സൈബര്‍പ്പട ചെയ്ത നല്ല കാര്യം... എഴുത്തുകാരി കെ.ആര്‍. മീരക്കെതിരെ നടന്ന സൈബര്‍ ആക്രമണങ്ങളെ മുഖ്യമന്ത്രി അപലപിച്ചതിന് പിന്നാലെ മഹാത്മാഗാന്ധി സര്‍വകലാശാലയില്‍ നിയമനം; ചട്ടങ്ങള്‍ മറികടന്ന് സ്‌കൂള്‍ ഓഫ് ലെറ്റേഴ്‌സിന്റെ ബോര്‍ഡ് ഓഫ് സ്റ്റഡീസില്‍ നിയമനം നല്‍കിയെന്നാരോപിച്ച് പ്രതിപക്ഷ സംഘടനകള്‍ രംഗത്ത്
മുഖ്യമന്ത്രി പിണറായി വിജയന്‍ ഇക്കഴിഞ്ഞ ബുധനാഴ്ച നടത്തിയ പത്രസമ്മേളനത്തില്‍ എഴുത്തുകാരി കെ.ആര്‍. മീരക്കെതിരെ നടന്ന സൈബര്‍ ആക്രമണങ്ങളെ അപലപിച്ചതിന് പിന്നാലെ മീരയെ മഹാത്മാഗാന്ധി സര്‍വകലാശാലയില്‍ നിയമിച്ചു.
ചട്ടങ്ങള്‍ മറികടന്ന് എഴുത്തുകാരി കെആര്‍ മീരയ്ക്ക് എംജി സര്‍വ്വകലാശാല സ്‌കൂള്‍ ഓഫ് ലെറ്റേഴ്‌സിന്റെ ബോര്‍ഡ് ഓഫ് സ്റ്റഡീസില്‍ നിയമനം നല്‍കിയതെന്ന് ആരോപിച്ച് പ്രതിപക്ഷ സംഘടനകള്‍ രംഗത്തെത്തി. സ്‌കൂള്‍ ഓഫ് ലെറ്റേഴ്‌സിലെ വിദഗ്ധ സമിതി നല്‍കിയ പേരുകള്‍ വെട്ടിയാണ് കെആര്‍ മീരയെ തിരുകി കയറ്റിയതന്നാണ് ആരോപണം. അക്കാദമിക് വിദഗ്ധരാകണം ബോര്‍ഡ് ഓഫ് സ്റ്റഡീസിലെ അംഗങ്ങള്‍ എന്ന എംജി സര്‍വ്വകലാശാല ആക്ടും സ്റ്റാറ്റിയൂട്ടും വ്യക്തമായി പറയുമ്പോഴാണ് ഈ വഴിവിട്ട നിയമനം. പ്രശസ്ത എഴുത്തുകാരനും നടനുമായിരുന്ന നരേന്ദ്രപ്രസാദ്, അന്തരിച്ച ചിന്തകന്‍ യു.ആര്‍. അനന്തമൂര്‍ത്തി, കവി ഡി.വിനയചന്ദ്രന്‍ തുടങ്ങിയ പ്രമുഖ വ്യക്തിത്വങ്ങള്‍ ജോലി ചെയ്തിരുന്ന ഇടമാണ് സ്‌കൂള്‍ ഓഫ് ലെറ്റേഴ്‌സ്.
മലയാളം ഇംഗ്ലീഷ് ബിരുദാനന്തര ബിരുദ വിഭാഗങ്ങള്‍ ചേര്‍ന്നതാണ് എംജി സര്‍വകലാശാലയിലെ സ്‌കൂള്‍ ഓഫ് ലെറ്റേഴ്‌സ്. രണ്ട് വിഷയങ്ങളിലെയും സിലബസ് പരിഷ്‌കരിക്കുക, പരിഷ്‌കരിച്ച സിലബസ് അംഗീകരിക്കുക എന്നതാണ് ബോര്‍ഡ് ഓഫ് സ്റ്റഡീസിന്റെ ചുമതല. സര്‍വ്വകലാശാല വൈസ്ചാന്‍സലറുടെ ശുപാര്‍ശ പ്രകാരം ഗവര്‍ണ്ണറാണ് ബോര്‍ഡ് ഓഫ് സ്റ്റഡീസ് ചെയര്‍പേഴ്‌സന്റെയും അംഗങ്ങളുടേയും നിയമനം നടത്തുന്നത്.
