്കമാണ് തലസ്ഥാനത്ത് നടക്കുന്നത്. അദ്ദേഹം മേധാവിയാകുന്നത് തടയാനായി കേന്ദ്ര ഡെപ്യൂട്ടേഷനിലുള്ള മഹേഷ്കുമാര് സിംഗ്ലയെ മടക്കിക്കൊണ്ടുവരാനാണ് നീക്കം.
രണ്ട് മുന് ഡി.ജി.പിമാരുടെയും ഒരു അഡി. ഡി.ജി.പിയുടെയും നേതൃത്വത്തിലാണ് സെന്കുമാറിനെതിരായ കരുനീക്കങ്ങള് നടത്തുന്നതെന്ന് ആരോപണമുണ്ട്.
സിവില് സര്വീസ് പരീക്ഷയില് 1982ല് എട്ടാം റാങ്കോടെ ഇന്ത്യന് ഇക്കണോമിക്സ് സര്വീസിലും (ഐ.ഇ.എസ്) 1983ല് 23ാം റാങ്കോടെ ഇന്ത്യന് പൊലീസ് സര്വീസിലും (ഐ.പി.എസ്) എത്തിയ സെന്കുമാര് വ്യാജ ജാതി സര്ട്ടിഫിക്കറ്റ് ഹാജരാക്കി ഐ.പി.എസില് കടന്നുകൂടിയെന്ന വ്യാജ പ്രചാരണം അഴിച്ചുവിട്ട് അദ്ദേഹത്തിന്റെ സ്ഥാനക്കയറ്റം തടയാന് വര്ണവിദ്വേഷത്തോടെ നേരത്തേ ശ്രമം നടത്തിയിരുന്നു.
നാല് ഡി.ജി.പിമാരില് പൊലീസ് മേധാവി കെ.എസ്. ബാലസുബ്രഹ്മണ്യന്, അലക്സാണ്ടര് ജേക്കബ് എന്നിവര് മേയില് വിരമിക്കും. ടി.പി. സെന്കുമാര്, വിജിലന്സ് ഡയറക്ടര് വിന്സണ് എം. പോള് എന്നിവരാണ് ശേഷിക്കുന്നത്. 1984 ബാച്ചുകാരനായ വിന്സണ് എം. പോളിന്റെ സേവനം നവംബറില് അവസാനിക്കും. 1983 ബാച്ചുകാരനായ സെന്കുമാറിനാവട്ടെ, 2017 ജൂണ് വരെ കാലാവധിയുണ്ട്. ഇത് മുന്കൂട്ടി കണ്ടാണ് 2017 ഫെബ്രുവരി വരെ സേവനമുള്ള സിംഗ്ലയെ കേരളത്തില് എത്തിക്കാനുള്ള ശ്രമം.
വിജിലന്സ് ഡയറക്ടറായിരിക്കെ കേരളം വിട്ട സിംഗ്ല ഒരു വര്ഷമായി ബി.എസ്.എഫില് അഡിഷണല് ഡയറക്ടറാണ്. എസ്.പിയായിരിക്കെ കേന്ദ്ര ഡെപ്യൂട്ടേഷന് അപേക്ഷിക്കുകയും ഉത്തരവ് വന്നപ്പോള് പിന്മാറുകയും ചെയ്തതിന് സിംഗ്ലയെ അഞ്ചുവര്ഷം കേന്ദ്രം കരിമ്പട്ടികയില് ഉള്പ്പെടുത്തിയിരുന്നു.
അഞ്ചുവര്ഷത്തേക്കാണ് സിംഗ്ലയുടെ ഡെപ്യൂട്ടേഷന്. ഡെപ്യൂട്ടേഷന് റദ്ദാക്കാന് കേന്ദ്ര ആഭ്യന്തര മന്ത്രാലയത്തിന് അദ്ദേഹം അപേക്ഷ നല്കിയിട്ടില്ല. എന്നാല്, മടങ്ങിയെത്താന് തയ്യാറാണെന്ന് കാണിച്ച് അദ്ദേഹം കഴിഞ്ഞ ദിവസം ചീഫ് സെക്രട്ടറിക്ക് കത്തയച്ചു. സിംഗ്ലയുടെ അപേക്ഷ സര്ക്കാരിന് പരിഗണിക്കാനാവില്ലെന്നാണ് അറിയുന്നത്. എങ്കിലും, അദ്ദേഹത്തെ ഡി.ജി.പിയാക്കുമെന്ന മട്ടിലാണ് പ്രചാരണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
