തിരുവനന്തപുരം ചാക്ക സ്വദേശികളായ സുജിത്ത് കൃഷ്ണ, ഭാര്യ സിതാര എന്നിവരെ യുവാവിനെ കാറിടിച്ച് കൊലപ്പെടുത്താന്‍ ശ്രമിച്ചു എന്ന പരാതിയില്‍ പോലീസ് അറസ്റ്റ് ചെയ്തു. തങ്ങള്‍ക്കെതിരേ ഗുണ്ടാ ആക്രമണം നടന്നിട്ടും പോലീസ് കേസ് എടുത്തില്ലെന്ന് ആരോപിച്ച് പ്രധാനമന്ത്രിക്ക് പരാതി നല്‍കിയ 13-കാരിയുടെ മാതാപിതാക്കളാണ് ഇവര്‍. ഇവര്‍ നടത്തിയ വധശ്രമം മറയ്ക്കാന്‍ വേണ്ടിയാണ് മകളെ മുന്‍നിര്‍ത്തി പ്രധാനമന്ത്രിക്ക് വ്യാജ പരാതി നല്‍കിയത് എന്നാണ് പോലീസ് പറയുന്നത്.

തന്റെ കുടുംബത്തെ ആക്രമിക്കാന്‍ ശ്രമിച്ച ഗുണ്ടകളെ പോലീസ് സംരക്ഷിക്കുന്നു എന്ന് പരാതി പറഞ്ഞുകൊണ്ട് ഒരാഴ്ച മുമ്പാണ് 13-കാരി പ്രധാനമന്ത്രിക്ക് പരാതി നല്‍കുന്നത്. ഇത് സോഷ്യല്‍ മീഡിയകളില്‍ പലിയ വാര്‍ത്തയായിരുന്നു. തുടര്‍ന്ന് പോലീസ് നടത്തിയ അന്വേഷണത്തിനുശേഷം സുജിത്തിനെയും സിത്താരയെയും അറസ്റ്റ് ചെയ്യുകയായിരുന്നു.

സുജിത്തിന്റെ മുന്‍ ഡ്രൈവറും കൂട്ടാളിയുമായിരുന്ന ശങ്കര്‍ മോഹന്‍ ദമ്പതികളെ തോക്ക് ചൂണ്ടി ഭീഷണിപ്പെടുത്തി സ്വത്തുക്കള്‍ ഒപ്പിട്ട് വാങ്ങിയെന്ന പരാതിയില്‍ സുജിത്തിന്റെ വീട്ടില്‍ കഴിഞ്ഞ മാസം പൊലീസ് പരിശോധന നടത്തിയിരുന്നു. ശങ്കര്‍മോഹനെ ചര്‍ച്ചക്കാണെന്ന പേരില്‍ പേട്ട ഗുരുമന്ദിരത്തിന് സമീപം വിളിച്ച് വരുത്തി വാഹനം ഇടിപ്പിച്ച് അപകടപ്പെടുത്താന്‍ സുജിത്തും സിതാരയും ശ്രമിച്ചു.

പരിക്കേറ്റ ശങ്കറും മറ്റ് സുഹൃത്തുക്കളും ഇവരെ പിന്തുടര്‍ന്നതോടെ ഇരുവരും പേട്ട സ്റ്റേഷനില്‍ ഓടിക്കയറി. ഗുണ്ടാനിയമ പ്രകാരം ശങ്കര്‍ അറസ്റ്റിലായി. തുടര്‍ന്നാണ് മകനെ വാഹനം ഇടിപ്പിച്ച് കൊലപ്പെടുത്താന്‍ ശ്രമിച്ചുവെന്ന് ശങ്കറിന്റെ അമ്മ, കമ്മീഷണര്‍ക്ക് പരാതി നല്‍കിയത്.

ഈ കേസില്‍ അന്വേഷണം നടക്കുന്നതിനിടെയാണ് ഗുണ്ടാസംഘങ്ങളെ പൊലീസ് സഹായിക്കുന്നുവെന്ന പരാതിയുമായി സുജിത്തിന്റെയും സിതാരയുടെയും മകള്‍ രംഗത്തെത്തിയത്. പൊലീസിനെതിരെ പ്രധാനമന്ത്രിക്ക് പരാതിയും അയച്ചു. തുടര്‍ന്ന് നടത്തിയ അന്വേഷണത്തിലാണ് വധശ്രമം മറനീക്കി പുറത്തുവന്നത്.