അതിന് ആദ്യം ബന്ധപ്പെട്ട വകുപ്പുകളിലെ വിദഗ്ധ സമിതിയാണ് ആരൊക്കെ ബോര്‍ഡ് ഓഫ് സ്റ്റഡീസീല്‍ അംഗങ്ങളാകണം എന്ന ശുപാര്‍ശ വിസിക്ക് നല്‍കുന്നത്. എന്നാല്‍ എംജി സര്‍വകലാശാലയിലെ സ്‌കൂള്‍ ഓഫ് ലെറ്റേഴ്‌സില്‍ നിന്നും നല്‍കിയ ശുപാര്‍ശയില്‍ കെ ആര്‍ മീരയില്ല. ശുപാര്‍ശ ചെയ്യാത്തയാള്‍ അംഗമായതില്‍ സ്‌കൂള്‍ ഓഫ് ലെറ്റേഴ്‌സിലെ അധ്യാപകര്‍ക്ക് കടുത്ത അതൃപ്തിയുണ്ട്.
ബോര്‍ഡ് ഓഫ് സ്റ്റഡീസിലെ അംഗങ്ങള്‍ ഉയര്‍ന്ന അക്കാദമിക നിലവാരം ഉള്ളവരാകണം എന്ന് എംജി സര്‍വ്വകലാശാല ആക്ടിലെ 28 ആം അധ്യായത്തില്‍ വ്യക്തമായി പറയുന്നു. എംജി സര്‍വ്വകലാശാല ഇക്കഴിഞ്ഞ ആറാം തീയതി നിയമിച്ച ബോര്‍ഡ് ഓഫ് സ്റ്റഡീസിലെ അംഗങ്ങളില്‍ കെ ആര്‍ മീര ഒഴിച്ച് ബാക്കി 10 പേരും അസിസ്റ്റന്റ് പ്രൊഫസറോ അതിന് മുകളിലുള്ളവരോ ആണ്. വിദഗ്ധ സമിതിയുടെ ശുപാര്‍ശ വെട്ടി ഉന്നതവിദ്യഭ്യാസ വകുപ്പിന്റെ ഇടപെടലിലാണ് കെആര്‍ മീരയെ നിയമിച്ചതെന്നാണ് ആക്ഷേപം. എന്നാല്‍ ബന്ധപ്പെട്ട ഭാഷകളിലെ വിദഗ്ധരെ അവരുടെ അക്കാദമിക യോഗ്യത കണക്കാക്കാതെ ബോര്‍ഡ് ഓഫ് സ്റ്റഡീസില്‍ നിയമിച്ച കീഴ്വഴക്കമുണ്ടെന്നാണ് എംജി സര്‍വകലാശാലയുടെ വിശദീകരണം.
മീര പ്രശസ്തയായ എഴുത്തുകാരിയും ഇടതു സഹയാത്രികയുമാണ്. അവരെ ബോര്‍ഡ് ഓഫ് സ്റ്റഡീസില്‍ നിയമിച്ചതില്‍ തെറ്റില്ല. എന്നാല്‍ അതിനുള്ള യോഗ്യത അവര്‍ക്കില്ലെന്നാണ് ആരോപണം. അതെന്തായാലും മുഖ്യമന്ത്രി മീരയെ അനുകൂലിച്ച് രംഗത്തെത്തിയത് അവര്‍ക്ക് വിനയായി.
പിന്‍വാതില്‍ നിയമനങ്ങള്‍ക്കെതിരെ നീക്കം ശക്തമാകുന്നതിനിടയിലാണ് മീരയെ നിയമിച്ചത്. ചാനലുകളും പത്രങ്ങളും ഇത്തരം നിയമനങ്ങള്‍ക്കെതിരെ നിരന്തരം വാര്‍ത്ത നല്‍കുന്നതിനിടയിലാണ് നിയമനം. മുഖ്യമന്ത്രി പത്ര സമ്മേളനത്തില്‍ മീരയെ പരാമര്‍ശിക്കാതിരുന്നുവെങ്കില്‍ ആരുമറിയാതെ നിയമനം നടക്കുമായിരുന്നു.
"
https://www.facebook.com/Malayalivartha
