യു.എ.ഇ കോണ്‍സുലേറ്റ് വഴി സ്വര്‍ണക്കടത്ത് കേസ്... നാലു പ്രതികള്‍ യു.എ.ഇയിലുണ്ടെന്ന് എന്‍.ഐ.എ; ഇവരെ കേരളത്തിലെത്തിക്കാന്‍ നടപടി തുടങ്ങി; നാലുപേര്‍ക്കുമെതിരെ എറണാകുളം പ്രത്യേക എന്‍.ഐ.എ കോടതി ജാമ്യമില്ലാ അറസ്റ്റ് വാറന്റ് പുറപ്പെടുവിച്ചു
സംസ്ഥാനത്തെ ഞെട്ടിച്ച യു.എ.ഇ കോണ്‍സുലേറ്റിന്റെ നയതന്ത്ര ചാനല്‍വഴി സ്വര്‍ണം കടത്തിയ കേസിലെ നാലു പ്രതികള്‍ യു.എ.ഇയിലുണ്ടെന്ന് എന്‍.ഐ.എ റിപ്പോര്‍ട്ട്. ഇവരെ കഴിയും വേഗം കേരളത്തിലെത്തിക്കാന്‍ എന്‍.ഐ.എ ഇന്റര്‍പോളിനെ സമീപിച്ച് ബ്ലൂ കോര്‍ണര്‍ നോട്ടീസിനു നടപടി ആരംഭിച്ചു. ആദ്യപടിയായി നാലുപേര്‍ക്കുമെതിരെ എറണാകുളം പ്രത്യേക എന്‍.ഐ.എ കോടതി ജാമ്യമില്ലാ അറസ്റ്റ് വാറന്റ് പുറപ്പെടുവിച്ചു. തുടക്കം മുതല്‍ നിരീക്ഷണത്തിലുള്ള മൂന്നാം പ്രതി ഫൈസല്‍ ഫരീദ്, 10, 15, 20 പ്രതികളായ മൂവാറ്റുപുഴ സ്വദേശി റബിന്‍സ് ഹമീദ്, സിദ്ദീഖ് എന്ന സിദ്ദീഖുല്‍ അക്ബര്‍, അഹമ്മദ് കുട്ടി എന്ന കുഞ്ഞാനി എന്നിവരാണ് യു.എ.ഇയിലുള്ളത്. ഫൈസല്‍ ഫരീദിനെ ദിവസങ്ങള്‍ക്ക് മുമ്ബ് എന്‍.ഐ.എ യു.എ.ഇയിലെത്തി ചോദ്യം ചെയ്തിരുന്നു. എന്നാല്‍, അറസ്റ്റ് ചെയ്ത് കൊണ്ടുവരാനുള്ള നീക്കം പരാജയപ്പെട്ടതോടെയാണ് ഇയാളടക്കം നാലുപ്രതികള്‍ക്കെതിരെ ഇന്റര്‍പോളിനെ സമീപിക്കാന്‍ നടപടി ഊര്‍ജിതമാക്കിയത്. ഇവരുടെ വീടുകളിലെ പരിശോധനയില്‍ നിരവധി ഡിജിറ്റല്‍ രേഖകള്‍ പിടിച്ചെടുത്തതായും എന്‍.ഐ.എ വ്യക്തമാക്കി. കസ്റ്റഡി കാലാവധി കഴിഞ്ഞതിനെത്തുടര്‍ന്ന് നാല് പ്രതികളെ കോടതിയില്‍ ഹാജരാക്കിയതിനൊപ്പം നല്‍കിയ റിപ്പോര്‍ട്ടിലാണ് വിദേശത്തുള്ള കൂടുതല്‍ പ്രതികളുടെ വിശദാംശങ്ങള്‍ വെളിപ്പെടുത്തിയത്.യു.എ.ഇ കോണ്‍സുലേറ്റിലെ ഉദ്യോഗസ്ഥര്‍ക്കും ഉന്നത വ്യക്തികള്‍ക്കും കേസിലുള്ള പങ്ക് പുറത്തുകൊണ്ടുവരാന്‍ അന്വേഷണം തുടരുകയാണ്. ഇന്ത്യക്കകത്തും പുറത്തും തീവ്രവാദപ്രവര്‍ത്തനത്തിന് സ്വര്‍ണക്കടത്തിലൂടെ ലഭിച്ച വരുമാനം ഉപയോഗിച്ചോയെന്നും അന്വേഷിക്കുകയാണെന്നും എന്‍.ഐ.എ ബോധിപ്പിച്ചു. 16, 17, 18, 19 പ്രതികളായ മുഹമ്മദ് അന്‍വര്‍, ഹംസത്ത് അബ്ദുല്‍ സലാം എന്ന കുഞ്ഞുമോന്‍, സംജു, ഹംജത് അലി എന്നിവരെയാണ് എന്‍.ഐ.എ കസ്റ്റഡിയില്‍ ചോദ്യം ചെയ്തത്.
https://www.facebook.com/Malayalivartha
