പണ്ട് ശബരിമലയില്‍ പോയ സുരേന്ദ്രനല്ല ഇപ്പോഴത്തെ ബിജെപി അധ്യക്ഷനായ കെ. സുരേന്ദ്രന്‍. 2018 നവംബര്‍ 17 ന് ശബരിമലയില്‍ ദര്‍ശനത്തിനു പോയ കെ സുരേന്ദ്രനെയും കൂടയുണ്ടായിരുന്നവരെയും നിലയ്ക്കലില്‍ വച്ചാണ് ക്രമസമാധാന പ്രശ്‌നങ്ങള്‍ ചൂണ്ടിക്കാട്ടി പോലീസ് ആറസ്റ്റ് ചെയ്തത്. ശബരിമലയില്‍ സ്ത്രീകളെ തടയാന്‍ ശ്രമിച്ച കേസുകളിലുള്‍പ്പെടെ നിരവധി കേസുകള്‍ ചുമത്തി. ഇതോടെ സുരേന്ദ്രന് ഇരുപത്തിയൊന്ന് ദിവസങ്ങള്‍ക്ക് ശേഷമാണ് ജാമ്യം ലഭിച്ചത്. പത്തനംതിട്ട ജില്ലയില്‍ പ്രവേശിക്കരുത് തുടങ്ങിയ കര്‍ശന ഉപാധികളോടെയായിരുന്നു ഹൈക്കോടതി അന്ന് ജാമ്യം അനുവധിച്ചത്.

എന്നാല്‍ ഒന്നര വര്‍ഷത്തിന് ശേഷം സമാനമായ സംഭവം ഉണ്ടായിരിക്കുകയാണ് അതും തലസ്ഥാനത്ത്. സുരേന്ദ്രനെ അറസ്റ്റ് ചെയ്യാന്‍ നിര്‍ദേശം നല്‍കിയ ഭരണ സിരാകേന്ദ്രത്തില്‍ സുരേന്ദ്രനെത്തി. സെക്രട്ടറിയേറ്റില്‍ തീപിടിച്ചതറിഞ്ഞ് ചെറിയ വാര്‍ത്തയായപ്പോള്‍ അത് രാഷ്ട്രീയമായി കത്തിച്ചത് കെ. സുരേന്ദ്രനാണ്. പിന്നീടാണ് ചെന്നിത്തലയും കൂട്ടരും ഏറ്റെടുത്തത്.

ശബരിമലയില്‍ കയറുന്നത് പോലെ സുരേന്ദ്രന്‍ സെക്രട്ടറിയേറ്റിലും കയറി ലൈവ് നല്‍കി. അവസാനം ഗതികെട്ട് സുരേന്ദ്രനെ അറസ്റ്റ് ചെയ്തു. സെക്രട്ടറിയറ്റില്‍ തീപിടിത്തം ഉണ്ടായ സ്ഥലം സന്ദര്‍ശിക്കാനെത്തിയ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ സംസ്ഥാന ജനറല്‍ സെക്രട്ടറി പി. സുധീര്‍, സംസ്ഥാന സെക്രട്ടറി സി.ശിവന്‍കുട്ടി, ജില്ലാ അധ്യക്ഷന്‍ വി.വി. രാജേഷ് എന്നിവരെയുമാണ് പോലീസ് ബലമായി അറസ്റ്റ് ചെയ്തത്. എന്നാല്‍ പഴയതുപേലെ 21 ദിവസം എടുത്തില്ല സുരേന്ദ്രന് പുറത്ത് വരാന്‍. വെറും 21 മിനിറ്റിന് മുമ്പേ സുരേന്ദ്രന്‍ പുറത്തിറങ്ങി.

സെക്രട്ടേറിയറ്റിലെ പ്രോട്ടോക്കോള്‍ ഓഫീസിലെ തീപിടിത്തിന് പിന്നില്‍ മുഖ്യമന്ത്രി പിണറായി വിജയനാണെന്ന് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്‍ ആരോപിച്ചു. പൊതുഭരണ വകുപ്പില്‍ പ്രോട്ടോകോള്‍ വിഭാഗത്തില്‍ ഉണ്ടായ തീപിടിത്തത്തില്‍ ദുരൂഹതയുണ്ട്. സ്വര്‍ണക്കടത്തു കേസുമായി ബന്ധപ്പെട്ട സുപ്രധാനമായ നിരവധി ഫയലുകള്‍ പ്രോട്ടോകോള്‍ വിഭാഗത്തിലാണുള്ളത്. തീപിടിത്തം അട്ടിമറിയാണെന്ന് സുരേന്ദ്രന്‍ പറഞ്ഞു.

സ്ഥലം സന്ദര്‍ശിക്കാനെത്തിയ സുരേന്ദ്രനെയും ബിജെപി നേതാക്കളെയും ചീഫ് സെക്രട്ടറിയുടെ നിര്‍ദ്ദേശ പ്രകാരമാണ് പോലീസ് അറസ്റ്റ് ചെയ്ത് നീക്കിയതെന്നാണ് ആരോപണം. ചീഫ് സെക്രട്ടറി വിശ്വാസ് മേത്ത നേരിട്ടെത്തി പൊതു പ്രവര്‍ത്തകരും മാധ്യമങ്ങളും സെക്രട്ടേറിയറ്റു പരിസരത്തു നിന്ന് പോകണമെന്ന് ആവശ്യപ്പെടുകയായിരുന്നു. ഇതേ തുടര്‍ന്നാണ് പോലീസ് നടപടിയാരംഭിച്ചത്. തീപിടിത്തമുണ്ടായ സ്ഥലം ആരും കാണാന്‍ പാടില്ലെന്ന ചീഫ് സെക്രട്ടറിയുടെ നിലപാടിലും ദുരൂഹതയുണ്ടായിരുന്നു. തീപിടിത്തത്തിന്റെ മറവില്‍ സുപ്രധാന ഫയലുകള്‍ നഷ്ടപ്പെടാനും സാധ്യതയേറെയാണെന്ന് ആരോപണം വന്നു.

സ്വര്‍ണ്ണക്കള്ളക്കടത്ത് കേസ് അന്വേഷണം മുഖ്യമന്ത്രി പിണറായി വിജയനിലേക്കും മന്ത്രി കെ.ടി ജലീലേക്കും വരുമെന്നായപ്പോള്‍ സര്‍ക്കാര്‍ തന്നെ ഫയലുകള്‍ക്ക് തീയിടുകയാണോയെന്ന് സംശയിക്കേണ്ടിയിരിക്കുന്നു എന്ന് സുരേന്ദ്രന്‍ മാധ്യമങ്ങളോട് പറഞ്ഞു. എല്ലാ തെളിവുകളും നശിപ്പിക്കാന്‍ മുഖ്യമന്ത്രിയുടെ നിര്‍ദ്ദേശ പ്രകാരമാണ് പലതും ചെയ്തുകൊണ്ടിരിക്കുന്നത്.

പ്രോട്ടോകോള്‍ ഓഫീസര്‍ ഷൈന്‍ ഹഖിനെ രക്ഷിക്കാനുള്ള ശ്രമമാണിത്. ഫോറന്‍സിക് വിദഗ്ധര്‍ എത്തി അന്വേഷണം നടത്തണം. കേരളത്തില്‍ ഇപ്പോള്‍ ഭീദിതമായ സ്ഥിതിവിശേഷമാണ് നിലനില്‍ക്കുന്നത്. കേന്ദ്ര ആഭ്യന്തര മന്ത്രാലയവും എന്‍ഐഎയും ഇതേക്കുറിച്ച് അന്വേഷണം നടത്തണമെന്നും സുരേന്ദ്രന്‍ ആവശ്യപ്പെട്ടു.

കെ. സുരേന്ദ്രന്‍ സെക്രട്ടറിയേറ്റില്‍ എത്തിയതോടെയാണ് സെക്രട്ടിയേറ്റിനകത്തുണ്ടായ ചെറിയ തീപിടുത്തം കാട്ടുതീയായി മാറിയത്. തീപിടുത്തം ഉണ്ടായി നിമിഷങ്ങള്‍ക്കകം സുരേന്ദ്രന്‍ പാഞ്ഞെത്തി. ഇതോടെ മാധ്യമങ്ങളും എത്തി. തുടര്‍ന്ന് സുരേന്ദ്രനെ അറസ്റ്റ് ചെയ്തതോടെ അത് കാട്ടുതീയായി മാറി. സെക്രട്ടറിയേറ്റിനകത്തും പുറത്തും തീയായി. സകല പ്രതിപക്ഷ പാര്‍ട്ടിക്കാരും സെക്രട്ടറിയേറ്റിലെത്തി മുദ്രാവാക്യം വിളിച്ച് ടയറുകള്‍ ഇട്ട് കത്തിച്ചു. പക്ഷെ പേലീസുകാര്‍ ഒന്നും ചെയ്യാതെ വെള്ളം ചീറ്റി കളിച്ചു. അങ്ങനെ സുരേന്ദ്രന്‍ കൊളുത്തിയ തീ കാട്ടുതീയായി.