കേരളത്തില്‍ ഒഴിവു വന്ന രാജ്യസഭാ സീറ്റുകളിലേക്കു നടന്ന തെരഞ്ഞെടുപ്പില്‍ യുഡിഎഫ് സ്ഥാനാര്‍ഥികളായ വയലാര്‍ രവിയും അബ്ദുള്‍വഹാബും വിജയിച്ചു. എല്‍ഡിഎഫ് സ്ഥാനാര്‍ഥിയായ കെ.കെ രാഗേഷും രാജ്യസഭയിലേക്ക് തെരഞ്ഞെടുക്കപ്പെട്ടു.
വയലാര്‍ രവിക്ക് 37 വോട്ടും അബ്ദുള്‍വഹാബിന് 36 വോട്ടുമാണ് ലഭിച്ചത്. യുഡിഎഫ് പക്ഷത്ത് നിന്നും വോട്ടു ചോര്‍ച്ച ഉണ്ടായില്ല. എല്‍ഡിഎഫ് സ്ഥാനാര്‍ഥിയായ കെ.കെ രാഗേഷിന് 37 വോട്ടുകളാണ് ലഭിച്ചത്. എല്‍ഡിഎഫില്‍ നിന്നും മത്സരിച്ച സിപിഐ നേതാവ് കെ. രാജന്‍ പരാജയപ്പെട്ടു. 29 വോട്ടുകള്‍ മാത്രമാണ് കെ. രാജന് ലഭിച്ചത്.
യുഡിഎഫ് വിട്ട കെ.ബി. ഗണേഷ്‌കുമാറിന്റേതുള്‍പ്പെടെ 66 വോട്ടുകളാണു എല്‍ഡിഎഫിനു ലഭിച്ചത്. യുഡിഎഫ് വോട്ടുകളില്‍ വിള്ളല്‍ ഉണ്ടാകുമെന്നും അത് തങ്ങള്‍ക്ക് ലഭിക്കുമെന്നുമുള്ള കണക്കുകൂട്ടലുകള്‍ എല്‍ഡിഎഫിന് ഉണ്ടായിരുന്നു. എന്നാല്‍ ഇതു തെറ്റി. നിലവിലെ സാഹചര്യങ്ങളില്‍ രാജ്യസഭയില്‍ കൂടുതല്‍ പ്രവര്‍ത്തിക്കുവാന്‍ ഉണ്‌ടെന്നു വിജയിച്ച വയലാര്‍ രവി മാധ്യമങ്ങളോടു പറഞ്ഞു. തന്റെ സ്ഥാനാര്‍ഥിത്വവുമായി ബന്ധപ്പെട്ടു മുസ്ലീം ലീഗില്‍ ഉണ്ടായ തര്‍ക്കങ്ങളെ കുറിച്ച് പ്രതികരിക്കുവാന്‍ വഹാബ് തയാറായില്ല.
ദേശീയ തലത്തില്‍ ഇടതുപക്ഷത്തെ ശക്തിപ്പെടുത്തുവാന്‍ ഈ അവസരം വിനയോഗിക്കുമെന്ന് കെ.കെ. രാഗേഷ് പറഞ്ഞു. യുഡിഎഫിന്റെ വിജയം സാങ്കേതികം മാത്രമാണെന്നു കെ. രാജന്‍ പ്രതികരിച്ചു. എല്‍ഡിഎഫിന് മുമ്പ് ഉണ്ടായിരുന്നതിലും കൂടുതല്‍ വോട്ട് ലഭിച്ചതു എല്‍ഡിഎഫ് കൂടുതല്‍ ശക്തപ്പെടുന്നുവെന്നതിന്റെ തെളിവാണെന്നും അദ്ദേഹം കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha