മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനോട് രാജിവയ്ക്കാന്‍ മുഖ്യമന്ത്രി പിണറായി വിജയന്‍ നിര്‍ദ്ദേശം നല്‍കിയതായി റിപ്പോര്‍ട്ട്.

രാജിവച്ചില്ലെങ്കില്‍ സര്‍വീസില്‍ നിന്നും പുറത്താക്കേണ്ടി വരുമെന്ന സൂചന മുഖ്യമന്ത്രി നല്‍കിയിട്ടുണ്ടെന്നാണ് അറിയുന്നത്. അങ്ങനെ സംഭവിക്കാതിരിക്കാനാണ് മുഖ്യമന്ത്രിയുമായി ബന്ധപ്പെട്ട ഒരു ഉന്നതന്‍ നിര്‍ദ്ദേശം നല്‍കിയത്. മുഖ്യമന്ത്രിക്ക് വേണ്ടിയാണ് ദൂതന്‍ ശിവശങ്കറിനെ കണ്ടത്.

എല്ലാ വ്യവസ്ഥകളും ശിവശങ്കറിന് എതിരാണെന്നും ഇനി മുന്നോട്ടുപോകാന്‍ കഴിയില്ലെന്നും ശിവശങ്കറിനെ ഉന്നതന്‍ അറിയിച്ചിട്ടുണ്ട്. കേന്ദ്ര അന്വേഷണം ശിവശങ്കറിന് എതിരാണെന്നും കുരുക്ക് കൂടുതല്‍ മുറുകുകയാണെന്നും സര്‍ക്കാര്‍ വ്യത്തങ്ങള്‍ അറിയിച്ചിട്ടുണ്ട്. ചിലപ്പോള്‍ ശിവശങ്കര്‍ കേസില്‍ പ്രതി ചേര്‍ക്കപ്പെടുമെന്നും മുഖ്യമന്ത്രിക്ക് വേണ്ടി ശിവശങ്കറിനെ അറിയിച്ചിട്ടുണ്ട്.

അതിനിടെ ഇതുമായി ബന്ധപ്പെട്ട് ശിവശങ്കര്‍ നിയമോപദേശം തേടിയിട്ടുണ്ട്. സര്‍ക്കാര്‍ തന്നെ പുറത്താക്കാന്‍ സാധ്യതയുണ്ടെന്ന കാര്യം മനസിലാക്കിയ ശിവശങ്കര്‍ സ്വയം ഒഴിയാന്‍ തന്നെയാണ് തീരുമാനിച്ചിരിക്കുന്നത്. രാജിവയ്ക്കുന്നതായി അറിയിക്കുന്ന കത്ത് ഏപ്രകാരം എഴുതണമെന്ന നിയമോപദേശമാണ് അദ്ദേഹം തേടിയിരിക്കുന്നത്. വ്യക്തിപരമായ കാരണങ്ങള്‍ പറഞ്ഞായിരിക്കും രാജിവയ്ക്കുക.

പൂന്താനത്തിന്റെ വരികള്‍ അന്വര്‍ത്ഥമാക്കി കൊണ്ടാണ് ശിവശങ്കരന്റെ പടിയിറക്കം. നിലവിട്ട് പെരുമാറിയാല്‍ ഇതാണ് അവസ്ഥയെന്ന് എല്ലാവര്‍ക്കും മനസിലാക്കാന്‍ കഴിയുന്ന പാഠം.

മുഖ്യമന്ത്രിക്ക് ശിവശങ്കറിനെ പുറത്താക്കാന്‍ താത്പര്യമില്ല. അത്രയേറെ ഇഷ്ടവും സ്‌നേഹവും മുഖ്യമന്ത്രിക്ക് ശിവശങ്കറിനോടുണ്ട്. ഇതുവരെയും ശിവശങ്കറിനെ മുഖ്യമന്ത്രി തള്ളിപ്പറഞ്ഞിട്ടില്ല. സി പി എം തള്ളി പറഞ്ഞപ്പോഴും മുഖ്യമന്ത്രി നിശബ്ദത പാലിച്ചു. ഇതുതന്നെയായിരുന്നു മുമ്പ് ജേക്കബ് തോമസിന്റെയും അവസ്ഥ. എന്നാല്‍ അദ്ദേഹത്തെ പിന്നീട് മുഖ്യമന്ത്രി നിഷ്‌കരുണം തള്ളി.

