അടുത്ത നിയമസഭാ തിരഞ്ഞെടുപ്പില്‍ പിണറായി വിജയന്‍ മുഖ്യമന്ത്രി സ്ഥാനാര്‍ത്ഥിയാകണോയെന്ന് പാര്‍ട്ടി പിന്നീട് തീരുമാനിക്കുമെന്ന് സിപിഎമ്മിന്റെ പുതിയ ജനറല്‍സെക്രട്ടറി സിതാറാം യെച്ചൂരി. ഒരു പ്രമുഖ മാധ്യമത്തിന് നല്‍കിയ അഭിമുഖത്തിലാണ് യെച്ചൂരി ഇക്കാര്യം വ്യക്തമാക്കിയത്. പിണറായിയെ മുഖ്യമന്ത്രി സ്ഥാനാര്‍ത്ഥിയായി ഉയര്‍ത്തിക്കാട്ടിയാല്‍ അത് ഇടതു പക്ഷത്തിന് തിരിച്ചടിയുണ്ടാക്കുമെന്ന ആശങ്ക യെച്ചൂരിക്കുണ്ട്. മുന്നണിയിലെ ഘടക കക്ഷികള്‍ക്ക് പോലും ഈ അഭിപ്രായമുണ്ട്. ഈ സാഹചര്യത്തില്‍ പിണറായിയെ മുഖ്യമന്ത്രിയായി പാര്‍ട്ടി ഉര്‍ത്തിക്കാട്ടില്ല. തെരഞ്ഞെടുപ്പ് ഫലം വന്നശേഷം മുഖ്യമന്ത്രിയെ നിശ്ചയിക്കാമെന്ന അവസ്ഥ വരും. ഇതിലൂടെ സ്വാഭാവിക മുഖ്യമന്ത്രിയായി മാറാനുള്ള പിണറായിയുടെ സാധ്യതയാണ് ഇവിടെ ചോദ്യം ചെയ്യപ്പെടുന്നത്.
സെക്രട്ടറി സ്ഥാനത്ത് നിന്ന് ഒഴിഞ്ഞ പിണറായി പാര്‍ലമെന്ററീ രംഗത്ത് സജീവമായി മുഖ്യമന്ത്രിയാകാനാണ് ശ്രമിക്കുന്നത്. ലാവ്‌ലിന്‍ കേസിലെ പ്രതിസ്ഥാനത്ത് നിന്ന് ഒഴിവാക്കപ്പെട്ട സാഹചര്യത്തില്‍ പാര്‍ലമെന്ററീ രംഗത്ത് മടങ്ങിയെത്താന്‍ പിണറായിക്കാകും. ഈ നീക്കങ്ങള്‍ക്കാണ് യെച്ചൂരിയുടെ സെക്രട്ടറി സ്ഥാനത്തോടെ കരിനിഴല്‍ വീഴുന്നത്.ജനങ്ങളുടെ ആഗ്രഹങ്ങള്‍ പ്രതിഫലിപ്പിക്കുന്ന പാര്‍ട്ടിയായി സിപിഐ(എം) മാറണമെന്നാണ് യെച്ചൂരിയുടെ അഭിപ്രായം. വീരേന്ദ്ര കുമാറിന്റെ ജനതാദളിനേയും ആര്‍എസ്പിയേയും മുന്നണിയില്‍ നിന്ന് പുറത്താക്കിയത് ജനതാല്‍പ്പര്യത്തിന് യോജിച്ച വിധമായിരുന്നില്ല. പിണറായി വിജയന്റെ വ്യക്തി താല്‍പ്പര്യമാണ് പ്രതിഫലിച്ചത്. അത് കേരളത്തില്‍ സിപിഎമ്മിന് ഭരണത്തുടര്‍ച്ച നഷ്ടമാക്കി. വി എസ് അച്യുതാനന്ദന്‍ വീണ്ടും മുഖ്യമന്ത്രിയാകാതിരിക്കാനായിരുന്നു ഇതെന്ന വിലയിരുത്തല്‍ യെച്ചൂരിക്കുണ്ട്. ഈ സാഹചര്യത്തിലാണ് ജനതാദളിനേയും ആര്‍എസ്പിയേയും മടക്കിക്കൊണ്ടുവരാന്‍ നീക്കം. ഇതിനൊപ്പം സിപിഎമ്മിന്റെ സംസ്ഥാന നേതൃത്വത്തിലേക്ക് ജനാധിപത്യ കേന്ദ്രീകൃതമായ ചര്‍ച്ച തിരികെ കൊണ്ടു വരും. ഭൂരിപക്ഷത്തിന്റെ കരുത്തിലുള്ള വെട്ടി നിരത്തലിന് ആരേയും അനുവദിക്കില്ല. കഴിഞ്ഞ ആറു വര്‍ഷമായി ഇത്തരത്തിലുള്ള പ്രവര്‍ത്തനമാണ് കേരളത്തില്‍ നടക്കുന്നതെന്ന് യെച്ചൂരിക്ക് അഭിപ്രായമുണ്ട്. ബംഗാളില്‍ പാര്‍ട്ടിക്ക് തിരിച്ചടിയേറ്റതോടെ കേന്ദ്ര നേതൃത്വത്തെ കേരളത്തിലെ ചിലര്‍ ഹൈജാക്ക് ചെയ്യാന്‍ ശ്രമിക്കുന്നുവെന്ന് യെച്ചൂരിക്ക് അറിയാം. ഇത് അനുവദിക്കില്ല. സംസ്ഥാന സമിതിയുടെ എല്ലാ തീരുമാനത്തേയും കണ്ണടച്ച് അനുകൂലിച്ച പ്രകാശ് കാരാട്ടിന്റെ രീതിയാകില്ല യെച്ചൂരി പിന്തുടരുക. വി എസ് അച്യുതാനന്ദനെ വിശ്വാസത്തിലെടുത്താകും യെച്ചൂരിയുടെ മുന്നോട്ട് പോക്കെന്നും ഉറപ്പാണ്
പ്രതിപക്ഷ നേതാവ് വി.എസ്. അച്യുതാനന്ദനെ അനുകൂലിച്ച് സി.പി.എമ്മിലെ പുതിയ ജനറല്‍ സെക്രട്ടറി സീതാറാം യെച്ചൂരി രംഗത്ത് വന്നതും ശ്രദ്ധേയമായി. വി.എസ് തനിക്ക് ആശംസയര്‍പ്പിച്ചതില്‍ അപാകതയില്ലെന്നാണ് യെച്ചൂരി വ്യക്തമാക്കിയത്. വി.എസ് പാര്‍ട്ടിയുടെ മുതിര്‍ന്ന നേതാവാണെന്നും അദ്ദേഹത്തിന്റെ സംഭാവനകള്‍ തുടരണമെന്നും യെച്ചൂരി പറഞ്ഞു.
വി.എസിനോട് എന്നും അടുപ്പവും അനുഭാവവും പ്രകടിപ്പിക്കുന്ന നേതാവാണ് യെച്ചൂരി. അത് വീണ്ടും ഉറപ്പിക്കുകയാണ് യെച്ചൂരി ചെയ്തിരിക്കുന്നത്. വി.എസിനെ കേന്ദ്ര കമ്മിറ്റിയിലെ പ്രത്യേക ക്ഷണിതാവാക്കിയതും യെച്ചൂരിയുടെ ശക്തമായ നിലപാട് മൂലമാണ്. യെച്ചൂരിയുടെ വി.എസ് അനുഭാവ നിലപാട് കേരളത്തിലെ പാര്‍ട്ടിയില്‍ അലയടിച്ചേക്കാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha