പാചകവാതക ക്ഷാമം രൂക്ഷം, ഉദയംപേരൂരിലും പാരിപ്പള്ളിയിലും സമരം തുടരുന്നു
പാചക വാതക ക്ഷാമം രൂക്ഷമായിട്ടും സമരം തുടരുന്നു. ഉദയംപേരൂര്‍, പാരിപ്പള്ളി എല്‍പിജി പ്‌ളാന്റുകളിലെ സമരം ഇപ്പോഴും തുടരുകയാണ്. ഇന്ത്യന്‍ ഓയില്‍ കോര്‍പറേഷന്റെ കൊച്ചി ഉദയംപേരൂര്‍ എല്‍.പി.ജി ബോട്ട്‌ലിംഗ് പ്ലാന്റിലെ ഹൗസ് കീപ്പിംഗ് കയറ്റിറക്ക് തൊഴിലാളികളും കൊല്ലം പാരിപ്പള്ളിയില്‍ ട്രക്കുകളുടെ കരാര്‍ പുതുക്കലുമായി ബന്ധപ്പെട്ടുമാണ് ഇപ്പോള്‍ സമരം നടക്കുന്നത്. രണ്ട് പ്‌ളാന്റുകളിലും സമരം ശക്തമായതോടെ കേരളത്തില്‍ പാചകവാതകം വിതരണം പൂര്‍ണമായും നിലച്ചിരിക്കുകയാണ്.
ഉദയംപേരൂരിലെ അനിശ്ചിതകാല സമരം അഞ്ചാംദിവസത്തിലേക്ക് കടന്നതോടെ എട്ട് ജില്ലകളില്‍ സിലിണ്ടര്‍ ക്ഷാമം രൂക്ഷമായി. കഴിഞ്ഞ വ്യാഴാഴ്ചയാണ് സംയുക്ത സമരസമിതിയുടെ നേതൃത്വത്തില്‍ പണിമുടക്ക് തുടങ്ങിയത്. ഇന്നലെ നെട്ടൂരില്‍ നടത്തിയ മൂന്നാംവട്ട ചര്‍ച്ചയും പരാജയപ്പെട്ടു.
ജനുവരി 31ന് കാലാവധി തീര്‍ന്ന സേവനവേതന കരാര്‍ പുതുക്കി നിശ്ചയിക്കുക, ഇടക്കാലാശ്വാസമായി 10000 രൂപ വീതം നല്‍കുക തുടങ്ങിയ ആവശ്യങ്ങളുന്നയിച്ചാണ് സി.ഐ.ടി.യു, ഐ.എന്‍.ടി.യു.സി, ഐ.ഒ.സി.ഇ.യു സംഘടനകളുടെ ആഭിമുഖ്യത്തില്‍ പണിമുടക്കുന്നത്. മൂന്നുമാസത്തേക്ക് ഇടക്കാലാശ്വാസമായി 6000 രൂപ വേണമെന്ന് സമരക്കാര്‍ ആവശ്യപ്പെട്ടു. 3500 രൂപ നല്‍കാമെന്ന് കരാറുകാരന്‍ അറിയിച്ചെങ്കിലും സമരക്കാര്‍ക്ക് സ്വീകാര്യമായില്ല.
പിന്നീട് ഐ.ഒ.സി പ്ലാന്റ് മാനേജര്‍ ഗിരീഷ്‌കുമാറും കരാറുകാരനുമായി ചര്‍ച്ച നടത്തിയതിനെ തുടര്‍ന്ന് 4000 രൂപ ഇടക്കാലാശ്വാസം നല്‍കാന്‍ കരാറുകാരന്‍ സമ്മതിച്ചു. ഇതിന് കരാര്‍ വേണമെന്ന് നിര്‍ബന്ധം പിടിച്ചതോടെ ചര്‍ച്ച അലസിപ്പിരിഞ്ഞു. തുടര്‍ചര്‍ച്ചകള്‍ അസി. ലേബര്‍ കമ്മിഷണറുടെ നേതൃത്വത്തില്‍ നടത്താനും തീരുമാനിച്ചു. സമരം തുടരുന്നതിനാല്‍ പുതിയ കരാറുകാരന്‍ ചുമതല ഏറ്റെടുത്തിട്ടില്ല. സമരം തീര്‍ന്ന് പുതിയ വര്‍ക് ഓഡര്‍ നല്‍കി കാര്യങ്ങള്‍ പഴയപടിയാവാന്‍ പിന്നെയും ദിവസങ്ങളെടുക്കും. ഇവിടെ നിന്ന് ദിവസവും 50000 സിലിണ്ടറുകളാണ് പ്രതിദിനം പുറത്തേക്ക് പോയിരുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
