ബീഹാറില്‍ രക്ഷിതാക്കള്‍ തുണ്ട് കൊടുത്ത് മക്കളെ ജയിപ്പിക്കുന്നു, കേരളത്തില്‍ സര്‍ക്കാര്‍ തന്നെ വിദ്യാര്‍ഥികളെ ജയിപ്പിക്കുന്നു!
പത്താം ക്ലാസ് പരീക്ഷയ്ക്കുവേണ്ടി ബീഹാറുകാര്‍ തുണ്ട് വെച്ച് കഷ്ടപ്പെട്ട് ജയിക്കുമ്പോള്‍ കേരളത്തില്‍ സര്‍ക്കാര്‍ തന്നെ വിദ്യാര്‍ഥികളെ വെറുതെ എ പ്ലസും കൊടുത്ത് വിജയിപ്പിച്ചു വിടുന്നു. രണ്ട് മാസം മുമ്പാണ് ബീഹാറിലെ സ്‌കൂളുകളില്‍ പത്താംക്ലാസ് വിദ്യാര്‍ഥികള്‍ക്ക് പരീക്ഷ ജയിക്കാനായി തുണ്ടുകൊടുക്കാനും വെളിയിലിരുന്ന് എഴുതിയ പേപ്പര്‍ കുട്ടികളിലെത്തിക്കാനുമായി വലിയ മതിലുകളിലും സ്‌കൂളിന്റെ ചുമരുകളിലും ചിലന്തിയെപ്പോലെ വലിഞ്ഞ് കയറുന്ന രക്ഷിതാക്കളെയും ബന്ധുക്കളെയും കേരളം കണ്ടത്.
ബീഹാറുകാര്‍ ഇത്രയും ചെയ്ത് കഷ്ടപ്പെട്ടിട്ടാണ് അവരുടെ കുട്ടികളെ ജയിപ്പിച്ചതെങ്കില്‍ കേരളത്തില്‍ ശരീരമനങ്ങാതെ സര്‍ക്കാര്‍ ചിലവില്‍ എ പ്ലസും വാങ്ങിപ്പോകുന്ന വിദ്യാര്‍ഥികളാണ് ഉള്ളത്. ബീഹാറിലെ വിദ്യാര്‍ഥികളെ രക്ഷിതാക്കള്‍ സഹായിക്കുമ്പോള്‍ ഇവിടെത്തെ കുട്ടികളെ സഹായിക്കുന്നത് സര്‍ക്കാരാണ്. ബീഹാറിലെ കുട്ടികള്‍ തുണ്ട് നോക്കിയെഴുതുന്നത് കൊണ്ട് അവര്‍ക്ക് വായിക്കാനും എഴുതാനും അറിയാമായിരിക്കുമെന്ന ഉറപ്പെങ്കിലുമുണ്ട്! ഉത്തരകടലാസില്‍ ക്ലാസില്‍ നില്‍ക്കുന്ന അധ്യാപകന്റെ ചിത്രവും വരച്ച് ഇറങ്ങുന്ന കുട്ടിക്ക് എഴുത്തും വായനയും പഠിച്ചില്ലെങ്കിലും കിട്ടും സര്‍ക്കാരിന്റെവക ഫ്രീ എപ്ലസ് !
കേരള സര്‍ക്കാര്‍ ഇല്ലാതാക്കുന്നത് വിദ്യാര്‍ഥികളുടെ ഭാവിയാണെന്ന് വിദ്യാഭ്യാസ വിദഗ്ദ്ധര്‍ തന്നെ പറയുന്നു. എന്തിനുവേണ്ടിയാണ് ഇത്രയും കുട്ടികളെ ജയിപ്പിച്ച് സര്‍ക്കാര്‍ കൈയ്യടി നേടുന്നത്. ഇനി ഭരണത്തില്‍ വന്നാല്‍ എസ്എസ്എല്‍സിക്ക് വിജയം 100 ശതമാനമാക്കുമെന്ന് അടുത്ത ഇലക്ഷന് വാഗ്ദാനം നല്‍കാനോ! സര്‍ക്കാരിന്റെ സഹായത്താല്‍ എ പ്ലസ് വാങ്ങിവരുന്ന കുട്ടികള്‍ എഴുത്തും വായനയുമറിയാതെ കേരളത്തിലെ തൊഴില്‍രഹിതരുടെ അംഗസംഖ്യ കൂട്ടാനേ സഹായിക്കൂ. മോഡറേഷനില്ലാത്ത വന്‍ വിജയമാണ് എസ്എസ്എല്‍സിക്ക് ഉണ്ടായതെന്ന് ഇപ്പോഴത്തെ ഫലം പ്രഖ്യാപിക്കവെ വിദ്യാഭ്യാസ മന്ത്രി തന്നെ പറഞ്ഞു . സര്‍ക്കാര്‍ ഇപ്രകാരം ചെയ്യുന്നത് വിദ്യാര്‍ഥികളുടെ ഭാവി ഇരുളടഞ്ഞതാക്കാനേ ഇടയാക്കൂ.
ഇനിയും സംസ്ഥാനത്ത് പ്ലസ്ടു സ്‌കൂളുകള്‍ അനുവദിച്ച് അഴിമതി നടത്താന്‍ കൂടിയാണ് അഞ്ചുലക്ഷം വിദ്യാര്‍ഥികളുടെ ഭാവിവെച്ച് സര്‍ക്കാര്‍ കളിക്കുന്നത്. പ്ലസ്ടു സ്‌കൂളുകള്‍ അനുവദിച്ച് നല്‍കാമെന്ന് പറഞ്ഞ് നേരത്തെ കാശ് വാങ്ങിയവര്‍ക്ക് അഞ്ച് ലക്ഷം വിദ്യാര്‍ഥികളുടെ ഭാവി ഇല്ലാതായാല്‍ എന്താണ് നഷ്ടപ്പെടാനുള്ളത്. കോഴ വാങ്ങിയവര്‍ക്ക് വാക്കു പാലിക്കണമല്ലോ..അല്ലെങ്കില്‍ പല ബിജുരമേശന്‍മാരും വീണ്ടും ഇതിന്റെ പേരില്‍ ആരോപണവുമായി രംഗത്ത് വരും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
