നവജാത ശിശുവിന് മുലപ്പാല്‍ വൈകിപ്പിച്ച കേസില്‍ മാതാവിനെ കോടതി ശിക്ഷിച്ചു. കളന്‍തോടിലെ സിദ്ധന്‍ പറഞ്ഞ പ്രകാരം, പ്രസവിച്ചതിനു ശേഷം 5 ബാങ്ക് വിളിയുടെ സമയം കഴിയാതെ മുലപ്പാല്‍ നല്‍കരുതെന്ന് ഓമശ്ശേരി സ്വദേശിനി അഫ്‌സത്തിന്റെ ഭര്‍ത്താവ് അബൂബക്കര്‍ സിദ്ദീഖ് പറഞ്ഞെന്നും അഫ്‌സത്ത് ഇതിനു കൂട്ടുനിന്നെന്നുമാണ് കേസ്. അഫ്‌സത്തിന് താമരശേരി ജുഡീഷ്യല്‍ മജിസ്‌ട്രേറ്റ് കോടതി കോടതി പിരിയും വരെ തടവും 1000 രൂപ പിഴയുമാണ് വിധിച്ചത്. സംഭവത്തില്‍ അബൂബക്കര്‍ സിദ്ധിഖിനെയും സിദ്ധനെയും കോടതി വിട്ടയച്ചു.

ജുവനൈല്‍ ആക്ട് പ്രകാരമാണ് ശിക്ഷ. അഫ്‌സത്ത് മുക്കത്തെ സഹകരണ ആശുപത്രിയില്‍ 2016 നവംബര്‍ 2-ന് ഉച്ചയ്ക്കാണ് പ്രസവിച്ചത്. ജനിച്ച ആണ്‍കുഞ്ഞിന് മുലപ്പാല്‍ നല്‍കാന്‍ ആശുപത്രി അധികൃതര്‍ ആവശ്യപ്പെട്ടെങ്കിലും ഭര്‍ത്താവ് വിലക്കിയത്രേ.

ആശുപത്രി അധികൃതരാണ് കുഞ്ഞിന്റെ ആരോഗ്യ സ്ഥിതി വഷളാകുന്നത് കണ്ട് പൊലീസില്‍ പരാതി നല്‍കിയത്. അഫ്‌സത്ത്, അബൂബക്കര്‍ സിദ്ധിഖ്, സിദ്ധന്‍ എന്നിവരായിരുന്നു യഥാക്രമം ഒന്നും രണ്ടും മൂന്നും പ്രതികള്‍. സംഭവം അന്ന് ഏറെ വിവാദം സൃഷ്ടിച്ചിരുന്നു.1000 രൂപ പിഴ അടച്ചില്ലെങ്കില്‍ 10 ദിവസത്തെ വെറും തടവും അനുഭവിക്കണം. അസി.പബ്ലിക് പ്രൊസിക്യൂട്ടര്‍ രജ്ഞിന്‍ ബേബി ഹാജരായി.