സ്വര്‍ണക്കടത്ത് കേസില്‍ സ്വപ്ന സുരേഷിനെ പിടികൂടിയ സമയത്ത് കേട്ട പേരാണ് കറുത്ത കുപ്പായമണിഞ്ഞ മാഡത്തെപ്പറ്റി. ആ മാഡത്തിന് പുറം രാജ്യവുമായും തീവ്രവാദ പ്രവര്‍ത്തനങ്ങളുമായും ബന്ധമുണ്ടെന്ന് അന്നേ സൂചന ലഭിച്ചിരുന്നു. അതിപ്പോള്‍ സത്യമാകുകയാണ്. സ്വര്‍ണക്കടത്തു കേസില്‍ രണ്ടാംഘട്ട അന്വേഷണത്തിന്റെ ഭാഗമായി എന്‍ഐഎ വിദേശത്തുനിന്നുള്ള ഫണ്ടിംഗിനെക്കുറിച്ചും തീവ്രവാദത്തക്കുറിച്ചും അന്വേഷണം ആരംഭിച്ചു.

ശക്തമായ തെളിവുകളാണ് എന്‍ഐഎയ്ക്കു മുന്നിലുള്ളത്.
വിദേശത്തുനിന്ന് വിവിധ സംഘടനകളുടെ പേരിലും കള്ളക്കടത്തിലൂടെയും ഹവാലയായും പണവും സ്വര്‍ണവും കേരളത്തിലേക്ക് ഒഴുക്കിയെന്നാണ് കണ്ടെത്തല്‍. തിരുവനന്തപുരം വിമാനത്താവളം കേന്ദ്രീകരിച്ചു നടന്ന നയതന്ത്രചാനലിലൂടെയുള്ള സ്വര്‍ണക്കടത്തില്‍ സ്വപ്ന സുരേഷും സംഘവും മാത്രമല്ല, യുഎഇ കോണ്‍സലിലെ ഉദ്യോഗസ്ഥരും വിദേശമലയാളികളും ഉള്‍പ്പെട്ടിരിക്കുന്നുവെന്ന തെളിവ് എന്‍ഐഎയുടെ മുന്നിലുണ്ട്.

കേരളത്തില്‍ എന്‍ഐഎ നടത്തിയ അന്വേഷണത്തില്‍ സ്വര്‍ണക്കടത്തിലൂടെ ദേശവിരുദ്ധതയും തീവ്രവാദവും ലക്ഷ്യമിട്ടിരുന്നതായും കണ്ടെത്തിയിരുന്നു. ഇതു സംബന്ധിച്ചുള്ള പ്രാഥമിക റിപ്പോര്‍ട്ട് കോടതിയിലും നല്‍കിയിട്ടുണ്ട്. പിടിക്കപ്പെട്ട 20 പ്രതികളില്‍ ഭൂരിപക്ഷവും തീവ്രവാദത്തിനായി സ്വര്‍ണം കടത്താന്‍ കൂട്ടുനിന്നുവെന്ന് കോടതിയില്‍ അറിയിച്ചു കഴിഞ്ഞു. യുഎപിഎ നിലനിര്‍ത്തിയാണു പ്രതികള്‍ക്കെതിരേ കേസെടുത്തിരിക്കുന്നത്.

അതേസമയം സ്വര്‍ണക്കടത്ത് കേസില്‍ യുഎഇ കോണ്‍സുലേറ്റിലെ ഉദ്യോഗസ്ഥരില്‍നിന്നു വിവരം തേടാന്‍ എന്‍ഐഎ ശ്രമം ആരംഭിച്ചു. യുഎഇയിലുള്ള എന്‍ഐഎ സംഘം ഇതിനുള്ള അനുമതിക്കായി കാത്തു നില്‍ക്കുന്നതായാണ് സൂചന. യുഎഇ ഉദ്യോഗസ്ഥരെ ചോദ്യം ചെയ്യാന്‍ നേരത്തെ വിദേശകാര്യമന്ത്രാലയം കത്ത് നല്‍കിയിരുന്നു. ആദ്യകത്തിന് മറുപടി കിട്ടാത്ത സാഹചര്യത്തില്‍ വീണ്ടുമൊരു കത്തുകൂടി കേന്ദ്രം നല്‍കി.

യുഎഇ കോണ്‍സലര്‍ ജനറല്‍, അറ്റാഷെ എന്നിവരില്‍ നിന്നു വിവരം ശേഖരിക്കാനുള്ള നീക്കമാണ് എന്‍ഐഎ നടത്തുന്നത്. യുഎഇയിലുള്ള അറ്റാഷെയെ ചോദ്യം ചെയ്യാന്‍ അനുവദിക്കണമെന്നഭ്യര്‍ഥിച്ച് വിദേശകാര്യമന്ത്രാലയം വഴി ഇന്ത്യ നേരത്തേ യുഎഇക്കു കത്ത് നല്‍കിയിരുന്നു. തിരുവനന്തപുരത്തുണ്ടായിരുന്ന അറ്റാഷെയുടെ മൊഴിയെടുക്കുന്നതിന് നേരത്തേ യുഎഇയോട് അനുമതി തേടിയിട്ടുണ്ട്. ഇതു സമ്മതിക്കുമെന്നാണു സൂചന.

നയതന്ത്ര കള്ളക്കടത്തിന്റെ സൂത്രധാരന്മാരില്‍ ചിലര്‍ ഇപ്പോഴും ദുബായിലാണുള്ളതെന്നാണ് അറസ്റ്റിലായ പ്രതികള്‍ എന്‍ഐഎയ്ക്കു നല്‍കിയ മൊഴി. സ്വര്‍ണക്കടത്തിലെ പ്രധാനി ഫൈസല്‍ ഫാരീദ്, മൂവാറ്റുപുഴ സ്വദേശി റെബിന്‍സണ്‍ തുടങ്ങിയവര്‍ ദുബായിലാണ്. ഇവരെ കൂടാതെ ചില ഹവാല ഇടപാടുകാരെയും തീവ്രവാദ ഗ്രൂപ്പുകളില്‍ പ്രവര്‍ത്തിക്കുന്നവരെയും എന്‍ഐഎ നോട്ടമിടുന്നുണ്ട്.

ഇവരെ നാട്ടിലെത്തിച്ചാല്‍ മാത്രമേ കേസിന് ശക്തിപകരുന്ന തെളിവു ലഭിക്കുകയുള്ളൂ. കേസില്‍ നയതന്ത്രപ്രതിനിധികളുടെ പേര് അറസ്റ്റിലായ സ്വപ്നയടക്കമുള്ള പ്രതികള്‍ ചോദ്യം ചെയ്യലില്‍ പറഞ്ഞിരുന്നു. ഇതിന്റെ നിജസ്ഥിതി അന്വേഷിക്കാനും ശ്രമമുണ്ടാകും. അതേ സമയം വിവിധ പദ്ധതികളുടെ പേരില്‍ വിദേശത്തുനിന്നും വന്‍തോതില്‍ കള്ളപ്പണമെത്തിക്കാനുള്ള നീക്കം നടന്നിരുന്നുവെന്ന് റിപ്പോര്‍ട്ട് ഗൗരവമായിട്ടാണ് എന്‍ഫോഴ്‌സ്‌മെന്റ് പരിശോധിക്കുന്നത്. ഈ പണത്തിന്റെ ഉറവിടം കണ്ടെത്താനും അന്വേഷണ സംഘം ശ്രമിക്കും. ലൈഫ് പദ്ധതിയിലെ ഫ്‌ളാറ്റിന്റെ 20 കോടിയില്‍ 4 കോടിയിലേറെ കമ്മീഷനായി പോയിരുന്നു. അതും ദേശവിരുദ്ധതയ്ക്ക് ഉപയോഗിച്ചോ എന്നുള്ള അന്വേഷണവും നടക്കുന്നുണ്ട്. എന്തായാലും വരും ദിവസങ്ങളില്‍ സ്വര്‍ണത്തിന്റെ കട്ടക്കറുപ്പ് നിറം പുറത്താവുക തന്നെ ചെയ്യും.