സ്വപ്ന സുരേഷിന് കുറ്റകൃത്യത്തിലൂടെ ലഭിച്ച പണമാണ് ലോക്കറിലുള്ളതെന്ന് പ്രഥമദ്യഷ്ട വ്യക്തമായെന്ന് കോടതി പറഞ്ഞപ്പോള്‍ ശിവശങ്കറിന് കൂടി അതില്‍ ഉത്തരവാദിത്വം ആരോപിക്കപ്പെട്ടിട്ടുണ്ട്. . ലോക്കറിലെ പണം കമ്മീഷന്‍ തുകയെന്ന സ്വപ്നയുടെ വാദം തെറ്റെന്നാണ് കോടതി നിരീക്ഷിച്ചു. സ്വപ്നക്ക് പണം നല്‍കിയിട്ടില്ലെന്ന് യൂണിടാക് ഉടമ സന്തോഷ് ഈപ്പന്റ മൊഴിയുണ്ടെന്ന് കോടതി പറഞ്ഞു. കമ്മീഷന്‍ ആണെന്ന് സമ്മതിച്ചാല്‍ പോലും അത് വാങ്ങി നല്‍കിയത് ശിവശങ്കറാണെന്നാണ് മൊഴി.

കമ്മീഷന്‍ നല്‍കിയത് സന്ദീപിന്റെ ബാങ്ക് അക്കൗണ്ടിലേക്കാണ്. ഐസോമോങ്ക് കമ്പനിയുടെ ആക്‌സിസ് ബാങ്ക് അക്കൗണ്ടിലേക്കാണ് പണം ഇട്ടത്. ഇക്കാര്യം സന്ദീപും സമ്മതിച്ചിട്ടുണ്ട്.

സ്വര്‍ണകള്ളക്കടത്തുമായി ബന്ധപ്പെട്ട് എന്‍ഫോഴ്‌സ്‌മെന്റ് ഡയറ്കടറേറ്റ് ചുമത്തിയ കേസിലാണ് സ്വപ്ന സുരേഷിന് കോടതി ജാമ്യം നിഷേധിച്ചത്. ഇതില്‍ ശിവശങ്കറിനെതിരെ വ്യക്തമായ പരോക്ഷ പരാമര്‍ശമുണ്ട്. ഡയറി പരിശോധിച്ചതില്‍ നിന്ന് കള്ളപ്പണം വെളുപ്പിക്കലിന് പ്രഥമദൃഷ്ട്യാ തെളിവുണ്ടെന്നും പ്രതി കുറ്റസമ്മത മൊഴി നല്‍കിയിട്ടുണ്ടെന്നും വിധിയില്‍ പറയുന്നു. കള്ളക്കടത്തില്‍ നേരിട്ട് പങ്കെടുത്തെന്ന് സ്വപ്ന എന്‍ഫോഴ്‌സ്‌മെന്റിന് മൊഴി നല്‍കിയിട്ടുണ്ടെന്ന് കോടതി നിരീക്ഷിച്ചു.

എന്‍ഫോഴ്‌സ്‌മെന്റിന് നല്‍കിയ മൊഴിക്ക് കോടതിയില്‍ നിയമ പ്രാബല്യമുണ്ട്. കള്ളക്കടത്തിന് പിന്നില്‍ ഉന്നതര്‍ ഉള്‍പ്പെട്ട ഗൂഡാലോചനയുണ്ടെന്ന് അന്വേഷണത്തില്‍ ബോധ്യപ്പെട്ടിട്ടുണ്ട്. ഇത് ലക്ഷ്യമിടുന്നതും ശിവശങ്കരനെ തന്നെ. കള്ളക്കടത്തിലൂടെ ലഭിച്ച പണം വസ്തു വാങ്ങാന്‍ ഉപയോഗിച്ചതായും സംശയമുണ്ട്. കള്ളപ്പണം വെളുപ്പിക്കുന്നതില്‍ പ്രതിക്ക് പങ്കുണ്ടെന്ന് പ്രഥമ ദൃഷ്ട്യാ തെളിവുണ്ട്. രാജ്യത്തിന്റെ സാമ്പത്തിക സുരക്ഷയെ ബാധിക്കുന്ന ഗുരുതരമായ പ്രശ്‌നമാണിതെന്നും കോടതി പറഞ്ഞു.

ഹവാല, ബിനാമി ഇടപാടുകളിലും കള്ളപ്പണം വെളുപ്പിക്കലിലും തനിക്കെതിരെ ഒരു തെളിവും ഹാജാരാക്കാന്‍ എന്‍ഫോഴ്‌സ്‌മെന്റ് ഡയറ്കടറേറ്റിന് കഴിഞ്ഞിട്ടില്ലെന്നായിരുന്നു സ്വപ്നയുടെ പ്രധാന വാദം. എന്നാല്‍ ഇക്കാര്യത്തില്‍ എന്‍ഫോഴ്‌സ്‌മെന്റ് ഡയറ്കടറേറ്റിന്റെ വാദങ്ങള്‍ ശരിവെച്ചു കൊണ്ടാണ് പ്രിന്‍സിപ്പല്‍ സെഷന്‍സ് ജഡ്ജി ഉത്തരവിട്ടത്.

രാജിവയ്ക്കുകയാണെങ്കില്‍ ശിവശങ്കര്‍ എല്ലാ പാപഭാരങ്ങളും ഒറ്റയ്ക്ക് ഏറ്റെടുക്കേണ്ടി വരും. ജലീലും ബാക്കിയുള്ളവരും നൈസായി ഊരിപ്പോവുകയും ചെയ്യും.