അഞ്ചു ജീവനക്കാര്‍ കോവിഡ് പോസിറ്റീവ്, എറണാകുളം കലക്ടറേറ്റില്‍ ഭൂരിഭാഗം ജീവനക്കാരും ക്വാറന്റീനില്‍
എറണാകുളം കളക്റ്ററേറ്റില്‍ അഞ്ചു ജീവനക്കാര്‍ കോവിഡ് പോസിറ്റീവായതോടെ കലക്ടറേറ്റ് ശൂന്യമായി. ഭൂരിഭാഗം ജീവനക്കാരും ക്വാറന്റീനിലാണ്. സന്ദര്‍ശകര്‍ക്ക് പ്രവേശനമില്ല. എസ്റ്റാബ്ലിഷ്‌മെന്റ് ഉള്‍പ്പെടെ അടിയന്തര വിഭാഗങ്ങളിലായി വിരലിലെണ്ണാവുന്ന ജീവനക്കാരാണ് ജോലിക്കെത്തുന്നത്. കലക്ടറേറ്റിലെ ഒരു ക്ലാര്‍ക്കിനു കൂടി ഇന്നലെ കോവിഡ് പോസിറ്റീവായി. സീനിയര്‍ സൂപ്രണ്ട്, ജൂനിയര്‍ സൂപ്രണ്ട്, ക്ലാര്‍ക്ക്, ഓഫിസ് അറ്റന്‍ഡന്റ് എന്നിവര്‍ക്ക് രണ്ടു ദിവസം മുന്‍പ് കോവിഡ് പോസിറ്റീവായതോടെയാണ് സമ്പര്‍ക്കപ്പട്ടികയിലുള്ള ജീവനക്കാര്‍ ക്വാറന്റീനിലായത്.
മജിസ്റ്റീരിയല്‍, എസ്റ്റാബ്ലിഷ്‌മെന്റ് വിഭാഗങ്ങള്‍ ഭാഗികമായി പ്രവര്‍ത്തിക്കുന്നു. കോവിഡ് കണ്‍ട്രോള്‍ റൂമും സര്‍വലൈന്‍സ് റൂമും പൂര്‍ണമായി പ്രവര്‍ത്തിക്കുന്നുണ്ട്. ദുരിതാശ്വാസം, ഭൂപരിഷ്‌ക്കരണം, റവന്യു റിക്കവറി, ഫിനാന്‍സ്, അഡ്മിനിസ്‌ട്രേഷന്‍, സ്ഥലമെടുപ്പ് വിഭാഗങ്ങള്‍ പൂര്‍ണമായി അടച്ചു. അവധി ദിനമായ ഇന്നു കലക്ടറേറ്റ് അണുവിമുക്തമാക്കാന്‍ നിര്‍ദേശം നല്‍കി. കലക്ടര്‍ എസ്.സുഹാസും അഡീഷനല്‍ ജില്ലാ മജിസ്‌ട്രേട്ട് സാബു കെ.ഐസക്കും എല്ലാ ദിവസവും എത്തുന്നുണ്ട്. ഡപ്യൂട്ടി കലക്ടര്‍മാരില്‍ പലരും സ്വയം നിരീക്ഷണത്തിലാണ്.
ഇന്നും നാളെയും അവധിയാണ്. തിങ്കളാഴ്ച കൂടുതല്‍ ജീവനക്കാര്‍ എത്തുമെന്നാണ് പ്രതീക്ഷ. കലക്ടറേറ്റ് സമുച്ചയത്തിലെ മറ്റു പല ഓഫിസുകളും വിജനമാണ്. ആര്‍ടി ഓഫിസിലെ രണ്ടു പേര്‍ക്കും ലേബര്‍ ഓഫിസിലെ ഒരാള്‍ക്കും നേരത്തെ കോവിഡ് പോസിറ്റീവായിരുന്നു. കലക്ടറേറ്റുമായി ബന്ധപ്പെട്ടു പ്രവര്‍ത്തിക്കുന്ന 30 പേരെ ഇന്നലെ ആന്റിജന്‍ പരിശോധനയ്ക്ക് വിധേയമാക്കി. എല്ലാവരും നെഗറ്റീവ്.
https://www.facebook.com/Malayalivartha
