രണ്ട് ദിവസങ്ങള്‍ക്ക് മുമ്പാണ് എസ്എസ്എല്‍സി പരീക്ഷ ഫലം പുറത്ത് വന്നത്. എന്നാല്‍ ഫലം വന്നെങ്കിലും തെറ്റായ രീതിയിലെ ഫലമാണ് മന്ത്രി പുറത്ത് വിട്ടത്. തെറ്റുകള്‍ വരാന്‍ കാരണം സര്‍ക്കാരിന്റെ പിടിപ്പുകേടുകൊണ്ടാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു.

ഇന്ന് ഫെയ്‌സ്ബുക്കില്‍ പോസ്റ്റ് ചെയ്ത കുറിപ്പിലാണ് കോടിയേരി ഇക്കാര്യം പറഞ്ഞത്. മാര്‍ക്ക് തിരുത്തുന്നതിനു വേണ്ടി വിദ്യാഭ്യാസമന്ത്രിയുടെ ഓഫിസുമായി ബന്ധപ്പെട്ട് ഇപ്പോള്‍ ഒരു ഗൂഢസംഘം പ്രവര്‍ത്തിക്കുന്നുണ്ടെന്നും കോടിയേരി പറഞ്ഞു. മാര്‍ക്ക് വാഗ്ദാനംനല്‍കുന്ന ഏജന്റുമാര്‍ രംഗത്തിറങ്ങിയിട്ടുണ്ടെന്നും അങ്ങനെ ഫലപ്രഖ്യാപനത്തില്‍ അഴിമതിയാണെന്നും ഈ വിഷയത്തില്‍ സര്‍ക്കാര്‍ അന്വേഷണം നടത്തണമെന്നും കോടിയേരി തന്റെ ഫെയ്‌സ്ബുക്ക് പോസ്റ്റില്‍ ആവശ്യപ്പെട്ടു.
ഫെയ്‌സ്ബുക്ക് പോസ്റ്റ് ഇങ്ങനെ:

കേരളത്തിന്റെ ചരിത്രത്തിലാദ്യമായിട്ടാണ് എസ്എസ്എല്‍സി പരീക്ഷാഫലവുമായി ബന്ധപ്പെട്ട് ഇങ്ങനെയൊരു വീഴ്ചയുണ്ടായിട്ടുള്ളത്. ഇപ്പോള്‍ വിദ്യാഭ്യാസമന്ത്രി പറയുന്നത് അവസാന ഫലം രണ്ടുദിവസത്തിനകമെന്നാണ്! കേട്ടുകേള്‍വിയില്ലാത്ത ഇത്തരം പ്രഖ്യാപനങ്ങളിലേക്ക് പൊതുവിദ്യാഭ്യാസ വകുപ്പ് പോകുന്നത് സര്‍ക്കാരിന്റെ പിടിപ്പുകേടൊന്നുകൊണ്ട് മാത്രമാണ്.
റിസള്‍ട്ടുമായി ബന്ധപ്പെട്ട് പരാതിപ്രളയമാണ് ഉണ്ടായിരിക്കുന്നത്. പലകുട്ടികളുടെയും ഗ്രേസ്മാര്‍ക്ക് ഉല്‍പ്പെടുത്തിയിട്ടില്ല. എല്ലാ വിഷയങ്ങളിലും മൂല്യ നിര്‍ണയം നടന്നിട്ടില്ല എന്ന പരാതിയും ഉയരുന്നുണ്ട്. വിജയശതമാനം കൂറഞ്ഞ ജില്ല, ഒരു ദിവസം കഴിഞ്ഞപ്പോള്‍ കൂടിയ ജില്ലയായി മാറി. അതിനിയും മാറിയേക്കാം. ചുരുക്കി പറഞ്ഞാല്‍ ഇത്തവണത്തെ എസ്എസ്എല്‍സി പരീക്ഷാഫലം ഒരബദ്ധപഞ്ചാംഗം പോലെയായിപ്പോയി.
ഇങ്ങനെ പോയാല്‍ അടുത്ത എസ്എസ്എല്‍സി പരീക്ഷാഫലം വിദ്യാര്‍ത്ഥികള്‍ പരീക്ഷയെഴുതും മുന്‍പ് തന്നെ വിദ്യാഭ്യാസ മന്ത്രി പ്രഖ്യാപിക്കുമെന്നും ആശങ്കപ്പെടേണ്ടിയിരിക്കുന്നു. ഈ വീഴ്ചയുടെ ഉത്തരവാദിത്തം വിദ്യാഭ്യാസവകുപ്പ് മന്ത്രി അബ്ദുറബ്ബ് ഏറ്റെടുക്കണം. ഇത് സംബന്ധിച്ച് വിദഗ്ധന്മാരുള്‍ക്കൊള്ളുന്ന സമിതിയെവച്ച് അന്വേഷിക്കണം.
യഥാര്‍ത്ഥഫലം വരാന്‍ ഇനിയും രണ്ടുദിവസം കഴിയുമെന്ന് വന്നതോടെ മാര്‍ക്ക് തിരുത്തുന്നതിന് വേണ്ടി വിദ്യാഭ്യാസമന്ത്രിയുടെ ഓഫീസുമായി ബന്ധപ്പെട്ട് ഒരു ഗൂഢസംഘം പ്രവര്‍ത്തിക്കുന്നുണ്ട്. മാര്‍ക്ക് വര്‍ധിപ്പിച്ചുതരാമെന്നും ഗ്രേസ്മാര്‍ക്ക് ഇട്ടുതരാമെന്നും ഗ്രേഡ് മാറ്റി തരാമെന്നുമൊക്കെ വാഗ്ദാനംനല്‍കുന്ന ഏജന്റുമാര്‍ ഇപ്പോള്‍ രംഗത്തിറങ്ങിയിരിക്കയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha