പമ്പ ത്രിവേണിയിലെ മണല്‍വാരലില്‍ അഴിമതി: വിജിലന്‍സ് അന്വേഷണത്തിന് കോടതി ഉത്തരവിട്ടു
പ്രതിപക്ഷനേതാവ് രമേശ് ചെന്നിത്തല പമ്പ ത്രിവേണിയിലെ മണല്‍വാരലില്‍ അഴിമതി ആരോപിച്ച് നല്‍കിയ ഹര്‍ജിയില്‍ വിജിലന്‍സ് അന്വേഷണത്തിനു കോടതി ഉത്തരവിട്ടു. സംസ്ഥാന സര്‍ക്കാര്‍ അനുമതി നിഷേധിച്ച വിജിലന്‍സ് അന്വേഷണമാണ് കോടതി അനുവദിച്ചതെന്ന പ്രത്യേകതയുമുണ്ട്. മുന്‍ ചീഫ് സെക്രട്ടറി ടോം ജോസ്, പത്തനംതിട്ട കലക്ടര്‍ പി.ബി. നൂഹ്, കേരള ക്ലേയ്സ് ആന്‍ഡ് സിറാമിക്സ് പ്രോഡക്ട്‌സ് ലിമിറ്റഡ് എംഡി എസ്. അശോക് കുമാര്‍ എന്നിവര്‍ക്കെതിരെയാണ് അന്വേഷണത്തിന് അനുമതി. പിണറായി സര്‍ക്കാരിനെതിരായ ആദ്യ വിജിലന്‍സ് അന്വേഷണമാണിത്.
കോടതിയുടെ നേരിട്ടുള്ള നിരീക്ഷണത്തിലാണ് അന്വേഷണം നടത്തേണ്ടതെന്നും 40 ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കണമെന്നുമാണ് വിജിലന്‍സ് ഡയറക്ടര്‍ക്കുള്ള നിര്‍ദേശം.
പമ്പ ത്രിവേണിയില്‍ 2018-ലെ പ്രളയത്തില്‍ അടിഞ്ഞ കോടിക്കണക്കിനു രൂപയുടെ മണല്‍, മാലിന്യങ്ങളെന്ന നിലയില്‍ സൗജന്യമായി നീക്കം ചെയ്യാന്‍ കണ്ണൂരിലെ കേരള ക്ലേയ്സ് ആന്‍ഡ് സിറാമിക്സ് പ്രോഡക്ട്‌സ് ലിമിറ്റഡിനു കരാര്‍ നല്‍കിയതാണ് വിഷയം. ഈ പൊതുമേഖലാ സ്ഥാപനത്തിന്റെ മറവില്‍ കോട്ടയത്തെ സ്വകാര്യ വ്യക്തിക്ക് സൗജന്യമായി മണല്‍ വാരിക്കൊണ്ടുപോകാന്‍ അനുവാദം കൊടുത്തെന്നും ഇതില്‍ കോടികളുടെ അഴിമതിയുണ്ടെന്നുമാണ് രമേശ് ആരോപിച്ചത്. ഇടപാടു വഴി സര്‍ക്കാരിനു ലഭിക്കേണ്ട 10 കോടി രൂപ നഷ്ടമായെന്നും വാദിച്ചിരുന്നു.
ജൂണ്‍ 6-ന് പ്രതിപക്ഷ നേതാവ് രമേശ് ചെന്നിത്തല ഇടപാടിലെ അഴിമതി അന്വേഷിക്കണമെന്ന് വിജിലന്‍സ് ഡയറക്ടര്‍ക്കു കത്തു നല്‍കിയിരുന്നു. വിജിലന്‍സ് ഡയറക്ടര്‍ ഇതു സര്‍ക്കാരിലേക്ക് അയച്ചെങ്കിലും അനുമതി നിഷേധിക്കപ്പെട്ടു. എന്നാല്‍, ഇതിനു രണ്ടാഴ്ച മുന്‍പു രമേശ് ചെന്നിത്തല തിരുവനന്തപുരം വിജിലന്‍സ് കോടതിയെ സമീപിച്ചിരുന്നു.
മുഖ്യമന്ത്രി തന്നെ മണലെടുപ്പിനെ ന്യായീകരിച്ചു രംഗത്തെത്തിയിരുന്നു. സംഭവത്തില്‍ സിപിഎം - സിപിഐ രാഷ്ട്രീയഭിന്നതയും പുറത്തുവന്നിരുന്നു. വിരമിക്കുന്നതിനു മുന്‍പ്, ചീഫ് സെക്രട്ടറി ടോം ജോസിന്റെയും ഡിജിപി ലോക്‌നാഥ് ബെഹ്‌റയുടെയും നേതൃത്വത്തിലുള്ള ഉദ്യോഗസ്ഥ സംഘം ഹെലികോപ്റ്ററില്‍ പമ്പയിലെത്തി മണലെടുപ്പു വേഗത്തിലാക്കാന്‍ നിര്‍ദേശം നല്‍കിയതും വിവാദമായിരുന്നു.
പ്രളയത്തില്‍ അടിഞ്ഞുകൂടിയ ഒരു ലക്ഷം ടണ്‍ മണലും മണ്ണും ആദ്യം ടണ്ണിനു 2777 രൂപ നിശ്ചയിച്ചു ലേലത്തിനു വച്ചിരുന്നു. ആരും കരാര്‍ എടുക്കാതിരുന്നതിനെത്തുടര്‍ന്ന് സര്‍ക്കാര്‍ ലേലത്തുക ടണ്ണിനു 1200 രൂപയായി കുറച്ചു. അതിനു ശേഷമാണു പത്തനംതിട്ട കലക്ടര്‍ കേരള ക്ലേയ്സ് ആന്‍ഡ് സിറാമിക്സ് പ്രോഡക്ട്‌സിനു സൗജന്യമായി കരാര്‍ നല്‍കിയത്.
ദുരന്ത നിവാരണ നിയമത്തിലെ 34 (ഡി) വകുപ്പു പ്രകാരം, മാലിന്യങ്ങള്‍ നീക്കാന്‍ കമ്പനികളെ ചുമതലപ്പെടുത്താം. എന്നാല്‍ പമ്പ ത്രിവേണിയില്‍ അടിഞ്ഞുകൂടിയത് മാലിന്യങ്ങളല്ല, മണലാണെന്നതാണു പ്രശ്‌നം. കരാര്‍ ലഭിച്ച കേരള ക്ലേയ്സ് ആന്‍ഡ് സിറാമിക്സ് പ്രോഡക്ട്‌സ് ലിമിറ്റഡ് ഉപകരാറുകാരെ നിയോഗിച്ചു. ഇടപാടു വിവാദമാകുകയും മണല്‍ വില്‍ക്കാന്‍ അനുമതിയില്ലെന്നറിയുകയും ചെയ്തതോടെ കരാറില്‍നിന്നു പിന്മാറുകയും ചെയ്തു
അന്വേഷണ ഏജന്‍സിക്ക് പൊതു ജനസേവകര്‍ക്കെതിരായ ആരോപണങ്ങള്‍ അന്വേഷിച്ച് എഫ്‌ഐആര്‍ റജിസ്റ്റര്‍ ചെയ്യണമെങ്കില്‍, 2018-ലെ അഴിമതിനിരോധന നിയമ ഭേദഗതി പ്രകാരം ബന്ധപ്പെട്ട നിയമന അധികാരികളുടെ അനുമതി ആവശ്യമാണ്. എന്നാല്‍, വിജിലന്‍സ് കോടതിക്ക് നടപടി സ്വീകരിക്കാന്‍ വിലക്കില്ല. ഭേദഗതി നിലവില്‍ വന്ന ശേഷം, രാജ്യത്ത് കോടതി ഇടപെട്ട് അന്വേഷണത്തിന് ഉത്തരവിടുന്ന ആദ്യത്തെ സംഭവമാണിത്.
https://www.facebook.com/Malayalivartha
