മോഷണത്തില്‍ എന്നും പുതുവഴികള്‍ തേടുന്നവരാണ് കള്ളന്‍മാര്‍ കാലം മാറുമ്പോള്‍ പിടിച്ചു നില്‍ക്കാനുള്ള ടെക്കിനിക്കുകള്‍ ഇല്ലാതെ പറ്റുമോ. അതുപോലെ ട്രെയിനില്‍ കവര്‍ച്ച നടത്തുന്ന ചില കള്ളന്‍മാരും പ്രത്യേക തരക്കാരാണ്. നിര്‍ത്തിയിട്ട ട്രെയിന്‍ റെയില്‍വേ സ്‌റ്റേഷനില്‍ നിന്ന് പുറപ്പെടുമ്പോള്‍ സൈഡ് സീറ്റിലിരിക്കുന്നവരുടെ മാല പറിച്ചെടുക്കുകയാണ് ചില വിരുതന്‍മാരുടെ തൊഴില്‍. അതുപോലെ റെയില്‍വേ ലൈനിന്റെ പണി നടക്കുന്ന സ്ഥലത്തും ഇത്തരം കവര്‍ച്ചക്കാര്‍ തമ്പടിക്കും. ട്രെയിന്‍ സാവധാനം പോകുമ്പോള്‍ പെട്ടെന്ന് അകത്തേക്ക് കൈയ്യിട്ട് മാല പറിച്ചെടുക്കുകയാണ് ഇവരുടെ രീതി. ട്രെയിന്‍ ഓടി പോകുന്നതിനാല്‍ മാല നഷ്ടപ്പെട്ട യാത്രക്കാരിക്ക് ഒന്നും ചെയ്യാനാവില്ല. ഇത്തരം ചില കള്ളന്‍മാരെ തേടി നടക്കുകയാണ് റെയില്‍വേ പോലീസ്. ഒരു വര്‍ഷം കഴിഞ്ഞിട്ടും കള്ളന്റെ പൊടി പോലും കിട്ടിയിട്ടില്ല. അവരിപ്പോഴും കേരളത്തിലെ റെയില്‍വേയിലുണ്ട്. തങ്ങളുടെ പണിയുമായി.
ഒരു വര്‍ഷം മുന്‍പ് അതായത് 2014 മാര്‍ച്ചില്‍ കോട്ടയത്തും ചങ്ങനാശേരിയിലുമായി രണ്ടു യാത്രക്കാരുടെ മൂന്നര പവന്‍ സ്വര്‍ണാഭരണമാണു കള്ളന്‍മാര്‍ തട്ടിയെടുത്തത്. കോട്ടയം റെയില്‍വേ സ്‌റ്റേഷനില്‍നിന്നു കൊല്ലം പാസഞ്ചര്‍ പുറപ്പെടുന്ന സമയത്താണു പുറത്തുനിന്ന കള്ളന്‍ യാത്രക്കാരിയുടെ രണ്ടു പവന്‍ മാല പറിച്ചെടുത്തു രക്ഷപ്പെട്ടത്. വൈകുന്നേരം 6.10നായിരുന്നു സംഭവം. റെയില്‍വേ പോലീസും പിന്നീട് ഈസ്റ്റ് പോലീസും കണ്‍ട്രോള്‍ റൂം പോലീസുമെല്ലാം ചേര്‍ന്ന് തെരച്ചില്‍ നടത്തിയെങ്കിലും കള്ളനെ കണ്ടെത്താനായില്ല. കള്ളന്റെ പിന്നാലെ പോലീസ് കുറെ ഓടിയെങ്കിലും കിട്ടിയില്ല. കോട്ടയം റെയില്‍വേ ക്വാര്‍ട്ടേഴ്‌സ് വഴി വലിയൊരു മതില്‍ ചാടിയാണ് കള്ളന്‍ രക്ഷപ്പെട്ടത്.
ചങ്ങനാശേരി സ്വദേശി കുഞ്ഞുമോളുടെ രണ്ടു പവന്‍ മാലയാണു കോട്ടയം റെയില്‍വേ സ്‌റ്റേഷനില്‍വച്ചു തട്ടിയെടുത്തത്. കൊല്ലം പാസഞ്ചറില്‍ ചങ്ങനാശേരിക്കു പോകുകയായിരുന്നു കുഞ്ഞുമോള്‍. ട്രെയിന്‍ നീങ്ങിത്തുടങ്ങിയ സമയത്താണു പുറത്തുനിന്നു കൈനീട്ടി മാല വലിച്ചുപൊട്ടിച്ച് രക്ഷപ്പെട്ടത്. കറുത്ത് പൊക്കം കുറഞ്ഞയാളാണു മോഷ്ടാവ്. രണ്ടാമത്തെ മോഷണം ചങ്ങനാശേരിയില്‍ റെയില്‍വേ ലൈനില്‍ പണി നടക്കുന്ന സ്ഥലത്തു വച്ചായിരുന്നു.അങ്കമാലിയില്‍നിന്നു ചെങ്ങന്നൂര്‍ക്കു പോകുകയായിരുന്ന അടൂര്‍ സ്വദേശി ഏലിയാമ്മ (75)യുടെ ഒന്നര പവന്‍ മാലയാണ് ഇതേരീതിയില്‍ ട്രെയിന്‍ സാവധാനം പോകുമ്പോള്‍ പൊട്ടിച്ചെടുത്തത്. ചങ്ങനാശേരി ഇരുപ്പ ഭാഗത്ത് റെയില്‍വേ ഗേറ്റ് നിര്‍മാണം നടക്കുന്നതിനാല്‍ ട്രെയിന്‍ സാവധാനമാണ് ഓടിയത്. അവിടെവച്ച് മാല പറിച്ചെടുത്തു കള്ളന്‍ രക്ഷപ്പെടുകയായിരുന്നു.
ഐലന്റ് എക്‌സ്പ്രസില്‍ യാത്രചെയ്യുമ്പോഴായിരുന്നു കവര്‍ച്ച. യാത്രക്കാര്‍ നിനച്ചിരിക്കാതെ നടക്കുന്ന സംഭവമായതിനാല്‍ ഏതാനും നിമിഷ നേരത്തേക്ക് അവര്‍ക്ക് ശബ്ദിക്കാന്‍ പോലുമാവില്ല. ഇതു മനസിലാക്കിയാണ് തന്ത്രപരമായ നീക്കത്തിലൂടെയുള്ള മോഷണം. ട്രെയിന്‍ സ്‌റ്റേഷനില്‍ നിര്‍ത്തുമ്പോഴും പുറപ്പെടുമ്പോഴും സ്ത്രീകള്‍ തങ്ങളുടെ ആഭരണങ്ങള്‍ ശ്രദ്ധിക്കുന്നത് നല്ലതാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha