ഇതാണ് അതിബുദ്ധി അതിബുദ്ധി എന്ന് പറയുന്നത്. അല്ലെങ്കില്‍ വെറുമൊരു ഫോണ്‍ വിളി തെളിയിക്കാന്‍ പോയി മന്ത്രി കെ.ടി. ജലീലിനെ പോലെ ഇങ്ങനെയൊരു പൊല്ലാപ്പില്‍ പെടുമായിരുന്നോ. ജലീല്‍ തന്നെയാണ് തന്നെ കുടുക്കാനുള്ള ശക്തമായ തെളിവുകള്‍ നല്‍കിയത്. അതും പത്രക്കാര്‍ക്ക് മുമ്പില്‍. ഇനിയത് മാറ്റിപ്പറയാനും കഴിയില്ല. സ്വപ്ന സുരേഷുമായുള്ള കോള്‍ ലിസ്റ്റ് പുറത്ത് വന്ന സമയം തന്റെ നിരപരാധിത്വം തെളിയിക്കാന്‍ അതേ മണിക്കൂറില്‍ ജലീല്‍ പത്രസമ്മേളനം നടത്തി. കോണ്‍സുലേറ്റ് പറഞ്ഞിട്ടാണ് സ്വപ്നയെ വിളിച്ചതെന്നും ദൈവം സഹായിച്ച് വാട്‌സാപ്പ് ഡെലീറ്റ് ചെയ്തില്ലെന്നും പറഞ്ഞു. കോണ്‍സുലേറ്റര്‍ സ്വപ്ന വിളിക്കുമെന്ന് പറഞ്ഞ് അയച്ച മെസേജ് പത്രക്കാര്‍ക്ക് വിളമ്പി തലയെടുപ്പോടെ നിന്നു. മലപ്പുറത്ത് കിറ്റ് നല്‍കാനാണ് സ്വപ്ന വിളിച്ചതെന്ന് സമര്‍ത്ഥിച്ചു. നയതന്ത്ര പരിരക്ഷ മുതലാക്കി രക്ഷപ്പെടാനാണ് ജലീല്‍ ശ്രമിച്ചത്. ആരെങ്കിലും പോയി കോണ്‍സുലേറ്ററിന്റെ വാട്‌സാപ്പ് നോക്കുമോ? പത്രക്കാരില്‍ നിന്നും അന്നേരം രക്ഷപ്പെട്ടെങ്കിലും ആ ഒന്നൊന്നര വാട്‌സാപ്പ് ജലീലിന് തന്നെ കുരുക്കായി.

യു.എ.ഇ കോണ്‍സുലേറ്റിന്റെ റംസാന്‍ കിറ്റ് കൈപ്പറ്റിയത് വിദേശ സഹായം സ്വീകരിക്കാന്‍ കേന്ദ്രാനുമതി തേടണമെന്ന ചട്ടം ലംഘിച്ചാണെന്ന പരാതികളില്‍ മന്ത്രി കെ.ടി. ജലീലിനെതിരെ കേന്ദ്രസര്‍ക്കാര്‍ ഉടന്‍ അന്വേഷണം പ്രഖ്യാപിച്ചേക്കും. വിദേശനാണ്യ വിനിമയ ചട്ടം ലംഘിച്ചതായാണ് കേന്ദ്ര ധനകാര്യ മന്ത്രാലയത്തിന്റെ പ്രാഥമിക വിലയിരുത്തല്‍. അന്വേഷണ ഉത്തരവ് ഉടന്‍ പുറത്തിറങ്ങും. ചട്ടലംഘനം സംബന്ധിച്ച പരാതികള്‍ വിശദമായി പരിശോധിക്കാനാണ് കേന്ദ്രനീക്കം.

സര്‍ക്കാര്‍ വാഹനത്തില്‍ മതഗ്രന്ഥമെന്ന പേരില്‍ സ്വര്‍ണം കടത്തിയെന്ന ആരോപണത്തില്‍ കസ്റ്റംസ് അന്വേഷണം പുരോഗമിക്കുന്നതിനിടെയാണ് ജലീലിനെതിരെ റംസാന്‍ കിറ്റ് സംഭവത്തില്‍ കേന്ദ്രം കുരുക്ക് മുറുക്കുന്നത്.

റംസാന്‍ കിറ്റ് വിതരണത്തിന് യു.എ.ഇ കോണ്‍സുലേറ്റിന്റെ സഹായം സ്വീകരിച്ചെന്ന് ജലീല്‍ സമ്മതിച്ചിരുന്നു. ഏതുതരം വിദേശസഹായം സ്വീകരിക്കാനും കേന്ദ്രാനുമതി ആവശ്യമാണെന്നിരിക്കെ മന്ത്രി ജലീല്‍ ചട്ടലംഘനം നടത്തിയെന്നാണ് നിഗമനം. ഇതു സംബന്ധിച്ച് പരാതികള്‍ പ്രധാനമന്ത്രിക്കും ആഭ്യന്തര, വിദേശ ധനമന്ത്രാലയങ്ങള്‍ക്കും സംസ്ഥാനത്തു നിന്ന് ലഭിച്ചതിന്റെ അടിസ്ഥാനത്തിലാണ് അന്വേഷണം. കിറ്റ് വിതരണവുമായി ബന്ധപ്പെട്ട പരാതിയില്‍ സംസ്ഥാന ലോകായുക്ത ജലീലിന് നോട്ടീസ് നല്‍കിയിരുന്നു.

കേന്ദ്രാനുമതിയില്ലാതെ വിദേശസഹായം സ്വീകരിച്ചെന്ന് ധന മന്ത്രാലയത്തിന്റെ അന്വേഷണത്തില്‍ കണ്ടെത്തിയാല്‍ മന്ത്രി കെ.ടി. ജലീലിനെതിരെ എന്‍ഫോഴ്‌സ്‌മെന്റ് ഡയറക്ടറേറ്റ് കേസെടുക്കും. വിദേശസഹായ നിയന്ത്രണച്ചട്ടം സംബന്ധിച്ച നടപടികള്‍ക്കായി ധനമന്ത്രാലയത്തില്‍ ജോയിന്റ് സെക്രട്ടറി തലവനായി പ്രത്യേക വിഭാഗമുണ്ട്. ആദ്യം അന്വേഷണം നടത്തുക ഇവരാണ്. ചട്ടലംഘനം കണ്ടെത്തിയാല്‍ കേസെടുക്കാന്‍ ജോയിന്റ് സെക്രട്ടറിക്ക് ഇ.ഡി ഡയറക്ടറോട് നിര്‍ദ്ദേശിക്കാം.

അഞ്ചുലക്ഷം രൂപയുടെ നൂറ് ഭക്ഷ്യകിറ്റുകളുടെ ഇടപാടാണ് യു.എ.ഇ കോണ്‍സല്‍ ജനറലുമായി ജലീല്‍ നടത്തിയത്. ചട്ടപ്രകാരം പണം, ഉപഹാരം, സമ്മാനം, സേവനം എന്നിങ്ങനെ ഏതുതരം വിദേശസഹായവും സ്വീകരിക്കാന്‍ വിദേശകാര്യ, ആഭ്യന്തര മന്ത്രാലയങ്ങളുടെ മുന്‍കൂര്‍ അനുമതി വേണം. ഒരു ലക്ഷത്തിലേറെ മൂല്യമുള്ള സമ്മാനം വിദേശത്തെ ഉറ്റബന്ധുക്കളില്‍ നിന്ന് സ്വീകരിക്കാന്‍പോലും കേന്ദ്രാനുമതി വേണം. ഇതിനുള്ള അപേക്ഷ ധനമന്ത്രാലയം പരിശോധിച്ച് കേന്ദ്രആഭ്യന്തര മന്ത്രാലയത്തിന് കൈമാറും. വിദേശസഹായം രാജ്യവിരുദ്ധ പ്രവര്‍ത്തിനത്തിനാണോ എന്നടക്കം പരിശോധിച്ച് ക്ലിയറന്‍സ് നല്‍കേണ്ടത് ആഭ്യന്തരമന്ത്രാലയമാണ്. ഈ നടപടികളെല്ലാം ലംഘിക്കപ്പെട്ടതിനാലാണ് ജലീലിനെതിരെ ധന, ആഭ്യന്തര മന്ത്രാലയങ്ങളുടെ സംയുക്ത അന്വേഷണം. വിദേശനാണ്യ വിനിമയചട്ടം അഥവാ ഫെമ അനുസരിച്ച് പണം സ്വീകരിക്കാന്‍ റിസര്‍വ് ബാങ്കിന്റെ അനുമതിയും വേണം.

നിയമനിര്‍മ്മാണ സഭകളിലെ അംഗങ്ങള്‍ പണമായോ അല്ലാതെയോ വിദേശസഹായം കൈപ്പറ്റുന്നതിന് നിരോധനമുണ്ട്. യു.എ.ഇ കോണ്‍സല്‍ ജനറലുമായുള്ള വാട്‌സ്ആപ് ചാറ്റിലൂടെയാണ് അഞ്ചുലക്ഷം രൂപയുടെ ഇടപാട് നടത്തിയതെന്ന് ജലീല്‍ സമ്മതിച്ചത്. അതിനാല്‍ ഇതുസംബന്ധിച്ച ഫയലുകളോ രേഖകളോ ഉണ്ടാവാനിടയില്ല.

കേന്ദ്രധനമന്ത്രാലയം ചീഫ്‌സെക്രട്ടറിയോടാവും ആദ്യം വിവരങ്ങള്‍ തേടുക. രേഖകള്‍ ഹാജരാക്കാന്‍ നിര്‍ദ്ദേശിക്കും. മന്ത്രിയുടെ വിശദീകരണം തേടും. ചീഫ്‌സെക്രട്ടറി വഴിയും മൊഴിയെടുക്കാം. പണം തിരികെനല്‍കാന്‍ നിര്‍ദ്ദേശിക്കാം. ചട്ടലംഘനം കണ്ടെത്തിയാല്‍ ഇ.ഡി കേസെടുക്കും. തുടര്‍ച്ചയായ ചോദ്യം ചെയ്യലാണ് ഇ.ഡിയുടെ രീതി. ഗുരുതരമായ ലംഘനം കണ്ടെത്തിയാല്‍ 5 വര്‍ഷം വരെ തടവും പിഴയും കിട്ടാവുന്ന വകുപ്പ് ചുമത്താം

ഏത് അന്വേഷണവും ആയിരംവട്ടം നേരിടാന്‍ തയ്യാറാണെന്നാണ് മന്ത്രി ജലീല്‍ പറയുന്നത്. മടിയില്‍ കനമില്ലാത്തവന്‍ ആരെ പേടിക്കാന്‍...