ലോകത്തിലെ ഏറ്റവും വലിയ പ്രതിമ 5 മില്ലീമീറ്ററില് തീര്ത്ത് റെക്കോര്ഡ് നേടി തൃശൂര് സ്വദേശി
സ്റ്റാച്യൂ ഓഫ് യൂണിറ്റി എന്ന് പേരിട്ടിരിക്കുന്ന ലോകത്തിലെ ഏറ്റവും വലിയ പ്രതിമയാണ് ഗുജറാത്തിലെ സര്ദാര് സരോവര് അണക്കെട്ടിലെ ജലാശയമധ്യത്തിലായുള്ള സാധൂ ബെറ്റ് എന്ന ദ്വീപില് ഇന്ത്യയുടെ അഭിമാനമായി തലയുയര്ത്തി നില്ക്കുന്ന സര്ദാര് വല്ലഭായ് പട്ടേലിന്റെ പൂര്ണകായ രൂപം. 182 മീറ്റര് ഉയരമുള്ള പ്രതിമയെ 5 മില്ലീമീറ്ററിലേക്ക് ചുരുക്കിയിരിക്കുയാണ് തൃശൂര് മണ്ണുത്തി വെറ്റിനറി കോളേജിലെ പിജി വിദ്യാര്ഥിയായ വി എസ് സ്വാതിഷ്. പെന്സില് മുനമ്പില് നിര്മ്മിച്ച ഈ ശില്പം കാണണമെങ്കില് ലെന്സിന്റെ സഹായം വേണം. ഇന്ത്യാ ബുക്ക് ഓഫ് റെക്കോര്ഡില് ഇടം നേടിയിരിക്കുകയാണ് പട്ടേലിന്റെ ഈ കുഞ്ഞന് പ്രതിമ. സ്വാതിഷ് ഇത്തരത്തില് നൂറിലധികം ശില്പങ്ങളാണ് നേരത്തെ നിര്മ്മിച്ചിട്ടുള്ളത്. പെന്സിലും, ക്രയോണുകളും, ചോക്കുകളും, ടൂത്ത് പിക്കുകള് പോലും സ്വാതിഷിന്റെ ശില്പങ്ങള്ക്ക് വഴിമാറി.
പെന്സില് മുനമ്ബില് കുത്തബ് മിനാറും ഈഫല്ടവറും ചോക്കിന്മുനയില് ചാര്ലി ചാപ്ലിനും ഏണസ്റ്റോ ചെ ഗുവേരയും ഉള്പ്പെടെ ഈ നിര്മ്മിതികളില് ഉള്പ്പെടും. സംസ്ഥാനത്തുടനീളം നിരവധി പ്രദര്ശനങ്ങള് നടത്തിയിട്ടുണ്ട്.
മൈക്രോ ആര്ട്ട് എന്ന് പേരുള്ള ഈ കലാരൂപം മലയാളികളെ സംബന്ധിച്ച് അത്ര പരിചിതമായ ഒന്നല്ല. ഒരു ശില്പത്തിന്റെ നിര്മ്മാണത്തിന് ശ്രദ്ധയും സൂക്ഷ്മതയും ക്ഷമയും സമയവുമെല്ലാം ഒരുപോലെ വിനിയോഗിക്കണം. ചില ശില്പങ്ങള് പൂര്ത്തീകരിക്കാന് മണിക്കൂറുകളെന്നല്ല ദിവസങ്ങള് തന്നെ വേണ്ടി വരും. മൈക്രോ ആര്ട്ട് ആസ്വദിക്കാന് സൂക്ഷമമായ നിരീക്ഷണപാടവം കൂടിവേണം.
പട്ടേല് പ്രതിമാനിര്മ്മാണത്തിന് അഞ്ച് മണിക്കൂറെടുത്തുവെന്ന് സ്വാതിഷ് പറയുന്നു. സര്ജിക്കല് ബ്ലേഡ് ഉപയോഗിച്ചാണ് ശില്പനിര്മ്മാണം പൂര്ത്തിയാക്കിയത്. വെറ്റിനറി ഗൈനക്കോളജി വിദ്യാര്ഥിയായ സ്വാതിഷ് ഒഴിവുസമയങ്ങളിലാണ് മൈക്രോ ആര്ട്ടില് ഏര്പ്പെടുന്നത്.
https://www.facebook.com/Malayalivartha