പതിനഞ്ചുകാരിയെ ലൈംഗികമായി പീഡിപ്പിച്ച ജൂവലറി ഉടമ അറസ്റ്റില്
ഉത്തര്പ്രദേശില് സ്വര്ണക്കടക്കടയില് ജോലിക്കെത്തിയ പതിനഞ്ചുകാരിയെ ലൈംഗികമായി പീഡിപ്പിച്ച ജൂവലറി ഉടമ അറസ്റ്റില്. കാണ്പുര് സ്വദേശി അശോക് കുമാര് രസ്തോഗിയാണ് പിടിയിലായത്. തന്റെ സ്ഥാപനത്തില് ജോലിക്കെത്തിയ പെണ്കുട്ടിയെയാണ് അശോക് കുമാര് ലൈംഗികാതിക്രമത്തിന് ഇരയാക്കിയത്. കാന്പുരില് അശോക ജുവലേഴ്സ് എന്ന പേരിലുള്ള ഒന്നിലേറെ സ്വര്ണക്കടകളുടെ ഉടമയാണ് അശോക്. ഇയാളുടെ ഷോറൂമുകളില് ഒന്നില് ജോലിക്കെത്തിയതായിരുന്നു പെണ്കുട്ടി.
ഒരു ദിവസം സ്കൂട്ടറോടിക്കാന് പഠിപ്പിക്കാമെന്നു പറഞ്ഞ് കുട്ടിയെ ഇയാള് തന്റെ ഫാംഹൗസിലേക്ക് കൂട്ടിക്കൊണ്ടു പോകുകയായിരുന്നു. തന്റെ വീട്ടില്നിന്ന് ഷോറൂമിലേക്ക് സാധനങ്ങള് കൊണ്ടുപോകാന് വാഹനം അത്യാവശ്യമാണെന്നും സ്കൂട്ടര് വാങ്ങിനല്കാമെന്നും ഇയാള് കുട്ടിയോട് പറഞ്ഞു. തുടര്ന്ന് ഫാംഹൗസിലെത്തിയ ശേഷം ഇയാള് കുട്ടിയെ തടഞ്ഞു നിര്ത്തുകയും ഭീഷണിപ്പെടുത്തി പീഡനത്തിന് ഇരയാക്കുകയുമായിരുന്നു.
പീഡന വിവരം പുറത്തു പറഞ്ഞാല് കുടുംബത്തെ മുഴുവന് ജയിലിലാക്കുമെന്നും ഇയാള് ഭീഷണിപ്പെടുത്തി. പിന്നീട് പലതവണയായി ഇയാള് കുട്ടിയെ ഫാം ഹൗസിലേക്ക് കൊണ്ടുപോയി പീഡനത്തിന് ഇരയാക്കി വരുകയായിരുന്നെന്ന് പൊലീസ് പറഞ്ഞു. ഷോറൂമിന് പിന്നിലുള്ള മുറിയില്വച്ചും അശോക് പീഡനത്തിന് ഇരയാക്കിയെന്ന് കുട്ടി മൊഴി നല്കിയതായും പൊലീസ് കൂട്ടിച്ചേര്ത്തു. ഭീഷണി സഹിക്കാതായതോടെ കുട്ടി നേരിടുന്ന ഉപദ്രവങ്ങളെക്കുറിച്ച് പിതാവിനെ അറിയിക്കുകയായിരുന്നു. തുടര്ന്ന് കുടുംബം പൊലീസിനെ സമീപിച്ചു. സംഭവത്തില് അശോകിനെതിരെ പോക്സോ കേസെടുത്തിട്ടുണ്ട്.
നേരത്തെയും ഇയാള് സമാന കുറ്റകൃത്യത്തിന് അറസ്റ്റിലായിട്ടുണ്ട്. മുന്പ് ഇയാളുടെ സ്ഥാപനത്തിന് ജോലിക്കുനിന്ന പഞ്ചാബ് സ്വദേശിനിയെ പീഡിപ്പിച്ച കേസില് 9 മാസം ജയില്ശിക്ഷ അനുഭവിച്ചുവരവേ ജാമ്യത്തിലിറങ്ങിയതാണ് അശോക്.
https://www.facebook.com/Malayalivartha
