ലഹരി മാഫിയയുടെ വേരറുക്കാന്‍ കേരള പൊലീസ് ആരംഭിച്ച ഓപ്പറേഷന്‍ തൂഫാനില്‍ പങ്കുചേര്‍ന്ന് നടന്‍ മോഹന്‍ലാലും. തൂഫാന്‍ വാറിയര്‍ ബാഡ്ജ് ആഭ്യന്തര മന്ത്രി രമേശ് ചെന്നിത്തല മോഹന്‍ലാലിനു കൈമാറി. ഓപ്പറേഷന്‍ തൂഫാന്‍ നോഡല്‍ ഓഫിസറായ ഉത്തരമേഖലാ ഐജി പുട്ട വിമലാദിത്യയുടെ കൂടി സാന്നിധ്യത്തിലായിരുന്നു ഇത്.

തങ്ങള്‍ ഏറെക്കാലമായി ആഗ്രഹിക്കുന്ന കാര്യമാണിതെന്ന് പറഞ്ഞ മോഹന്‍ലാല്‍ തന്റെ അച്ഛനമ്മമാരുടെ പേരിലുള്ള വിശ്വശാന്തി ഫൗണ്ടേഷന്‍ മേഖലയില്‍ നടത്തുന്ന പ്രവര്‍ത്തനങ്ങളെക്കുറിച്ചും രമേശ് ചെന്നിത്തലയോട് വിശദീകരിച്ചു. അനേകം കുടുംബങ്ങളെയും യുവജനങ്ങളെയും വിദ്യാര്‍ഥികളെയും ലഹരിയുടെ അപകടവലയത്തില്‍ നിന്ന് രക്ഷപ്പെടുത്താന്‍ ഈ ദൗത്യത്തിന് കഴിഞ്ഞിട്ടുണ്ടെന്നും മോഹന്‍ലാല്‍ അഭിപ്രായപ്പെട്ടു.

വിശ്വശാന്തി ഫൗണ്ടേഷന്‍ രൂപകല്‍പ്പന ചെയ്ത 'സേ നോ ടൂ ഡ്രഗ്‌സ്' എന്ന ലഹരിവിരുദ്ധ പദ്ധതിയുടെ രൂപരേഖ മോഹന്‍ലാല്‍ ആഭ്യന്തരമന്ത്രിക്ക് കൈമാറി. ലഹരി വിമുക്തിയും പുനരധിവാസവും ലക്ഷ്യമിട്ട് ഫൗണ്ടേഷന്‍ ഇതിനോടകം തന്നെ നിരവധി ഇടപെടലുകള്‍ നടത്തിയിട്ടുണ്ടെന്നും, ലഹരിവിരുദ്ധ പോരാട്ടങ്ങളുമായി തുടര്‍ന്നും പരിപൂര്‍ണമായി സഹകരിച്ച് മുന്നോട്ടുപോകുമെന്നും മോഹന്‍ലാല്‍ വ്യക്തമാക്കി. മോഹന്‍ലാലിനെ പോലെ ജനങ്ങള്‍ നെഞ്ചേറ്റിയ ഒരു താരം ദൗത്യത്തിനു പിന്തുണ നല്‍കുന്നത് ഓപ്പറേഷന്‍ തൂഫാന് പുതിയ ഊര്‍ജം പകരുമെന്ന് രമേശ് ചെന്നിത്തല പറഞ്ഞു.

ഓപ്പറേഷന്‍ തൂഫാന്‍ താല്‍ക്കാലിക നടപടിയല്ലെന്നും ലഹരി മാഫിയയുടെ വേരറുക്കുന്നതുവരെ കൂടുതല്‍ ശക്തമായും വ്യാപകമായും ദൗത്യം മുന്നോട്ടുകൊണ്ടുപോകുമെന്നും മന്ത്രി വ്യക്തമാക്കി. സംസ്ഥാനത്തെ സ്‌കൂളുകള്‍, കോളജുകള്‍, ഹോസ്റ്റലുകള്‍, റസിഡന്‍ഷ്യല്‍ മേഖലകള്‍ എന്നിവ കേന്ദ്രീകരിച്ച് ബോധവല്‍ക്കരണവും നിരീക്ഷണ സംവിധാനങ്ങളും ശക്തിപ്പെടുത്തുമെന്നും, പൊതുജന പങ്കാളിത്തത്തോടെ എല്ലാ മേഖലകളിലും തൂഫാന്‍ വാറിയേഴ്‌സ് രൂപീകരിക്കുമെന്നും മന്ത്രി പറഞ്ഞു.