കോഴിക്കോടിനെ കേരളത്തിലെ ആദ്യ വൈഫൈ ജില്ലയാക്കാന്‍ കലക്ടര്‍ എന്‍ പ്രശാന്ത്. കോഴിക്കോടിനെ ഹൈടെക് നഗരമാക്കാനുള്ള കളക്ടര്‍ എന്‍ പ്രശാന്തിന്റെ തീരുമാനത്തിന്റെ ഭാഗമായാണ് ഇത്. മാസങ്ങള്‍ക്കുള്ളില്‍ സംസ്ഥാനത്തെ ആദ്യ വൈഫൈ സൗകര്യ ജില്ലയായി കോഴിക്കോട് മാറും. ആദ്യ ഘട്ടമെന്ന നിലയില്‍ കലക്ടറേറ്റില്‍ ഒരാഴ്ചയ്ക്കുള്ളില്‍ പരീക്ഷണാടിസ്ഥാനത്തില്‍ വൈഫൈ സൗകര്യം ലഭ്യമാകും. കലക്ടറുടെ ഫെയ്‌സബുക്ക് പേജിലൂടെയാണ് ഇക്കാര്യം അറിയിച്ചത്.
വൈഫൈ സൗകര്യത്തെക്കുറിച്ച് ഫേസ്ബുക്ക് പേജിലൂടെ ജില്ലാ കലക്ടര്‍ എന്‍. പ്രശാന്ത് അറിയിച്ചതു മുതല്‍ പൊതുജനങ്ങളില്‍ നിന്നു മികച്ച പ്രതികരണമാണു പദ്ധതിക്കു ലഭിച്ചത്. ഗ്രാമപ്രദേശങ്ങളില്‍നിന്നുള്ളവര്‍ വൈഫൈ സൗകര്യം ഗ്രാമപ്രദേശങ്ങളിലേക്കും വ്യാപിപ്പിക്കണമെന്നു ഫേസ്ബുക്ക് പേജില്‍ കമന്റ് ചെയ്തിട്ടുണ്ട്. നഗരസഭാ അധികൃതര്‍ ചില പരസ്യ കമ്പനികളുമായി ചേര്‍ന്ന് നഗരത്തിലെ തെരഞ്ഞെടുത്ത ബസ് സ്‌റ്റോപ്പുകളില്‍ വൈഫൈ സംവിധാനം ഒരുക്കാന്‍ ശ്രമിച്ചിരുന്നെങ്കിലും അതു പരാജയപ്പെടുകയാണുണ്ടായത്. സുരക്ഷാകാരണം ചൂണ്ടിക്കാട്ടി പൊലീസ് അന്ന് അനുമതിയും നിഷേധിച്ചു.
വിമാനത്താവളത്തില്‍ വൈഫൈ നല്‍കുന്ന അതേ രീതിയിലാണു ജില്ലയിലും പദ്ധതി നടപ്പാക്കാനൊരുങ്ങുന്നത്. അതുകൊണ്ടുതന്നെ ഇത്തവണത്തെ വൈഫൈ പദ്ധതി പരാജയപ്പെടില്ലെന്ന വിലയിരുത്തലാണ് ഉള്ളത്.ഇനി കോഴിക്കോട് എവിടെ പോയാലും ഇന്റര്‍നെറ്റ് സൗജന്യമായി ഉപയോഗിക്കാനാകും. കേരളത്തിലെ പല മേഖലകളിലും സൗജന്യ വൈഫൈ സംവിധാനം നിലവിലുണ്ട്. എന്നാല്‍ ജില്ലയിലെ പ്രധാന കേന്ദ്രങ്ങള്‍ക്കെല്ലാം ഈ സൗകര്യമെത്തുന്ന പദ്ധതി ആദ്യമാണ്. കളക്ടറേറ്റിന് പുറമേ ഇതിനുപുറമെ മൊഫ്യൂസല്‍ ബസ് സ്റ്റാന്‍ഡ്, ബീച്ച് പരിസരങ്ങളിലും ഉടന്‍ വൈഫൈ ലഭ്യമായി തുടങ്ങും. ഇതിന്‌ശേഷം നഗരത്തിലെ മറ്റു ഭാഗങ്ങളിലും ജില്ലയിലെ ഗ്രാമീണമേഖലയിലും വൈഫൈ എത്തിക്കാനാണ് അധികൃതരുടെ ശ്രമം. ഇതിനായുള്ള സാങ്കേതിക സര്‍വേ പലയിടങ്ങളിലും പൂര്‍ത്തിയായതായി. ഇരുപതു മിനുട്ടില്‍ താഴെ സമയത്തേക്കു വൈഫൈ ഉപയോഗിക്കുന്നവര്‍ക്ക് സൗജന്യമായി സൗകര്യം ഉപയോഗിക്കാം. എന്നാല്‍ ദീര്‍ഘനേരത്തെ ഉപയോഗത്തിനു കമ്പനികള്‍ പണം ഈടാക്കുന്ന തരത്തിലാണു സൗകര്യം ലഭ്യമാക്കുക.
മറ്റിടങ്ങളില്‍ സര്‍വേ നടക്കുകയാണ്. കേബിള്‍ വലിക്കല്‍ അടക്കമുള്ള ജോലികള്‍ ഉടന്‍ പൂര്‍ത്തിയാകുമെന്ന് കളക്ടര്‍ അറിയിച്ചു. ജോലികള്‍ ലക്ഷ്യംവച്ച സമയമനുസരിച്ച് പൂര്‍ത്തിയായാല്‍ കേരളത്തിലെ ആദ്യ വൈഫൈ ജില്ലയായി കോഴിക്കോട് മാറുമെന്നു ജില്ലാ കലക്ടര്‍ പറഞ്ഞു. വിഷുവിനു മുമ്പെ ജോലികള്‍ തുടങ്ങാനായിരുന്നു ലക്ഷ്യമിട്ടതെങ്കിലും ചില സാങ്കേതിക തടസങ്ങള്‍ പദ്ധതി അല്‍പം നീളാന്‍ ഇടയാക്കി. എന്നാല്‍ ഒന്നിലധികം സേവനദാതാക്കള്‍ രംഗത്തുള്ളതുകൊണ്ട് ഉടന്‍ പ്രവര്‍ത്തി പൂര്‍ത്തിയാക്കാന്‍ കഴിയുമെന്നാണ് ജില്ലാ ഭരണകൂടത്തിന്റെ പ്രതീക്ഷ. കോഴിക്കോട് കോര്‍പ്പറേഷനും പദ്ധതിയുമായി സഹകരിക്കുന്നുണ്ട്. കൊയിലാണ്ടി, വടകര പ്രദേശങ്ങളിലാണു പദ്ധതിയുടെ രണ്ടാംഘട്ടം നടപ്പിലാക്കുക.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha