കാലവര്‍ഷത്തിനു തുല്യമായി തകര്‍ത്തുപെയ്യുന്ന വേനല്‍മഴ കേരളത്തിലെ മിക്ക പ്രദേശങ്ങളെയും വെള്ളക്കെട്ടിലാക്കി. തിരുവനന്തപുരം ജില്ലയില്‍ മിന്നലേറ്റും വൈദ്യുതാഘാതമേറ്റും മൂന്നുപേര്‍ മരിച്ചു. മിന്നലില്‍ നാലുപേര്‍ക്കു പരുക്കേറ്റു. സംസ്ഥാനത്ത് ഇന്നു മഴയ്‌ക്കൊപ്പം ചുഴലിക്കാറ്റിനും ഇടിമിന്നലിനും സാധ്യതയുണ്ടെന്നാണു മുന്നറിയിപ്പ്.

കന്യാകുമാരിക്കടുത്ത് ഉള്‍ക്കടലില്‍ രൂപംകൊണ്ട ന്യൂനമര്‍ദമാണു വേനല്‍മഴ ശക്തമാകാന്‍ കാരണം. കേരളത്തിനു പുറമെ തമിഴ്‌നാട്ടിലും കര്‍ണാടകയിലും ശക്തമായ മഴ പെയ്യുമെന്നാണു പ്രവചനം. ചുഴലിക്കാറ്റിനു സാധ്യതയുള്ളതിനാല്‍ ജാഗ്രത പാലിക്കണമെന്നു ദുരന്തനിവാരണ വിഭാഗം മുന്നറിയിപ്പു നല്‍കി. തിരുവനന്തപുരം ജില്ലയില്‍ കലക്ടര്‍ അതീവ ജാഗ്രതാനിര്‍ദേശം നല്‍കിയിട്ടുണ്ട്. തഹസില്‍ദാര്‍, വില്ലേജ് ഓഫിസര്‍മാര്‍ തുടങ്ങിയവരോടു തിരികെ ഓഫിസിലെത്താനും നിര്‍ദേശിച്ചു.

വേനല്‍മഴ 25 വരെ തുടരും. കടല്‍ത്തീരത്തു മല്‍സ്യബന്ധന ഉപകരണങ്ങള്‍ സൂക്ഷിക്കുന്ന പുരയില്‍ വിശ്രമിക്കുകയായിരുന്ന വിഴിഞ്ഞം പുതിയതുറ ഉരിയരിക്കുന്നില്‍ മിഖായേല്‍ അടിമ (66), പുതിയതുറ ചെക്കിട്ടവിളാകത്തില്‍ ഫ്രെഡി (54) എന്നീ മല്‍സ്യത്തൊഴിലാളികളാണു വൈകിട്ട് ആറരയോടെ മിന്നലേറ്റു മരിച്ചത്. ഇവര്‍ക്കൊപ്പമുണ്ടായിരുന്ന സെബാസ്റ്റിയന്‍ (45), ജോണി (45), യേശുദാസ് (38), സെല്‍വരാജന്‍ (45)എന്നിവര്‍ക്കാണു പരുക്കേറ്റത്. ഇവരെ ആശുപത്രിയിലെത്തിച്ചു.

കുന്നുകുഴി ആര്‍സി ജംക്ഷന്‍ ഗോവിന്ദമംഗലം ട്രിവാന്‍ഡ്രം കോ ഓപ്പറേറ്റീവ് ബാങ്കിന് എതിര്‍വശത്തു താമസിക്കുന്ന ജഗത് പുരുഷോത്തമന്‍ (54) ആണു വീടിനു മുന്നില്‍ കയറിയ വെള്ളം വഴിതിരിച്ചുവിടാനുള്ള ശ്രമത്തിനിടെ വൈദ്യുതാഘാതമേറ്റു മരിച്ചത്. വൈദ്യുതാഘാതമേറ്റു തെറിച്ചുവീണ ഇദ്ദേഹത്തെ ജനറല്‍ ആശുപത്രിയില്‍ എത്തിച്ചു. എന്നാല്‍ ജീവന്‍ രക്ഷിക്കാനായില്ല. തുടര്‍ന്നു വീട്ടിലേക്കു വൈദ്യുതിപ്രവാഹം ഉണ്ടെന്ന സംശയത്തില്‍ വീട്ടിലുള്ള മറ്റുള്ളവരെ സമീപത്തെ വീട്ടിലേക്കു മാറ്റി. അതിനുശേഷം കെഎസ്ഇബി അധികൃതര്‍ എത്തി വീട്ടിലേക്കുള്ള വൈദ്യുതി വിച്‌ഛേദിച്ചു.

ഉച്ചയ്ക്കു ശേഷം തുടങ്ങിയ മഴ തെക്കന്‍ ജില്ലകളില്‍ മണിക്കൂറുകളോളം നീണ്ടുനിന്നു. മരങ്ങള്‍ കടപുഴകി പലയിടത്തും ഗതാഗതവും വൈദ്യുതിയും തടസ്സപ്പെട്ടു. മിന്നലില്‍ വ്യാപക നാശനഷ്ടമുണ്ടായി. ഞൊടിയിടയില്‍ മിന്നല്‍പ്രളയം ഉണ്ടാക്കിയ മഴ തലസ്ഥാനത്തെ വെള്ളക്കെട്ടിലാക്കി. പ്രധാന റോഡുകളിലടക്കം മുട്ടറ്റം വെള്ളമുയര്‍ന്നതോടെ പലയിടത്തും ഗതാഗതം മണിക്കൂറുകളോളം മുടങ്ങി. താഴ്ന്ന പ്രദേശങ്ങളില്‍ പലയിടത്തും വീടുകളില്‍ വെള്ളം കയറി.

തെക്കന്‍ ജില്ലകളില്‍ മണ്ണിടിച്ചിലിനു സാധ്യതയുള്ളതിനാല്‍ മലയോര മേഖലകളില്‍ രാത്രി ഗതാഗതത്തിനു നിയന്ത്രണം ഏര്‍പ്പെടുത്തി. അടിയന്തര ഘട്ടങ്ങളില്‍ സഹായമെത്തിക്കാന്‍ പൊലീസും ഫയര്‍ഫോഴ്‌സും രംഗത്തിറങ്ങണമെന്നു ഡിജിപിയോട് ആഭ്യന്തരമന്ത്രി നിര്‍ദേശിച്ചു. ഏതാനും ദിവസമായുണ്ടായിരുന്ന വേനല്‍മഴ ഇന്നലെ കേരളത്തിന്റെ തെക്ക് മുതല്‍ വടക്ക് വരെ തകര്‍ത്തുപെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha